بدت السنة الدراسية للمرحلة الثالثة واني كلش ضايجة صارت ظروف عائلية غاية بالالم وهو سفر اخي رأفت المفاجئ بدون منعرف طبعا رأفت شخصية جمعت جانب التدين مع بعض التحفظ وكذلك عندة نوع من التحرر بحدود المعقول عكس اخوي عاصم الي كان يرزل بصورة جارحة لأتفه الاخطاء بحيث يومية يسمعني محاضرة عن ملابسي بس جان رأفت يوكف بجانبي وميخلي يتمادة وياي ووالدتي الي صحتهة بالنازل بعد سفر اخوي ووالدي الي احسة كبر عشر سنوات بفترة عشرة أيام واختي سؤدد الي بدت تخطأ اخطاء خلت مسيرة زواجهة على حافة الهاوية
وبدت مخاوف امي من انه سؤددراح زوجهة يطلكهة كل هذا خلاني انطوي وابتعد حتى عن بنات الكروب
شفت جواد الي كلما انظرلة الكة الحب واللهفة بدت تنطفي شعلتة ويخفت لهيبة بحيث حتى ماكمت اتفقدة عكس قبل جنت ابحث عنة بكل زاوية والاحق صدى صوتة
اجة جواد سلم ورديت ببرود مو طبيعي حسيتةانزعج بس شسوي اذا هوة تمثال ماتقدم ولا خطوة بصورة شجاعة
جواد .. لمى شلونج
لمى .. بلا مبالاة .. الحمدلله
جواد .. لمى ممكن نتمشى اني وياج عندي موضوع
لمى .. هسة عدنة محاضرة مهمة خليهة بالريست
جواد.. ان شاء الله
انتهت المحاضرة وطلعت من القاعة لكيتة واكف اشرلي اطلع قبلة طلعت من القسم ووكفت بجانب الباب الرئيسي بحيث من يطلع يشوفني واني هماتين اكدر اشوفة شوية واجة التفت شافني مشة ومشيت ورا طلعنة من كلية الاداب واتوجه بية لقسم الحاسبات والانترنيت جان شوية معزول وبي حديقة بعيدة عن الانظار لكة مكان
جواد.. اتفضلي لمى اكعدي
لمى .. لا ماكو داعي خليني هالشكل مرتاحة
جواد.. كيفج
حسيتة عصب بس شسوي مو بيدي مااكدر اخذ راحتي وخصوصا احس كأنما العالم كلة يباوعلي واني جاي ارتكب جريمة بس اتمالكت اعصابي وكلت خلي اشوفة شيريد بالضبط
لمى .. اي جواد كلتلي عندك موضوع وياي خاص اتفضل اخذ راحتك
جواد.. الله بالخير يا بنت الناس
لمى .. الله بالخير بس (مااعرف تكملتهة بوقتهة)😁
جواد.. لمى صارلي فترة طويلة واني احاول احجي الكلام الي هسة جاي بخصوصة بس الظروف جانت ماتجي مثل ما اني اريد لازم يصير شي بس اليوم لا عقدت العزم انه اتكلم وياج بالموضوع واليصير يصير حتى اذا انتهت الصداقة الي بيناتنة
لمى .. باوعتلة بذهول وكلبي يدك عبالك يريد يطلع من صدري وعيوني غوركت كل مشاعر العالم صارت بداخلي متضاربة حزن فرح سعادة خوف كلشي ورجليناتي ظلوا يرجفون بحيث بقيت بس اسمع
جواد.. لمى دتسمعين الي اكولة
لمى.. هزيتلة راسي بمعنى اي
جواد.. اول مادخلت للجامعة وفتت للقاعة وشفتج انطبعت صورتج ببالي لحد الان اتذكر كل تفاصي الملابس اللابستهة حتى لون ساعتج ومن اخذنة صورة بعد حفلة التعارف صرت قريب جدا عليج باللقطة يجوز تكولين مراهق ماالومج بس اني لأول مرة احب بحياتي ومن البداية حاولت اسولفلج بس ترددت لا اخسرج كصديقة بس بعد المعاناة لا قررت اكولج يابنت الناس اني احبج وشاريج على سنة الله ورسولة واهلي عدهم علم بالموضوع من قبل سنتين وموافقين
لمى.. ها
جواد.. يعني كل هالمقدمات وتكوليلي ها
لمى .. لا مو القصد بس انتة فاجأتني
جواد .. صار ٣ سنين اعاني حقج تتفاجأين بس كوليلي مبدئيا شنو رأيج بالموضوع
لمى.. مااعرف
جواد.. كل هاللسان والشخصية وماكو سؤال ما الة حل عندج وتكوليلي مااعرف
لمى.. لا بس خليني افكر
جواد..اسألج سؤال وجاوبي بصراحة انتي اكو مشاعر الي بداخلج ؟
لمى .. احمريت واخضريت واصفريت صرت ترفك لايت الجو حلو بس اني مرة ابرد مرة اعرك كلتلة اكدر ارجع للقسم مااريد احد يعرف بالي صار هسة
