Bisaya One Shot Stories

Entry #22

"Hey kumusta?" Nahilingi ko sa nitapad nako ug akong nakita ang usa ka lalaki sa akong kilid.

"Okay ra. Gwapa gihapon. Ikaw?" Ningisi ko'g pait kaayo.

"Mas okay na sad karun. Gwapo unta kanunay pero pirme sad gihapon mingawon sa imuha."

Pugos ko nga ningisi ug nilingi sa iyaha.

"Nindut jud ang buwan no labi na'g full moon?" Pagputol niya sa makabungol nga kahilom sa among palibot.

"Pero mas nindot unta kung kuyog gihapon nimo magtan-aw ang tawo nga nagapalipay sa imoha." Tubag nako samtang naa sa gihapon ang panan-aw sa buwan.

Nisugod pagbalik tanang kasakit nga akong gikumkom sa dugay nga panahon.

"Bitaw. Pero unsaon ta man kung may lain nang kuyog magtan-aw ang tawo nga nagapalipay sa imoha. May mahimo pa ba ta?" Balik niya sa pangutana sa akoa.

Nitan-aw ko sa iyaha nga gahangad sad sa langit.

"Mao bay hinungdan nga gibiyaan ko nimo kay dili na kay gugmaan nako ug may naagian kang mas maayo?" Kalma sad nakong pangutana ug nag-abot among mga mata.

"Oo ug tinuod akong kalipay 'pag kuyog ming duha."

Mura'g gihiwa-hiwa akong kasingkasing ug gidukdok ug martilyo akong dughan sa kasakit sa kamatuoran nga iyang gibatbat mismo sa akong nawong.

"Baks, here's your isaw!" 

Nahilingi mi pareho sa usa ka macho ug tattoo-an nga lalaki nga niduol niya.

Gidunol sa iya ang usa ka-stick nga isaw ug botelya nga buko juice.

Nisiga akong mata nga nitan-aw sa iyaha samtang gapugong-pugong sa akong katawa.

"I'm so hungry na baks, let's eat more pa there oh!" 

Nigakos ang lalaki sa iyang kilid ug naka-pout ang simod nga gitudlo ang barbecue-han sa atbang.

"Siguro kita-kita na lang ta diri sa baywalk next time." Sulti niya ug nagngisi nga nilakaw kuyog ang macho kaayo nga lalaki.

"Mao na imuhang bag-o? Mura man lagi'g daan ug nawong." Text dayon nako sa iyaha ug sa tago nibahakhak ko'g katawa.

Dili jud mi para sa usa'g usa kay pareho man diay mi'g gipangita.