الذميم

١١

السلام عليكم....

______________________________

"أَأُعلِنُ ما بي أَم أُسِرُّ فَأَكتُمُ؟؟!
وَكَيفَ وَفي وَجهي مِنَ الحُبِّ مَعلَمُ؟

رَكِبتُ عَلى -اِسمِ اللهِ- بَحرَ هَواكُمُ
فَيا رَبِّ سَلِّم.. أَنتَ.. أَنتَ المُسَلِّمُ

يَقولونَ لي أَخفِ الهَوى لا تَبُح بِهِ
وَكَيفَ وَطَرفي بِالهَوى يَتَكَلَّمُ؟!

شَكَوتُ إِلَيها حُبَّها فَتَبَسَّمَت
وَلَم أَرَ شَمساً قَبلَها تَتَبَسَّمُ"

____________________________

كعدت من النوم على صوت المنبه و شفت الساعه وهي تأشر على ال6 و نص ...نهضت من مكاني و رحت وكفت يم سرير اختي اصحيها من النوم و اني اندسها حتى تنهض ... فتحت عيونها بضيق و كالت

- اي مارية كعدت

استمريت اندسها لان اعرف هذا بس حجي و راح ترجع تنام الى ان استسلمت و نهضت ويايه وهي تتأفأف

رحنا للحمام فرشينا اسناننا و توضينا و رجعنا لغرفتنا ... صلينا صلاة الفجر و باشرنا نبدل و نتحضر حتى نروح للدوام ...

اني مارية ... عمري 23 سنة و طالبة جامعية ... اكبر من اختي بس تأخرت سنتين تقريبا بسبب الظروف   ... وصرت ويه اختي ميس بنفس المرحلة و الصف و خلصنا مسيرتنا سوه .  ... هي اختي و صديقتي و اهلي ... وصوتي ..

صوتي العجزت انه يطلع فديوم او اكدر احجي بسببه ... اي نعم اني خرسة مثل ميكولون ... فقدت صوتي و القدرة على الكلام من اني صغيرة على أثر انفجار راح ضحيته هوايه ناس و من ضمنهم امي ..

صحيت من سهوتي على صوت ميس وهي تستعجلني حتى اكمل و ننزل دنروح .... عدلت ربطتي مرة اخيرة و اخذت جنطتي و ملازمي و نزلت وياها .... طلعنا من البيت بلا اكل خوفاً من تعليقات خالتنا و توجهنا للدوام عن طريق الفورتات نفس كل يوم

وصلنا للجامعه و كالعادة نور واكفة تنتظرنا يم الحدايق مال البوابة .. بس شافتنا ابتسمت و تقدمت علينا سلمت  و فتنا سوه نتمشى  الى ان وصلنا للنادي .. كعدنا و اني اتفرج عالبنات و اسمع سوالفهم بلا ما اشارك كالعادة ...

مشه الوقت و وصلنا لنهاية الدوام .... واتي حاسه على نور مو طببعية عبالك بحلكها حجي

رادت تروح ووكفت على غفلة و التفتت علينا و كالت

نور :- اليوم نجيكم اني و ماما العصر ... تحضروا بنات

كالت هيج و راحت بسرعه بلا منسألها بس انطتنا خبر راح يجون ..

استغربنا اني و ميس  و عبالك حس كلبي على سبب الزيارة ...