طلعت من سماهر و الدنيا كانت مسودة في وشي ، ماقادرة أصدق السمعتو منها قعدت في مصطبة في الشارع كان راسي لافي ماقادرة أفهم زياد يسرق؟
رغم إنه زياد من بداية معرفتي بيهو كان زول ملان غموض و مشاكل وكذب ، و خلاني اتجهجه وما اعرف انا اصدق شنو واخلي شنو بس كنت متأكدة انو اخلاقو كويسة و إنو ما بغلط ، فكيف يسرق !
و يسرق عبد الله ؟ سماهر قالت لي انو في شيكات في الشركة كانت بي اسم زياد و لمن ما دفعها اتسجن وهسي ليهو شهرين في الحراسة و مافي اي زول شافو ، هو ماعندو اهل هنا ومابعرف زول طيب الحيزورو منو ؟ حيطلعوا منو من محنتو دي؟
انا لو حاولت اساعدو حاعمل شنو ؟ حامشي لي منو ، دي كلها كانت تساؤولات في راسي وانتبهت اني لسة في الشارع ، ركبت ركشة من مكاني و مشيت لقسم الشرطة اول مرة كان أدخل فيها قسم ، حسيت بخوف لمن دخلت وانو القسم ملان رجال و مافي ولا مرة بالغلط حسيت بإختناق وكانوا مافي ذرة اكسجين في الجو ، واحد كان قاعد قدام تربيزة و بحسب في قروش وجنبو واحد فاتح دفتر و بكتب في حاجة ، قلبي كان بدق بسرعة و لساني تقل ماعارفوة ارفعو كيف وابدا الكلام .. رفع راسو عاين لي الكان بكتب ، و قال لي الجنبو يا جنابو شوف الزولة دي شكلها أول مرة تدخل هنا .. قال لي اتفضلي وهو وشو كان حااازم و صارم ما أداني إحساس ارتياح عشان اتكلم معاهو ، قلت ليهو انا عايزة ازور زياد حسام الدين ممكن يعني ! قال لي و هو بعاين للجنبو شوف اسم زياد وين ؟
وسألني محامية؟ قلت ليهو لا ؟ قال لي بطاقتك ؟
مديت ليهو الرقم الوطني وسجل بياناتي في دفتر و سألني بتقربي ليهو شنو ؟ قلت ليهو خطيبتو قال ليهو طيب سوقها وصلها يا عصاااام ، و ساعة زمن بس ، ما حتقعدي اكتر .. مشيت مع الضابط ولا العسكري ولا ما عارفة هو بسموهم شنو .. مشيت معاهو لحدي مكان الزيارات ، تربيزة حوليها كرسيين و طلع وجاب زياد معاهو ، شكلو متغير والدقن كانت كتيييرة و الشعر كتييير ، قلت ليهو ازيك ؟ ماعرفت اعمل شنو ، بعاين ليهو وساكتة و زعلانة على هيئتو و كان ضعيف شديد ، فالظاهر انو كانت في مشاكل قبل قصة الشيكات بس قعد وسكت وهو بعاين لي ..
قلت ليهو انا قلت ليهم اني خطيبتك ، ما ردا علي برضو قلت ليهو زياد انت كويس ؟ قال لي لا ..
قلت ليهو انا ماصدقت انك في السجن قام قاطعني وقال لي وصدقتي اني سرقت ؟
قلت ليهو برضو لا ، والله مستحيل اصدق انك تسرق و لو كنت شاكة بس شوية ماكنت هسي جيت اشوفك ، زياد احكي لي حصل شنو ؟ قال لي عشان شنو ؟ قلت ليهو عشان اقدر اساعدك ، او اشوف طريقة مستحيل اخليك كدة يازياد براك ، انت هنا ماعندك اهل ولا اي زول ، قال لي شكرا على زيارتك ، للحظة حسيت اني فقدتو ، و انا راجعة بعد شنو ؟ من البداية ليه كذبتو ؟ ليه ماوقفت معاهو في قضيتو الرجع بيها ! حسيت اني كنت انانية بحب نفسي واني ضعيفة و ماقدر المسؤولية ، عيوني رقرقرت وكنت عايزة ابكي و زادها علي حالة زياد الهسي و شكلو و مظهرو ..
