ودعت هواك

٦

بسم الله قبل ما نبدا ..

الرواية دي قيد الكتابة يعني اول ما الكاتبة تنزل انا بانزل باذن الله تعالى .. 

فما تسالوا عن الباقي ..  

قراءة ممتعة 

ــــــــــــــــــــــــــــــــــــــــ

وصلت الشمالية لأهل أبوي و عماتي كنت بحبهم و بحترمهم لاننا بعاد من بعض ، تقريبا الحنية بتجي لمن تكون في مسافات كبيرة في العلاقات و بين الأهل ، كان عندي تلاتة اسابيع مفروض اقعد فيهم معاهم .. استقبلوني بحرارة شوق و لهفة و كانوا بيبكوا شديييد اول ما يشوفوني ، و تقريبا كل مرة بتذكروا اني البت الوحيدة لي ابوي بيقعدوا يبكوا و كأنوا هو إتوفى أمبارح ، بعد السلام و البكى بمشي ادخل حاجاتي و أفرغ شنطتي في دولابي بت عمتي ، الشمالية بلد جميلة جدا ❤ هواهم نقي جدا خالي من رطوبة الشقق و اجواء الدخاخين و ثاني اكسيد كربون المصانع ، هواء ببرودة مختلفة جدا .. 

تقريبا روحي بتتغير و ذهني بصفى بس في المنطقة دي ، ده غير الأكل البلدي و القراصة بي البلح و السمن البلدي و الحليب بعد المغرب بي الزنجبيل و الكركم ❤ كلها كانت عادات عند اهل ابوي ، بشوفوا اني جيت مسمرة و نحيفة فكانوا بسمعوني دايما وبعلي لي مالك؟ نشفانة و روحك مارقة ، ما بيأكلوك هناك ؟ سجمي مابتشربي حليب ؟ يابت اكلي القراصة دي ، ما تقولي لي بسمن ان شاء الله تبقي قدر الفيل ، هسي وينو شحمك و لحمك .. دي شنو الموية البتشربي فيها دي ؟ دي موية ديتوكس يا عمتي ، يابت بلا ديتوكس بلا كلوروكس معاك .. اوعاك من البهدلة .. يكون عشان كدة مافي رجال اتقدمو ليك ! نااان انتي ما كملاااانة من لحم الدنيا ، يتقدموا لي شنو بس ؟ يا عمتو استغفر الله 😒 يابت استغفري كويس ، شفتي اصبري لي بس لخالاتك الفقر ديل كان ما زفيتهم بالتلفون ، انتي زاتك بس حدك الجامعة تاني ما بشوفوك ولا بلمحوك .. يا عمتو في شنو هسي دخلهم شنو ؟ يا بت انتي ماشايفه روحك كملانة كيفن ! اكلي بلا رجيم بلا قرف معاك .. 

...

بعدي فترة النقاهة دي و بطلع منها سمينة كالعادة ، بحاول ما ازيد في الوزن بطلع الصباح اتمشى في مزرعة جد ابوي اسماعيل ، و بخيط المزرعة و برحع للبيت برجليني و بلقى حبوبة منتظراني بكباية كبيييييرة كلانة مديدة دخن بسمنة 💔 و لا كأني عملت حاجة ، عموما بتعدي اسابيعي معاهم بي ضحك و ونسة و حكايات لأبوي عادوها لي الف مرة بس كل مرة بسمع حكاوي حبوبة و كأنها اول مرة ، و بين شكل عمتي مع خالتي و بين اني بشبه ابوي ولا امي و بين اني اخلاقي و صفاتي بترجع لمنو ؟ ..

عموما بتعدي فترة كلهااا ، نقاشات و مكاوة و إلفة❤ و احضان كتيرة من اي زول في البيت ، عماتي و بناتهم و حبوبة و اعمامي .. و مرت جيرانا نفيسة كانت بتريدني شديييد عشان كانت بتحب ابوي زي اخوها ❤ العلاقات هناك مختلفة تماما عن العاصمة ، كنت بحس بيها عفوية لأبعد حد .. و بسيطة جدا و خالية من الكبرياء و الغرور و الافتراء المليانة بيهو علاقاتنا في الخرطوم ...