Bisaya One Shot Stories

KENDALL

Dako kaayo ko'g ngisi while gigukod ko ni Kendall.

"Paspasi ug dagan Kendall! Daliiii!" Ako pa siyang gisungog kay gawas na iyang dila nga basa kaayo's iyang laway while naggukod nako. Dia mi run sa park nagdagan-dagan tunga sa mga tawo nga nag picnic ug mga bata nga nagduwa pud.

"Good girl. Good girl!" Nagkatawa ko nga naggitik-gitik sa iyahang baga nga balhibo. Siaw jud ning iro-a kay ganahan kaayo makighanggat nako sukad nga namatay akoang mga ginikanan ug igsuon.

Nagkatawa mi nga galigid-ligid ni Kendall sa bermuda. Lipay kaayo mi ug gusto nako nga di na mahuman, nga ingani mi hangtud sa hangtod.

Pero nasobraan iya pagligid maong medyo nalayo siya sa ako. "Kendall, diri ra ta tapad ni ate." Tawag nako sa iya pero gitan-aw lang ko niya. Abuton unta nako siya pero kalit ra nga nikilat ug naigo si Kendall, ang akong bibo nga iro. "Kendaaaaall!" Singgit nako pero nakamata ko kay gipikpik sa babae akong aping. Diretso ko nilingkod ug gipangita si Kendall.

"Relax, hija. Nagdamgo ra ka.." Gigunitan ko sa babae pero basa na akong nawong sa luha.

Asa na man ka, Kendall? Pakita nang ate, please... Gitabon na lang nako akong kamot sakong nawong para muhilak sa tago.

"Arf! Arf!" Dayon ko nibarug ug gisunod kung asa gikan ang tingog. Nabuhian ko'g dugo. Sure jud ko nga si Kendall to.

Pero samtang nagkaduol ko sa tingog naay kusog nga nilagubo sa kalsada. Nisuksok ko sa mga tao nga nagtapok ug didto murag gihiwa-hiwa akong lawas sa kasakit. Mura ko'g gibuhusan ug ininit tubig ug nangalaswa akong panit. Wa ko kalihok dayon.

Automatic nga nitulo akong mga luha ug di na nako mapugngan. Wa na ko sakong hunahuna nga nibaktas padung sa iya. Niluhod ko ug gipatong sako paa ang iyang ulo nga naligo na sa dugo.

"K-ken..dall.." Mao lang nay ako nalitok ug sige na ko'g hilak.
Mas maayo pa ug damgo na lang ni. Pwede pa kong mo mata ug mag-uban pa unta ta. Ikaw nga akong mahimong nanay, tatay, ate ug kuya after nako nga mahimong survivor sa massacre nga nahitabo sa tibuok namong pamilya. Ikaw nga maoy akong kaduwa sa linghud nako nga panghunahuna. Ikaw nga wala mo judge nako kay hugaw na kaayo akong tibuok lawas, kay niwang na kaayo ko, kay palaboy na lang ko ug namalimos sa kalsada. Ikaw naghatag nakog paglaom ug rason nga mokatawa. Ikaw nga akong tanan. Akong pamilya. Akong best friend. Akong happy pill. Akong partner sa kanunay.

Akong other half. Wala na. Wala na ang iro nga nagpalipay sa bata nga nag-inusara. Kendall, iro ra man ka para sa ilaha pero superhero ka para sa akoa.