Bisaya One Shot Stories

Entry #23

"Oh kanang mga wala pa kabayad diha, bayad na intawon mo!"

Singgit sa konduktor nga nag-atang sa pultahan sa bus.

"Ayaw tawon mo pabungol-bungol! Kay nisakay man mo, dapat mamasahe sad mo panagsa!" Dugang singgit pa niya.

Nakatulon ko'g daghang laway ug nitan-aw sa sinsilyo sa akong palad.

49 pesos na lang ang nabilin nga sukli sa akong gibayad sa among amutan sa project ganiha. Kulang ko ug piso para makapamasahe ko.

"Hagnaja na, Hagnaja!"

Nahilingi ko sa bintana kay duol na kaayo ang amoa. Kusog na nga nagbuto-buto akong dughan.

Nakita nako ang pagkahagbong sa piso gikan sa bulsa sa usa ka lalaki ug nidako jud pag-ayo akong mga mata.

Gitamakan dayon nako ang piso labun walay nakabantay. Maayo gani kay puno kaayo ang bus maong sikit ra ang mga tawo.

Niduko ko'g hinay-hinay para puniton ang piso sa akong tiilan pero wala pa man nako makuha nikalit lang ug brake ang bus ug naumod akong nawong sa sawog.

Nidali dayon ko'g bakod nga mura lang ug way nahitabo.

"Para!" Singgit nako ug nihunong ang sakyanan.

"Diin man ka gikan day nga arang hugawa man nimo?" Pangutana sa konduktor pagdunol nako sa kwarta.

Nagpanglingi ko kay basin naay kaila nako pero maayo na lang wala.

"Amm..nagtanom mi ya, agriculture student ko." Pamakak nako ug diretso nga ninaog sa bus.

Nakanaog na ko sa bus sa dihang naay ni-chat nako.

"I thought nursing student ka base sa imong uniform?" Nisiga akong mata sa chat ni crush ug nahilingi ko'g balik sa bus.

Didto nakita nako iyang nawong nga dako kaayo'g ngisi sa akoa dayon nilarga na ang bus.

Nakapiyong na lang ko sa kauwaw kay naka-realize ko nga naka-all white uniform pa man diay ko.

Sala jud ni sa piso!