الذميم

٧

السلام عليكم

                                          ______________________

على لسان الذميم ....
   "الحمد لله الذي مَنَ عليَ بيمامة وسط صحراء حياتي فكانت كأنها ... غيمة نزلت على صبر صحرائي فأندت اشواك قلبي بلطفها الشديد ... فصار الشوكُ و لاول مرة له شعور الحلاوة بعد الالم المرير .."

                                                ___________________

اسمعها تريد تجر نفسها ما ينجر ....محد بكدي يعرف شنو يعني احاول اتنهد بس صدري ميكفي النفس الاجره من كبر قهرتي ....ماكو للنفس مجال ... اني المحتركه روحي هيج لعد هي شصار بروحها ... بدون رغبة مني و غصبا عني رجعت بيه لذاكرة لقبل سنين من هسة ...

جنت كاعد بغرفتي و ساد الباب عليه ... طلعت فلوسي مبلغ ميتعدى ال٥ ملايين ... قليل بالنسبة للسنين الشتغلت بيهن و التعب التعبته جنت توني جامعة و اشتغل وره الدوام و بالعطل مستحيل اكعد بس اشتغل حتى اجمع و اكون نفسي ... همي اطلع من هذا البيت و اعيش لان محد يحس بالاني بي و شكد عانيت ...محد يدري شكد حسرت من عمري و حيلي دااكسب الربع دينار

بنص حسابي و تفكيري العميق الساكن ... ووسط خخطي لحياتي الراح اعيشها وحدي .... انفتح باب الغرفة بقوة كأنما زوبعة فاتت للغرفة و مااعرف شلون ابويه شالني من هدومي و جرني و هو مخنزر عليه و يحجي بعياط

....ليييش لييييييش تمد ايدك يا ناقص شلون تبوك الفلوس شلووون ولك سودت وجهي بين اخوتي الله يسود وجهك .... لو كلتلي اريد قابل ماانطيك بس هي هاي التربية الغلط هيج تسوي ... فلا عرفت اربيك بعدني اريد احجي جان يهجم عليه اني مصدوم لزمني ضرب و فشار اريد اطلع صوت مااكدر واشوفه شلون يعيط و يضرب يكولي تبوك حلال ابو وعمامك وهاي تربية الفصلية اني اريد استوعب اليكوله شمسوي اني وهيج يضرب بيه هو
تركني و فتح كنتوري طلع من عنده حزام سمع صوت همام بره راح سد الباب و قفله ولزمني جلد بالحزام ماخله مكان صاحي بجسمي بس اني مااطلع صوت وهاي من زماان عندي من يضربني مااطلع صوت حجيت بنفسي شصاير هالمرة وذابي براسي وعود اني اكول ابويه صاير احسن ضحكت بداخلي وكلت لتنسى نفسك هشام انت شنو وابن منو و شلون يشوفوك اهلك اسمعه يحجي ويكول
ابو هشام: ولك شاكول شاكول لعمامك ابني اخذ الفلوس ابني يمد ايده ولك ليش تنزل راسي مو انت ابن الشيخ شلووون
هشام: استمر يضرب بيه الى ان تعب واني احس جسمي صار ماي من الالم و الدم مااكدر اشيل ايدي شفته راح للسرير ويلم بالفلوس اجه و دفرني حيل ببطني وفتح الباب لان راح يكسر همام الباب من الدك هو فتح الباب وطب همام بسرعه من شافني انصدم وجمد بمكانه اجه يريد يكومني بس عاط بي ابويه
ابو هشام: اتركه ممنوع تجي يمه بلكي الله ياخذه و يخلصني منه العااار ينزل راسي و يمد ايده على الفلوس
هشام: هو حجه هيج جان يعيط همام بوجهه بقوه و كال حجي خلا يوكف متصنم بمكانه
همام: منو كالك منو كالك هشام هو الاخذ الفلوس هااا جذب مو هووو والله مو هوو
ابو هشام: منو كالك على الفلوس شدتحجي انت شمدريك
همام: صارلي اسبوع مااكدر انام من وره هل الشغله ياابويه يا شيخ قبل متحكم تعال اسمع و دور زين ....مو ابنك الي يمد ايده على فلوس ابو عمامه ومو ابنك الي يخون اهله تدري منو اخذ الفلوس هاااا الي اخذ الفلوس خاالي الي اخذ الفلوس ابن عمك جلال تدري شلون عرفت ....سمعته قبل اسبوع يحجي ويه عامل من العمال يهدده اذا حجه يبلي هو الاخذهن ويكوله اذا بقيت ساكت انطيك فلوس ماخليت مادورت ورحت للعامل و اندليت بيته وهاي جيتي من يمه وحجالي كلشي ...تقدمت و اخذت الفلوس من ايده بقوة وحجيت
همام: هاي الفلوس مال هشام هاي الفلوس تعب هشام واني الشاهد عليهن
هشام: اباوع ابويه يسمع كلام همام و مصدوم اني كمت على حيلي و توازنت و مشيت طلعت من الغرفه وخليت همام يحجي ويعيط بالغرفة اسمعه يكول لابويه رحت سمعت من واحد و حكمت شفت مرت ابويه واكفه شافتني وضلت صافنه بوجهي ادري الها ايد بالموضوع اصلا حياتي جحيم بهالبيت من وراها يوميا سالفه واسكت لخاطر جديتي نزلت وشفت جديتي واكفه يم الدرج متكدر تصعد شافتني و شهكت اني اشرتلها بمعنى ماكو شي وطلعت من البيت ......