الذميم

٩

السلام عليكم ...

_________________________

بعض العلاقات تضن انها سكينة للنفس ... الا انها في الواقع موت  بطيء  و انعدام للروح و النفس

___________________

نور :- هاي طليقة هشام !!

اليمامة
بقت سالفة  نور ترن براسي ..شلون !! طليقته شلون تجي للبيت هيج عادي؟ 

بقيت مستغربه و مصدومة الى اني دخلوا البنات و اني وياهم وين ما يروحون اروح ... كعدنا وحده يم الثانية

اشوفهم يحجون بيناتهم و مندمجين و اني ساكته .... التفتت عليه وحده من الكبار لابسه عباية خليجية سوده و شيله بيجي و مدندشه بالذهب ايدها و سألت

- هاي زوجة هشام؟

انوار :- اي عمة هاي زوجة هشام

- ها خطية يعيني

اليمامة:- من كالت هيج اني عكدت حاجبي ... شنو شبيها؟ شنو خطية على شنو؟ ... رجعت و حجت ويه ام همام

- شعجب بيت الشيخ ما سوو عزيمه و لا لموا الكرايب و شوفوهم مرة هشام الجديدة؟

ام همام :- والله شكلج عيني ...هو هشام متدرون بي لا يحب الهوسات ولا شي جابها بطرك عبايتها و عليجتها و انسد الموضوع

- من يوم يومه هالهشام محد كادر يمشي كلمة عليه مدري عليمن هالطبع طالع

اليمامة :-  بلعت ريكي و احس بألم ببلاعيمي مال قهرة ... شنو الغاية من هالكلام و كدام طليقته و كدامي ماادري  .. بقيت ساكته و احس بالنظرات العليه الى ان حجت اخت ريام طليقة هشام

- لعد عمه شو سمعنا البنية مغصوبة عالزيجة هاي ؟ و ما سويتوا شي لا مترهم تسوون و هي هيج متزوجة

انوار :- سحر هالكلام ماله داعي ... هشام ميحب الدوخة و الهوسة و تفاهم ويه مرته و ماسووا لا حفلة و لا شي و هذا الشي راجعلهم و ميستوجب احد يتدخل بي

سحر:- انوار دكولي يالله شحجينا قابل ... غير اهل احنه و ردنا نعرف منين و شلون جتي هالبنية الرضت بهشام و رضت بي هي

نور :- الحمد لله و عين الله عليهم واحد راضي بالثاني و متوالمين و ما ناقصهم شي ... اليمامة درة مال الله و هشام يستاهل

اليمامة:- هم يحجون و انوار لازمه ايدي و ضاغطه عليها وهي تجاوب عليهم

سحر:- عاد والله يستاهل هشام هم شاف المحد شافه و اله حق يستقر

اليمامة :- كملت كلامها وره ما لزمت ايد ريام و كالت

سحر :- هم انفصاله هو و ريمه اثر عليهم ثنيناتهم  يموت عليها هشام و عالكاع التمشي عليها ... هي الدنيا نصيب و مندري شنو ممكن يصير باامستقبل