مر إسبوع و سماهر مختفية ومابترد على تلفوناتها لا هي و لا وسيم ، كنت عارفة إنهم بفتشوا على بتهم و بسألوا منها و الحبشية وبتاع الدكان وصفوني بالتفصيل ليهم بس ما متخيلين انه دي أطلع انا ، لأنه أساسا ماعارفين بالبحصل بي وراهم ، و جا الوقت إني أقابلهم و أواجههم بالحقيقة ، فمشيت لحدي باب بيتهم دقيت الجرس و فتح لي وسيم بلهفة وكأنه منتظر خبر من زول ، بعدو جات جارية سماهر زي المجنونة و كانت حالتها مذرية شديد و تحنن ، زادتهم الصدمة بي جيتي وماعرفوا ينطقوا ولا حرف بس أنا ماعندي وقت أضيعوا دخلت بدون ما زول يقول لي اتفضلي و أول ماقعدتا كانت جاية الحبشية تشوف منو في الباب ، بس اول ماشافت وشي بقت تكورك ماما دي البت وجات جارية مسكتني من بلوزتي نور وينها نور شلتيها انتي ، ضربتها بكل قوتي لي ورا و قلت ليها وسختيني يا مقرفة !
قلت لي وسيم تعال اقعد ياصحبي عايزة اقول ليك كلام ، كان فاتح خشمو ومهجوم وماعارف يعمل شنو ..
جا قعد وهو زاتو حالته كانت مذرية ؛ بعدها ناديت سماهر
( صحبتي واقفة في الباب مالك تعالي جلسي قبل ماتلم فيك كومة سكري توقعك ')
قعدت وهي ساكتة برضو ما سألتني غير نور وين ياسندس؟
قلت ليها زياد وين ؟
رفعت لي حاجبها وكانت ملياااانة غضب ..
قلت ليها بي جيتي دي حبيت اختصر كلام كتيييير كان حيتقال و حبيت اوري أصحابي الإتنين وشي الحقيقي و ما أدس عليهم زي ما هم دسوا علي وشوش المنافقين الشايفاها هسي دي ، بإختصار وسيم و إنتي عارفين كوووويس أنا شلت نور ليه ، وعارفين برضو إنه الحنية الجواي دي مستحيل تخليني أضر طفلة حلوة كدة زي نور ، المطلوب كالآتي
يا صاحب الشركة العظيمة إنت و شريكك في الجريمة تمشوا الصباح تتنازلوا عن القضية الرفعتوها ضد زياد ويطلع سالم من السجن و بدون اي قضاة و محاماة عشان القصة لو كبرت حيروحو فيها ناس كتار ، ولحدي الوقت داك نور في الحفظ والصون بعد ما اشوف زياد بخير ، حأسلمكم نور بألف خير ...
قمتا على حيلي و قلت لي وسيم لو حاولت تتذاكى وتعمل فيها شاطر وتهددني بالشرطة ، فالروس قاعدين ومنتظرين مني تلفون تمام ! ..
الساعة تسعة صباحا نتلاقى قدام المحكمة انا وانت و مرتك ..
وفعلا الصباح بدري كناا حضور هناك انا و زينة ،
عشان نستقبل زياد ، و طلع لينا بألف سلامة من السجن بعد ما اتنازل وسيم عن قضيتو و قال إنه الشيكات إتدفعت و إتسددت ، اتشطب البلاغ و طلع زياد من السجن بألف خير و سلامة ..
بس كنت عارفة إنه الروس ما حيخلوا زياد في حاله لو ما سلمهم وسيم وسماهر وعبد الله ، فكان لازم أعرف مصير نور من زياد و دة السؤال السألتو ليهو بعد طلع مباشرة من السجن نور حيحصل ليها شنو ؟
