جواد يشبه هذا الممثل 👆
نشرت الصورة بالبارت السابق بس ما انشرت ورجعت خليتهة بهذا البارت تمنياتي لكم بقرائة شيقة لقصتي المتواضعة الفحوى
اطمئن كلبي نوعاً ما بعد ما حيدر اتصل بلمى ووضحتلة سبب عدم تواجدهة قبل الامتحان وية البقية من طالبات القاعة
بهاي الفترة والدي فاتحني حتى اتزوج واشوف حياتي مثل ما سووا اخواني اغتنمتهة فرصة حتى اجس نبض الوالد جان الوقت عصر وجنت اقرة آخر امتحان عندي دخلت عالوالد وجان كاعد بالاستقبال
جواد...السلام عليكم يابة
الوالد... وعليكم السلام هلا بجواد العزيز كول يابة اشوف كلام بعيونك احجي محتاج شي تريد شي
جواد... يابة إنتة فاتحتني بموضوع الزواج واني اريد اتزوج
الوالد... هاي الساعة المباركة
جواد... بس يابة آني ما اريد اقارب مثل مااخواني تزوجوا اقاربنة آني ببالي بنية واريد اخطبهة
الوالد... غير نعرف منو هاي البنية اهلهة منو من يا عشيرة اهلهة مثل اطباعنة لا؟
جواد... يابة البنية صارلهة سنة وياي ماشفت عليهة شي موزين ابداً واذا عالعشيرة فهية........
وإذا على اطباعنة تتعلم عليهة من تصير من عدنة
الوالد... مبين طابخ السالفة من زمان يا ملعون واجيت حتى تنطينة علم
جواد.. لا يابة انتة الخير والبركة بس قابل آني اختار شلون ما كان وداعتك يابة صارلي سنة حفظتهة حفظ حتى اخذت محمد شافهة وشاف شلون نازكة ومرتبة اسألة اذا تريد
الوالد... خلي نشوف والله كريم يصير خير ان شاء الله
وخلصت يومي شلون اقنع الوالد يوافق على خطبتي من لمى
والدتي كانت مسالمة جداً تفرح من تشوفنة فرحانين وتضوج وحتى تتمرض من تشوفنة مو على بعضنة
فمن سمعت بسالفة رادتي لوحدة من بنات الجامعة فرحت وظلت تدعي الله يتمملي فرحتي
مرت الايام بسرعة وخلصت امتحانات اخير السنة وبدت العطلة ولهيت نفسي بالشغل بوكتهة الوالد اشترالي سيارة والتهيت بيهة طلعات وونسات آني وابن اخوي لو آني وحيدر
وبين فترة وفترة اخلي حيدر يتصل عليهة ويفتح سبيكر حتى اسمع صوتهة
وبدة العام الدراسي للمرحلة الثانية وبهاي المرحلة قررت افتح الموضوع وياهة خاصة بعد ما والدي اقتنع بالخطوبة وكالي
( فض الموضوع مو تدورلي علاقات وحبيات )
بعد فترة سمعت بيهة تريد تنخطب
حيدر.. لك جواد تلاحك روحك سمعت لمى جايينهة خطابة وهية مقتنعة
جواد.. حيدر تعرفني مااحب شقاك لأن ماصخ
حيدر.. والله العظيم مااتشاقة احجي جديات اليوم تسولف هية وصديقاتهة واني سمعتهن جنت امشي مسافة قريبة عليهن
جواد.. يعني شسوي هسة انصحني
حيدر.. اذا رب العالمين كاتبهة الك متروح لغيرك
جواد.. عود ناوي اصارحهة واتقدملهة
بقيت اكل بروحي اكل طلعت للبيت حيدر وصلني وصلت للبيت جاي ابدل ملابسي ماحسيت بنفسي غير دخت ووكعت بعد كلشي ما اتذكر لهناك صحيت آني بالمستشفى ومعلكيلي مغذي صاير عندي هبوط بضغط الدم اثر صدمة هذا الكاليا الدكتور
