انتظرتا لحدي ما مرا اسبوع تاني عشان اقدر ازور زياد في السجن ، اول ماشفتو كان لسة في حالتو هزيل وضعيف وحالته بائسة شديد ، سلم علي بفتور و زهج من الدنيا قلت ليهو زياد انا جيت عشان اقول ليك اني مصدقاك واني حاقيف معاك لحدي ما تطلع ، قال لي والسبب الخلاك تصدقيني شنو ؟
قلت ليهو لأني بريدك ♡
سكت و عاين لي قال لي سامعك ياسندس ، قلت ليهو كل المطلوب منك تديني رقم لي احمد عشان اقدر اصل ليهو .. قال لي ماحتستفيدي شيء !
قلت ليهو ليه ؟
قال لي صحبك حابك الموضوع كوووويس ، و احمد مختفي من الشركة ما معروف حاصل عليهو شنو ؟
قلت ليهو زياد بس اديني عنوان لي احمد وانا بتصرف !
كان فاقد الأمل وقرفان من الدنيا و الفيها ، كتب لي الرقم والعنوان وطلع و انا بعدها ما اتخرتا بتاتا من دربي دة ومشيت للعنوان وفعلا ما لقيت احمد ولا لقيت اي اثر لي احمد ؟
ياربي عملو فيهو شنو ؟ و مشى وين ؟ و هو عارف بي انه زياد مسجون ولا لا ؟
اسبوعين عدوا زي الهوا و انا لسة بفتش على احمد في المواقع و في عناويين البيوت و بي الأرقام و مالقيت ولا اثر ، بديت اشك في اني ممكن احل القضية دي برااي ..
و انا ماكنت عايزة اشارك زول مشكلتي دي ، لكن استسلمتا خلاص وقررتا اكلم عمي بالحصل و بت خالتي البتعرف وسيم صاحبي ..
جمعتهم الاتنين المغرب في بيتنا الكبير ، بديت احكي القصة لي عمي و ليها و الاتنين كانوا اذان صااغية و مهتمين شديد .. .بعد خلصتا قلت لي عمي انا متأكدة جدا من انه زياد كلامو حقيقي و احساس كبير بيقول لي كدة ..
عمي قال لي الاحساس ما كل شيء ، الزول لازم مايمشي ورا تهيأت واحتمالات لكن طالما انه القضية دي معقدة كدة وغريبة شديد خلينا نسأل محامي و نستشيرو و نوكلو للقضية دي و البحصل اكيد حيحصل لي خير ..
بعدين الزول دة انا قلت ليك شكله ماغريب ؟
حسيت اني بعرفه او شكله مألوف من اول يوم شفتو ، لكن كونو يكذب علي في وشي دي حاجة غريبة برضو ؟
في احتمال انه يكون الراجل دة كذااب كبير وفي احتمال انه يكون صادق كبيير ، بس التهديدات المحاوطاهو خلتو يتصرف كدة ويكذب على الناس كلها عشان كل الناس تصدق قصتو الألفها عن اسمه ومكانته المستعارة ..
المشكلة التانية ياسندس ، الشرطة لو عرفت بقضية الروس دي حتبقى مشكلة عميييقة وكبيرة و دولية و استخبارات وغيرها ..
فإما نحافظ ونتكتم على القضية البين زياد و وسيم و نحلها بالسر بدون ما الشرطة تعرف الحقيقة وين !
و إلا لو بقت قضية و محامي ومحكمة ما حيطلع منها لا زياد و لا وسيم ولا اي زول من طرفهم ، قلت ليهو يكون دة سبب سكوت زياد في السجن للشهور الطويلة دي ؟
قال لي طبعا دة المبرر الوحيد ..
قلت ليهو طيب الحل شنو ؟
قاطعتني بت خالتي وقالت لي الحل انه نصل لي احمد او نصل للروس البتعامل معاهم زياد !
عمي قال ليها : ايووة ، دة الكلام المظبوط ..
