الذميم

١٢

السلام عليكم

_________________________

"أَراكَ عَلَيَّ أَقسى الناسِ قَلبًا
وَلي حالٌ تَرِقُّ لَهُ القُلوبُ

حَبيبٌ أَنتَ قُل لي أَم عَدُوٌّ؟
فَفِعلُكَ لَيسَ يَفعَلُهُ حَبيبُ"

_________________________

مارية

وره ما طلعوا من البيت انتبهت على خالتي مكيفه و ما واسعتها الدنيا ... تفتر و تباوعلنا و تكول

- اي و اخيرا ثميناتجن نخلص منجن و تروحن

وهذا كلامها جان بدون مزح ... فعلا هي جانت تتمنى طلعتنا من البيت بروح ... مع العلم هي اخت امنا و تزوجت ابونا وره ما ماتت ماما بس ابد ما حسستنا هي اخت امنا ...جانت تتمنى تخلص من عدنا و يفضالها الجو ... و خلفت ولد اثنين و خلت ابويه يتولج بالولد و يدللهم حيل

كلنا يجي نصيب اخلي ايدي على كلبي اخاف تقنع ابويه يزوجني ... واني اليجوني اما كبار بالسن او مرضى و ميرهم يتزوجون و بكل مرة جان رفض بابا يشفعلي

بس هالمرة غير ... هالمرة لا مريض ولا عجوز ... انما متزوج ...

ما اقلل قيمته لو استصغره على نفسي ...لا ابداً
انما ممستعده ابني سعادتي و اتزوج و يجوز يصير عندي اطفال على تعاسة غيري ... زوجته
كل تفكيري جان بيها هي ..مااكدر ولا اتحمل هذا الاحساس اني بلا شي احس بروحي منبوذة او شي يعتبره المعجتمع غير مريح ... والدليل علاقاتي و اختلاطي ويه الناس جداااا قليل

بنص افكاري انتشلني صوت بابا و هو يصيح بأسمنا اني و ميس ... واكيد سبب استدعائنا زيارة اهل نور اليوم علينا

تنهدت بهم و نزلت جوه و لكيت ميس واكفه كدام غرفته تنتظرني انزل نفوت سويه

دخلنا اني وياها و هو من شافنا ابتسم ابتسامة دافية كالعادة و اشرلنا نكعد كدامه

سوينا مثل ما طلب و هو حجه بأبتسامته و صوته الحنون

- بناتي الحلوات جاييهن عرسان ها؟

ابتسمت ميس بأستحياء و اني ابتسمت بهم من كللامه الجاي

- الجماعه نعرفهم و نعم الناس و العائلة و صيتهم واصل ... بس ميمنع اسأل و استفسر على راحتي و بنفس الوقت انتو هم اخذوا راحتكم و صلوا و استخيروا و من ترتاحون و تقررون القرار المناسب الكم ردولي خبر
زين يابه؟

ميس:- ان شاء الله بابا

مارية :- هزيت راسي بمعنى الموافقه على كلامه ... و نهضنا اني و ميس طلعنا من الغرفة  و رجعنا لغرفتنا الدنيا ليل ووقت نوم ..