بقيت لا آخذ ولا انطي فصلت وادعي ما اتم هذي الخطوبة
لحد ما صار الصبح توسلت بالدكتور اطلع كتبلي خروجية بس على مسؤوليتي
طلعت للبيت مباشرةً خليت محمد ياخذني وكلتلة ابدل واجي تاخذني للجامعة
محمد... جواد وين رايح مو وكتهة كلش صحتك تعبانة تروح تتخربط ويصير بيك شي
جواد.. محمد اسكت روحي بخشمي اريد اروح اشوف شصار
محمد.. انتظر انتة بالبيت وحيدر يشوف شصار
جواد.. اريد اشوفهة واحجي وياهة بلكت ماصايرة الخطبة
محمد.. هذا هو بكيفك سوي اليريحك بس ديربالك على نفسك
جواد.. الله كريم وكف السيارة هنا ابدل واجيك
محمد.. منتظرك
بدلت عالسريع وركض للسيارة مااعرف منين اجتني الطاقة اتفائلت بالامل النزرع بداخلي منين اجة وشلون اجة هالشعور مااعرف صعدت بالسيارة وتوجهنة للجامعة وصلنة قريب عالجامعة وشفت ازدحام
جواد.. محمد راح انزل هنا واكمل الطريق مشي انتة ارجع للبيت
محمد.. جواد خليني اوصلك
جواد.. محمد لا اتعبني بالحجي وروح
محمد.. براحتك بس لا تتعصب
محمدبينة وبين نفسة (لو اموت مااحب على هذا الضيم )
كملت طريقي للجامعة هلكد ما فكري مشدوه مااعرف شلون وصلت وفتت للجامعة حتى التفتيش مال الجامعة مااتذكر شلون اتجاوزتهم المهم وصلت للقسم ادور عليهة شفتهة ضايجة وكاعدة وية بنات كروبهة بس مو على بعضهة فتت وسلمت اتصلت على حيدر
جواد... السلام عليكم ابو كرار وين انتة
حيدر... بالسنتر
جواد... تعال اريدك بسرعة
حيدر... ليش شكو؟
جواد... تعال وانتة تعرف
اجة حيدر ورة دقائق
حيدر... شكو منو مات وهاي ليش شكلك مخربط ووجهك اصفر وبلاستر بيدك؟
جواد... حقك مستغرب لا تسأل لا تكول شصار بي البارحة
حيدر... يمعود انتة بطران عفت البنات كلهن وحبيت لمى
جواد... مو ابطر منك عفت البنات كلهن وحبيت دينا حالك من حالي بس الفرق انتة اشجع مني صرحت بحبك بس آني مااعرف شيصير بية من تصير كدامي
حيدر... كافي كافي جنت ناسي شذكرتني
جواد... اريد اعرف شصار على موضوع خطبة لمى؟ تمت لا؟ بعد اخوك ابو كرار
حيدر.. انطيني وقت ساعة واجيبلك الخبر اليقين
جواد... ساعة هواي حيدر نص ساعة وانتظرك هنا
راح حيدر ربع ساعة واجة يضحك
حيدر... اليوم تغديني
جواد... يعني ماتمت الخطوبة
حيدر... اي ماتمت
جواد.. شلون عرفت خاف تبنج بية؟
حيدر.. افة عليك اني ابو كرار ماتخفة علي خافية
اغديك بس خليني اروح اسلم عليهة من قريب اوكف شوية يمهة
حيدر.. عندي الك فكرة ليش ماتطلب دفتر ملاحظاتهة وتكتبلهة احبج تخليلهة رسالة هالمرة الخطوبة ماصارت مو كل مرة تجي عدلة وياك
جواد.. زين خاف تصدني
حيدر.. كول يا الله وتوكل
جواد.. شورتك وهداية الله
رحت سلمت عليهة
جواد.. السلام عليكم شلونج لمى اخبارج
لمى.. وعليكم السلام هلو جواد شو مو على بعضك وجهك لونة مخطوف
حيدر.. خليهة على الله بس شنكول هذا حال اليحب وينضرب بوري