جواد .. ليش قابل عيب لو حرام شاب يتقدم لبنية يخطبهة
لمى .. لا اقصد بالوقت الحاضر
جواد .. احبج لمى ولوما احبج مااخاف كل هالخوف والتردد وادوس مشاعري خاف اخسر سلامج الصبح من تكوليلي صباح الخير لو من توكفين بباب القاعة تقرين والله اظل صافن بيج اكول اليشوفج ميكول عمرج ٢٠ سنة شايلة برائة العالم كلة وتلقائية فكري زين والله اخليج بنص كلبي بس احنة عائلتنة عدهة نوع من التحفظ باللبس وهالسوالف اني هسة مااوجع راسج خليهة للوقت احسن
لمى.. سرحت بغير عالم وين جنت عن هالكلام وهاي المشاعر الة شوية افقد وما جاوبت بس كلتلة اي
جواد .. اجيبلج شي تشربي
لمى .. لا شكرا خلي نرجع
جواد .. اي صار بس شو عبالك مو على بعضج
لمى .. لا بس فاجأتني شوية
جواد .. اذا عالمفاجأة بسيطة
لمى .. اي
رجعنة للقسم واني افكر بكلامة وهوة اغلب الوقت خلصة يباوعلي من جوة لجوة حتى محد يحس والبنات اجكد لحوا علي رادوا يعرفون ماانطيتهم مجال ابد كلتلهم راسي يوجعني مالي واهس اسولف طبعا بيومهة مارحت وياهم آكلي شي بقيت بالقاعة شربت بس عصير بس من حسيت نفسي تعبت كلت لحنين نطلع للبيت والمحاضرة الاخيرة بعدين ناخذهة
شافني جواد الملم بأغراضي حتى اطلع
جواد .. لمى بيج شي تردين شي
لمى .. بهدوء تام لا شكرا بس شوية صدعت واريد اروح للبيت
جواد .. اوصلج
لمى .. لا مشكور حنين وياي لا يظل بالك
جواد .. خلي اوصلج ميخالف تروحين توكعين يصير شي اقلها اني يمكم
لمى .. لا ماكو داعي مشكور
طلعنة اني وحنين صعدنة سيارة للبيت واني تفكيري كلة بكلام جواد
صدمني يعني المشاعر بيناتنة متبادلة بس محد يعرف بالثاني رجعت للبيت صادف يوم اربعاء والبعدة خميس ريست من الجامعة اجتي اختي سؤدد النة والي اوضاعهة مو هلكد وتشتكي من زوجهة وشلون تشك بي عندة علاقة ببنت صديقتهة وماعدهة اي اثبات
سؤدد .. شلونج لمى
لمى .. الحمدلله
سؤدد .. شبيج شو مو على بعضج
لمى .. سؤدد اكو موضوع محيرني واريد اخذ رأيج بي
سؤدد .. اي سولفي اسمعج
لمى .. اكو ولد ويانة اسمة جواد يريد يتقدملي
وسولفتلهة القصة كلهة
سؤدد .. عفية هاي شنو وين عايشين وعائلتة بعدهة متقوقعة بقوقعة حبس المرأة بابا الوقت تغير والزمن غير عن قبل عوفي لا ترتبطين بي
لمى.. بس هوة ابن عائلة ومحترم يعني حتى من اجة اجة اتقدملي لا علاقة ولا تعارف
سؤدد .. لا تصيرين سطحية ارفضي وبعدج ببداية الطريق
لمى .. لو اعرف هيج ردج ولا اسولف وياج
سؤدد .. فكري بباجر اهلة يظلون يتحكمون بيج
لمى .. بس هوة مبين شخصية عند اهلة
سؤدد .. اي ليش لا والدليل خايف منج صارلة ٣ سنوات البارحة يااللة تشجع ونطق ابو الهول
لمى .. لا مو هالشكل بس يخاف يخسرني
سؤدد .. عوفي احسنلج
بقيت الليل كلة كاعدة ونمت وجه الصبح جان يوم جمعة كعدت فايت وكت ومالي واهس لكلشي ووجهي انملة حب حتى ما الي واهس اكل
ام لمى .. شبيج يمة مو عوايدج تكعدين فايت وكت
لمى .. ماما تعبانة وجسمي مكسر
ام لمى .. اسم الله عليج يمة خاف مستبردة
لمى.. لا والله ماما الجو حلو بس اني ما الي خلك تعبانة وجان تدمع عيوني واختنك اجيت احضنهة واسولفلهة بس مااعرف شنو الي خلاني مااحجي درت وجهي وطلعت من المطبخ هلكد ما ضايجة تمددت بالفراش وجانت طالعة قصيدة حسيت كل كلمة تقصدني بجيت من اعماق كلبي اختي هاجر جانت بالغرفة تقرة رفعت الغطة عن وجهي
هاجر .. شبيج لمى ليش جاي تبجين هالشكل يوجعج شي
لمى .. لا غطيت وجهي واستمرت الدموع تجري بلا وعي
شوية واجت امي رفعت الغطة
