Bisaya One Shot Stories

Entry #18

"Nak pagdung-ag na arun makapamahaw na ta." Sugo ni mama nako.

"Yes dam!" Tubag nako ug gibitbit na ang tak-angan sa rice cooker.

Pina-earphones ko ug sadya kaayo nga nisabay ug kanta sa tukar.

"Lalala lalala," kanta pa nako samtang nagkilis ko's bugas.

"Ay wait sa. Pila na gani to katakos nga tubig?" Nahunong dayon ko ug giyabo na lang ug balik ang tubig.

Ana gyud ko kanunay pag layaw akong hunahuna, makalimot dayon ko pila na ka takus ang tubig nga akong nabutang.

Baby calling...

Sa ka-excited nako, paghuman nako'g butang sa tubig ug gitrapuhan ang lubot sa tak-angan bali katunga, gisaksak dayon nako ang rice cooker ug nidagan ko sakong kwarto.

Basin mabatian kong mama nga naa na koy baby bisan wala pa koy anak.

Bukbok gyud ang resulta.

"Naaak!" syagit ni mama.

"Daaaam!" syagit sad nako samtang gitabunan ang mic sa earphones.

"Gawas ra gud diha bi! Lamia gyud kunuton nang imong bugan ay!"

Pina-pout akong simod nga ni-goob bye sa akong baby ug nigawas sa kwarto.

"Tan-awa ning imong dinung-ag! Butod pa kaysa's imong tiyan oh!" Singhag niya ug gisigahan pa gyud ko's iyang mga mata.

"Pero imposible man dam kay sigurado man ko nga gipitik nako na!" Tubag sad nako.

"Unya pakan-on ko nimo aning kagumkom nga bugas? Mao na selpon pa more! Unya unsaon na man lang na kung maminyo ka? Unsay imong ipakaon sa imong pamilya? Hilaw-lata nga bugas?! Jusmiyo marimar kang bataa ka! Maayo pa ng anak ni Mareng Bakikang kay honor student na buotan pa. Ug labaw sa tanan kamao modung-ag!" Yawyaw ni mama gamit iyang talinis nga tingug.

Sanaol anak ni Mareng nimo.

Naghinukbo siya ug nitalikod maong gisuksok dayon nako akong earphones.

"Tan-awa ka! Gayawyaw pa gani ko diri, imo ra kong selpon-selponan! Unya makaon nato ng imong selpon diha?!" Mas nisiga iyang mata ug nitaas iyang tingug.

"Unya mapamahaw sad nato ng imong rap ma?" Bara nako sa iyaha.

"Kung papamahawon kaha ka nako'g kumo, mabusog kaha ka?!" Nangumo dayon siya ug gipikpik pa iyang braso.

"Susss, madam, ingun bitaw ko nga pun-an na lang to nako'g tubig para maluto." Nitindog dayon ko.

"Sige dam ha? Lingkod lang ka diha, your wish is my command!" Gimasahe pa nako iyang abaga paglabay nako sa iya.

Lisud na'g masumbagan ta sa paryente ni Pacquiao maong dung-ag ta, dung-ag.