بسم الله قبل ما نبدا ..
الرواية دي قيد الكتابة يعني اول ما الكاتبة تنزل انا بانزل باذن الله تعالى ..
فما تسالوا عن الباقي ..
قراءة ممتعة
ــــــــــــــــــــــــــــــــــــــــ
قاعدة براي مع نفسي بفكر معقولة زول بسماحتو و مكانتو و أسرتو دي يعاين لي أنا ؟ دايما كنت واثقة من نفسي لكن المرة دي الزول دة صعب الوصول إليه حقاً يعني .. بقول لي روحي مافي داعي تنجذبي ليهو و تورطي نفسك و تتعلقي بيهو احسن من هسي تتفكفكي و تهربي بدل ما تدخلي نفسك في حوارات و مشاكل نفسية .. هسي البعد ساهل يا سندس ، كلامي دة كان مع روحي و على أساس كلامي مع روحي قررت إني ما أرد على أي تلفون من عز الدين تاني ..
...
يوم الخميس و الدنيا مطرت الصباح و قاعدة أنا و سماهر في المحل ، بنتشاور هل نجيب سمك للفطور و لا لأ ، كنا بنتشاكل بين السمك و الأقاشي .. و أنا بحبهم الاتنين لكن الجو كان مغري للأقاشي و هي بتقول سمك دخل علينا عز الدين و هو بفتح في الباب أنا شايف الجو جو سمك فعلاً و عشان كدة جبتو للفطور ، كان اخر مرة جا فيها يوم جاب لي التلفون و عرف المحل و ما لاقيتو تاني و لا اتصل .. كانت مفاجأة انو يجي و فجأة و في الجو السمح دة ! وقفت سماهر مشت عليهو للباب سلمت ورحبت بيهو اما انا كنت مخلوعة في جيتو دي و سبحااااان الله كل الأيام بكون قاااشرة و سمحة و مرتبة إلا اليوم دة عشان كانت في مطرة من الصباح جيت لابسة شبشب البيت حقي و عباية سوداء مكرفسة و وشي زي ما الله خلقو ، الحمد لله انو ملامحي سمحة و الا كنت حاتدردق في الأرض من الزعلة ، ماعرفت اقيف كيف و لا أسلم و لا أهرب و لا أسوي شنو !
انتظرت سماهر لمن دخلتو جوة و سلمت عليهو من مكاني .. كانت التربيزة المكتبية مغطية العباية من تحت و ظاهر مني جزء بسيط 😂😂 عاين لي وضحك قلت ليهو مالك ؟ قال لي مالاحظت انك قصيرة شديد ، قلت ليهو انا ماقصيرة🤨 التربيزة طويلة و مرفوعة و انت زاتك طويل شديد ..
حتشوف اي بت قصيرة شديد ، و حسيت اني انفعلت طوالي لاني زعلانة من بهدلتي😂 لقيت سماهر بهناك بتحمر لي عشان اسكت ..
قلت ليهو سبحان الله اتذكرتنا من وين الليلة ؟
كان بعاين لي متحير ، دي نفس البت الهااادئة !
ولا أنا ما كنت ملاحظ ليها ؟ و لا هي يادوب بتوريني في شخصيتها ؟ و لا في شنو ياربي !
قلت ليهو بتعاين لي كتير ليه ؟
قال لي ما في شي والله ، انتي مالك ؟ أنا مضايقك !
قلت ليهو لا ياخ ما مضايقني ، اسفة لو اديتك احساس بي كدة انا اساسا كدة يعني 😊 ..