ام لمى .. اسم الله ياساتر ياربي شبيج يمة ليش تبجين هيج اكو شي صاير شي
لمى .. لا ماما ماكو شي بس ضايجة ومخنوكة
ام لمى .. يمة مرات اكو اشياء نتمنى تكون النة بس رب العالمين مامقدرهة تكون من قسمتنة يجوز شرهة اكثر من خيرهة اتعبنة بعدين رب العالمين الة حكمة بكلشي حتى لو جان ظاهر هالشي زين وانحرمنة منة بس بعدين راح نكتشف هذا الشي صيري سباعية يمة ترة الضعيف ماالة مكان يااللة استهدي بالرحمن وكومي توضي وصلي
لمى .. حسيت كلام امي بلسم الي كأنما تعرف كلشي وحاسة بية اجة كلامهة بوقتة وجان بمحلة بتشخيص الوجع
كمت اتوضيت وصليت وبجيت واني ساجدة ودعيت رب العالمين يقويني
خلص الجمعة والسبت داومت الاحد واول مادخلت صار جواد كبالي بس شكلة مال واحد تعبان كلش
جواد .. صباح الخير لمى
لمى .. صباح النور طبعا لأول مرة ما اباوع بوجهة وابتعد بنظري عنة
جواد .. لمى اكدر احاجيج
لمى .. اي هسة خليت اغراضي عالمقعد مالتي وجبت موبايلي خليتة بجيب تنورتي وعفت حتى جنطتي وطلعت شفتة طلع قبلي ورحت ورا ونفس المكان مال يوم الاربعاء
وكف واندار علي انصدمت من شفت شكلة شلون حزين وكأنه جان متوقع الراح يصير
جواد .. احجي لمى
لمى .. جواد آسفة بس اني مترددة
جواد .. اكو شخص بحياتج
لمى.. لا والله ابدا بس
جواد .. بس شنو احبج والله ولو ما انتي مااجي حتى للدوام انتي واهسي اكعد الصبح اغير ملابسي واتعطر واتهندم حتى بس اجذب اهتمامج حتى بس اشوفج ادخل للقسم مااريد اشوف غيرج
لمى .. جواد افهمني مااكدر والله ماناقصك شي بس انطيني شوية مجال بلكت اكدر اقنع الطرف الاخر
جواد .. منو اهلج تقصدين
لمى .. مو اهلي بالضبط بس اختي الجبيرة رافضة مسألة ارتباطي بيك
جواد .. ليش هية وين تعرفني وشايفتني صارلج ٣ سنين وياي شفتي شي سلبي بدر مني
لمى .. جواد بس على كيفك مو نهاية العالم جاي اكلك انطيني مجال
جواد .. لشوكت لما تجين وانتي مخطوبة
لمى .. انتة ليش جاي تتشائم وتخلق مواقف ماالهة وجود
جواد .. لمى تعبت تلث سنوات لا طايل سمة ولا كاع كل يوم ادعي كون محد يتقدملج واخاف لا اجي بعد عطلة من العطل وتجين تكليلي انخطبت
لمى .. جواد هسة انتة اعترفتلي بمشاعرك مسألة العلاقة اني رافضتهة خلينة اصدقاء بين ما اكدر اقنع اختي ونكون طبيعيين مثل قبل ومسألة ارتباطي حاليا بأي شخص غيرك ماالهة وجود
جواد .. نشوف بس الوقت الراح انطيجيا مو فترة طويلة لأن تعبت واريد ارتاح
لمى .. الله كريم
جواد .. تنطيني رقمج ؟
لمى .. لا جواد مااكدر خلينة هالشكل حلوين وحبابين
جواد .. بخيلة حتى بمشاعرج
لمى .. احسن الي والك
جواد .. زين اكدر احجي وياج من موبايل حيدر
لمى .. لا تصير طماع
جواد .. هوة انتي شمطيتني وطماع شو كلة لا
لمى .. يااللة خلي نرجع
جواد .. اي بس بعد لا تتشاقين وية حيدر هواي ولا توكفين تسولفين هواي ويا
لمى .. هاي شنو ترة انتة دائما واكف يمنة ليش هالشكل تحجي اكو شي مو لائق بالموضوع
جواد .. لا بس حسي شوية اني احبج
لمى .. سكتت ماحجيت ولا كلمة رأسن مشيت وهوة مشة وراي ويضحك بصوت عالي بحيث صدك موتني من الخجل
وللحكاية بقية وآسفة عن الانقطاع بسبب ظروف استثنائية
روح 🌧
أنت تقرأ
ابطال رغم الخسارة
ChickLitقصة تحكي كيف نمر بصراعات في الحياة ونتغلب عليها رغم فداحة مانقدمه من قرابين بعضها يكون مادي والاخر معنوي تحكي قصة فتاة كانت تعتقد انها تحب من طرف واحد واكتشفت في يوم ما ان الحب متبادل لكن بعد فوات الاوان بما إنني مبتدئة ارجو عدم انتقادي بصورة لاذعة...