جواد.. مو وكت هالحجي لمى اريد دفتر ملاحظات..... عندي نقص اريد اكملة
لمى... اي صار هسة اجيبة من القاعة وانطيكيا
جابتة واجت انطتنيا اخذتة وطلعنة برة الجامعة غديت حيدر واني اكلت ورجعنة لكيناهة تريد تطلع بس منتظرة تريد الدفتر مالتهة كمشت الدفتر وكتبت بوحدة من اوراقة بقلم رصاص بطرف الورقة احبج بقيت الدفتر مفتوح وانطيتهيا وبسرعة طلعت بس اريد اخلص الممر حتى اطلع للسنتر احسة صار شطولة خفت من ردة فعلهة خفت لا اخسر كلشي بكلمة تجريح منهة
طلعت للبيت لأن كلش تعبت قبل بيوم جنت متخربط ونايم بالمستشفى واليوم يوم الاحداث المفاجئة بالنسبة الي وصلت للبيت ولكيت الكل مشغول بالة علي طمنتهم وصعدت سبحت واخذت علاجي ونمت كعدت فايت وكت يعني دنيا ليل متوجس من باجر اروح لو لا؟
خابرت حيدر
جواد... الو السلام عليكم شلونك حيدر
حيدر... عليكم السلام الحمدلله انتة شلون صرت
جواد... زين الحمد لله بس شنو رأيك باجر مااداوم؟
حيدر... انتة ليش جبان بابا واجه مخاوفك قابل راح تاكلك
جواد... يا اخي مااريدهة تاخذ نظرة موخوش عني
حيدر... اوووو لعد احجي وياهة كللهة اريد اخطبج
جواد... هسة شنو باجر اداوم؟
حيدر... اي داوم
داومت ثاني يوم شو ماكو شي عادي شفتهة واكفة بس من شافتني ارتبكت واتغير لونهة سلمت عليهة ردت ولا كأنه اكو شي استغربت يعني شنو رافضتني موافقة على حبي الهة احتاريت كلش كلش كلش
رحنة لمختبر الحاسبات اتقصدت اكعد يمهة يعني احنة كل اثنين طلاب على حاسبة اني تحججت مااعرف شلون ادخل للنظام اجيت
جواد.. اليوم راح اضوجج اريدج تشرحيلي شلون ادخل للنظام وانزل على موضوع المحاضرة السابقة
لمى.. لا عادي ماكو كل اشكال
كعدت بصفهة بالي ولا يم الشرح اصلاً كل بالي يمهة
لمى.. جواد مو جاي احجي وياك يمعود وين صافن؟
جواد.. عيدي والله بالي مو يمج جان
لمى.. عود صدك راح تخلص المحاضرة لعد عندي خوش حل ننزل للقاعة اشرحلك اوكي؟
جواد.. اوكيات عيني انتي فصلي واني البس
لمى.. ههههههه
نزلنة كعدت تشرحلي والله افتهمت
جواد.. لو انتي تشرحين المادة هواي احسن تفهميني اكثر من الدكتور
لمى.. يا اللة لعد راح انطيك مثال وانتة حل
جواد.. اوكي
انطتني المثال وحليتة
لمى.. الله عليك ماجنت مفتهم الموضوع
جواد.. مفتهمة نص ونص بس انتي فهمتيني اكثر
لمى.. واني اتوقعت سويت انجاز
جواد.. والله افتهمت عليج اكثر من الدكتور
لمى.. جواد انتة شنو رأيك بفكرة حيدر وارتباطة بدينا احسة تفكيرة مال ناس عدهة نزق المراهقة يعني البنية حتى صارت تجنب تداوم هلكد ما لح بالموضوع ياريت تحجي ويا وتعقلة وتخلي يترك البنية بحال سبيلهة لأن اني لو مااحب اجرحة جان واجهتة بس خاف تطلع مني كلمة تجرحة
بقيت صافن عليهة شلون تحجي وشلون تعصبت بس مسيطرة على نفسهة مجرد ما علت طبقة صوتهة شوية
جواد.. اكعد واسولف ويا ويصير خير إن شاء الله
لمى.. الله يجزيك الخير