شلت نفسي واتنهدتا و قلت ليهو الحمد لله ، عاين لي و كان شايف الحزن في وشي قدر شنو ، قال لي تتذكري لمن سألتك من وسيم ؟ قلت ليهو ايوة ..
قال لي عارفة وسيم دة منو ؟ شريك عبد الله الانا جيت من هناك عشان أسلمهم للروس ..
عارفة إنو وسيم السبب في النهب بتاع بت المدير الروسي ؟ وعارفة انه لمن اتقاسمو القروش وسيم سافر الامارات وعمل بزنس هناك و كبرو ورجع السودان عشان يعرسك بقروش حرام !
بعاين ليهو وماقادرة استوعب اي كلمة قالها والدخل وسيم صحبي ! في سرقة الروس هناك شنو ؟ و العرف وسيم وعبد الله بي بعض شنو ! وسيم مستحيل يعمل كدة؟ قلت ليهو زياد انت لو بتكذب المرة دي حسابك عسير ؟ ماتغضبني زيادة منك وماتندمني اني جيت عشان اشوفك ، بس زياد ما كتر كلامو وماأضاف ولا كلمة من القالها وقف على حيلو وقال لي وسيم صحبك البتثقي فيهو دة هو السبب كشف البعمل فيهو لعبد الله كلو و اتفق معاهو عشان يتخلصوا مني هنا و كدة وسيم بحجر واحد اتخلص مني عشان ما اضرو و عشان ما أعرس حبيبتو ..
كتف يديني في البلد دي لأنو عارف ، مستحيل زول يقدر يساعدني فيها ، قلت ليهو انت عايز تخليني اكرهو انا عارفة مستحيل وسيم يأذي زول ، عايز تلصق فيهو تهمك الجيت بيها ؟ انت ...
طلع خلاني منفعلة براي في المكتب ، غضبت شديييد بس اتذكرت اني حكيت القصة كلها لوسيم و انه بعد عرف حصلت المشاكل دي ، يكون زياد عندو حق ؟يكون وسيم هو المجرم المفروض يتسلم للشرطة ؟ اكون انا بحمي في الغلطان و خليت العندو حق مرمي في زنزانة ظلم ؟ طلعت من القسم مليانة غضب و تشوش و حيرة و صداع متقل راسي ..
وصلت البيت متأخرة ،اي زول كان عايز يتكلم معاي وقفتو عند حدو بحجة بكرة ماصدقت دخلت غرفتي عشان اقفل الباب علي و بعد دشي و عطري، لسة الصداع كان عامل حفلة في راسي من كترت الامور الجاطت و بين الحقيقة و الكذب الما قادرة افرز بينهم ، مشيت المطبخ عملت كباية كبيرة قهوة تقيلة وبخور جاولي و جيت قعدت في الغرفة ، بعد راسي هدا شوية بديت اجمع المعلومات ، لحدي ما وسيم كان برة و لحدي ما جا وانا حكيت ليهو ! زياد ما اتكشفت حقيقتو ! و عبد الله ماكان جايب خبر عنو و كان خاتي في يدو كل معاملات الشركة بي ثقة؟
طيب وسيم لو كان هو شريك عبد الله ، وسيم وعبد الله بعرفوا بعض من متين ؟ و ليه كان مخطط معاهو يستلوا على البت الروسية وود عمها ؟
الموضوع كان كبير و الشربكة كتيرة ، بس بديت احس انو زياد المرة دي قال الحقيقة ، لكن عشان أتأكد منها لازم اعمل شنو ؟؟
خارج النص ، برأيك الحقيقة شكلها كيف ؟
