انا الاقرب منك اليك

البارت السابع

صرت للأحزان مدينـة .. وصارت الدموع غزيـرة .. والجروح والألام صاروا حكام بضلوعى الحزينة ..

بقلم سماح الانباري samah_96ss
رمضان كريم..الناسي الاحداث يرجع للبارت السابق ..

مينا: كعدهه بابا تعاال انته ماتردك ...لج ماااما امانه كعدي فدووة

كامت تضرب على خدودهه وانس يلزمها يحاول يبعدها بس مينافقدت بابا يبجي وواكف اسامه اقترب يحركها يهزها يبجي ويصيح

اسامه: لجج يوووم كعدي شيسوة صباحي بدونج مو لبارحه شحلاتج عين الله عليج يمه كووومي اني لخاطرج كلشي اسوي حته اني انام هاي نومه ولا انتي كووومي يمه

انس يكوم ب مينا وباسامه بس همه فقدو واني على وكفتي متحنطه بابا يحركني بسرعه وخرت منه واكفه ودمعه مانزلت من عيني بس اهز براسي لا لا هاي حلم كابوس هسه اكعد على صوت مينا تحجي بتلفون لو اسامه يكعدتي اي اي هسه يطلع كابوس ..

البيت بلحظات نكلب عزا وصياح اخواني وخواتي يصيحون ويبجون شيماء راحت تجيب علاج بابا عنده ضغط من سمع ماما بيها سرطان علك ضغطه هسه شحيصير بي!!

بغضون ساعه عمام وخوال وكلها لتمت وجيران مو همه ذولي قبل يومين بالضبط اجوي فرحانين لرجوعها بسلامه ليش هيج دنيا نفس لاجوي فرحانيين اجوي معزين اااخ ..

كلها لتهت واني متحنطه انتصار تحاجيني بس اصفن بالوجوة اسامه يحاجيني شافني مااحجي عافني وراح يجيب مغسله لماما هو ومقتدى الكل نخبص واني كعدت يمها على جربايه قبل لا تيجي المغسله لازمه ايدها ابوسها مكدرت انطق حرف من صدمه بس ابوسها اتمنى يوصلها احساسي بالعجر بدونها وهي هسه كبالي شحال من تروح صدك..

كلبي يحاجيها:
كعدي مامااا اني بنيتج صغيرونتج
مدللتج
اخر لعنكوود
صديقتج..حبيبتج
كعددي منو اليه من بعدج
مدللتج تعبانه والله
كووومي ماما لا تعوفيني
مو تعرفين اني بدون مااسوى شي
باابا المن عفتي ؟
اني واسامه ؟
مينا بعد وراها تخرج وزواج ؟ ليش تروحين بسرعه
بس اسمعيني حتى دموعي متقبل تنزل ممصدكه انتي تعوفيني منج تجي هاي سالفه
صعبه ماما بنيه بدوون ام صعبة
لو تمرضت منو يمي ؟
لو تكاسلت منو ينصحني ؟
منو يدعيلي .؟
منو يحبني كدج!؟

حلا: كومي حور اجتي المغسله ....كامت تبجي

اني بس اهز براسي واتصفن ما تقبل تنزل مني دمعه ولا صرخه ليش؟ هيج جوارحي ممصدكات اي مو كلت ماتعوفينه بسرعه هيج ..

رجعت احاجيها بصوت
حور: ماما مو تشافيتي ؟ مو كلتي تحسنتي ؟ طبيب مو كال صارت زينه!! لعد ليش بسرعه رحتي ؟ خطا طبي ؟ لو شنو صار

حلا: كولي لا اله الا الله هذا يومها دتكفرين هيج العمليه ناجحه وهي ماشالله جانت زينه هذا يومها كومي هيج انتي تاذيها