جواد.. تعبتج اني وياي وازعجتج ولهيتج عن وقت راحتج
لمى.. بالعكس احب اساعدكم
جواد.. تسلمين يا وردة
لمى.. عفية آني اخجل من الرسميات اترخص منك عندي استنساخات بالمكتبة
جواد.. اجي وياج
لمى.. لا مشكور
جواد.. راح اجي لأن عندي استنساخات خليتهم الصبح عند ابو المكتبة
لمى.. لعد استعجل لأن راح تصير ازدحام المكتبة باجر امتحان..... واكيد الكل عدهم نقص محاضرات هسة الكل تروح تستنسخ
جواد.. حاسبة حساب لكلشي
لمى.. احسن
رحت اني وياهة شفتهة دخلت كلتلهة النساء اولا بالدخول لمكان بالصعود لسيارة او اي مركبة بس بالدفع والمواجهة الرجال اولاً
لمى.. والله عليك فلسفة
جواد.. اني راح ادفع لأن انتي استنساخاتج كلهة ماتكلف ٢٠٠٠ دينار بس آني تقريباً ٥ آلاف
لمى.. عادي اني ادفع شنو يعني
جواد.. لا والله ابد وميصير اني هالمرة ادفع وانتي عالجايات
لمى.. اممممممممممممم بس حجيتهة خجلانة
صارت خدودهة حمر اعرفهة متصير هالشكل لو عصبية لو خجلت اكيد خجلتهة وضوجتهة
يااللة تنسى هم حتى تعرف اني مهتم بيهة
ورة ماانطيتهة استنساخاتهة وراحت ورة شوية اجت بيدهة علاكة انطتنياهة وكالت.. اذا ما تاخذهة ازعل منك وبعد حتى شرح مااشرحلك
اني ضحكت وكلتلهة.. كلشي ولا زعلج
اخذتهة منهة وهية راحت بسرعة فتحت العلاكة لكيت بيهة عصير برتقال وبسكت ونستلة وكاكاو ضحكت من كل كلبي يعني هاي لأن دفعت فلوس استنساخاتهة
ورة فترة شفتهة كاعدة بباب مختبر الاحصاء كلت لحيدر يمهدلي الطريق حتى اسولف وياهة مادام محد موجود والمختبر فارغ حتى اذا صدتني بيني وبينهة
رحت اني وحيدر سلمنة عليهة وحيدركاللهة جواد عندة موضوع يريد يستشيرج بي هية ماكالت شي ودخلنة اني وياهة للقاعة وية ماجاي نسولف والكل اجة دخل
طبعاً ضجت واتنرفزت من حظي وليش كل هالعراقيل جاي تصير بطريقي عفتهة وطلعت حتى بدون ماافتح الموضوع وياهة
وكبل رحت للبيت ومن يومهة كلش ضجت وحسيت كلشي واكف ضدي مثل اليسبح ضد التيار وحاولت الى ان اجت امتحانات اخير السنة للمرحلة الثانية ونفسيتي صفرت
اشوف الكل يسولف وياهة بمنتهى الحرية بس اني ليش هالشكل مااكدر احجي كلمة بدون مااحسبهة عدل وخلصت الامتحانات ونجحت ورحت مرحلة ثالثة وهنا متت من شفتهة ببداية الدوام صايرة احلى من قبل بهواي بس اكو شي متغير بيهة صايرة اكثر عزلة بعيدة حتى عن صديقاتهة اشوفهة وحدهة تكعد تكتب لو مخلية السماعات وتسمع بموبايلهة ضجت من وضعهة بس لا تحب
كلش دوختني الافكار عبالك معركة براسي ناس ترفع وناس تكبس
أنت تقرأ
ابطال رغم الخسارة
ChickLitقصة تحكي كيف نمر بصراعات في الحياة ونتغلب عليها رغم فداحة مانقدمه من قرابين بعضها يكون مادي والاخر معنوي تحكي قصة فتاة كانت تعتقد انها تحب من طرف واحد واكتشفت في يوم ما ان الحب متبادل لكن بعد فوات الاوان بما إنني مبتدئة ارجو عدم انتقادي بصورة لاذعة...
