بسم الله قبل ما نبدا ..
الرواية دي قيد الكتابة يعني اول ما الكاتبة تنزل انا بانزل باذن الله تعالى ..
فما تسالوا عن الباقي ..
قراءة ممتعة
ــــــــــــــــــــــــــــــــــــــــ
لهفة اللقاء الأول بين إتنين بتبقى ذكرى حلوة شديد ليك ، بتتذكريها كل ما يحصل نقاش بينكم او تنفصلوا أو تطلقوا ، اللحظة الأولى بتاعت المقابلة الأولية دي لحظة بإعتبارها تاريخية في حياة البنت ، بتكون عايزة تظهر إنها أنثى عادية جدا ، لكن جواها المحقق الذكي و المنتبه لأقل التفاصيل ، يعني ممكن من قعدة بسييطة ما تمت خمسة دقايق تكون عرفت فيها حاجات عن الشاب و غالبا بتكون معلوماتها دي حقيقية بنسبة ٩٩ في المية ، أول ما جا داخل عز الدين عاينت ليهو مرة وااااحدة في شكلو العام لكن وحات الله النظرة كانت كاافية جدا إنها توريني ، عز الدين زول نضييف جدا و ده ظاهر من جزمتو لأنها ما اتوسخت بطريقة مشيتو إذن هو برضو بمشي مشية صحييحة و ما بكش رجلينو ، عز الدين زول رسمي شوية و ده ظاهر من طريقة لبسو للقميص ، و زول بحب يعتني بي نفسو لأنو ملابسو نضيييفة جدا و رغم انو طلع بيها من الصباح للشغل ، و واضح جدا انو زول بتاع مشاغلات 😂😂 او عينو زايغه ...
سلم علينا انا و سماهر و عاين لي اي وحدة فينا نظرة شاااملة كدة ، و قعد في الكرسي قلت ليهو معليش عذبتك في السخانة دي ، قال لي ولا يهمك ياخ العفو مافي عذاب ولا حاجة كلها ربع ساعة بالعربية و مافي اي حر .. يعني ما تتحسسي ساي ..
سماهر بي تحت كانت بتقول لي ، سندس عندو عربية وحااات الله تفوتي الولد السممح ده أنا اخنقك ..
و انا بعفص فيها بي تحت و بقول ليها انطمي ، الله يسد حلقك يا فقر ..
هو كان بعاين و ما فاهم ديل بطنطنو في شنو 😂 قام سألني انتي مافقدتي تلفونك في يومها ؟
قلت ليهو فقدتو والله لكن كنت قايلاهو اتسرق ، ما قايلاك لميت فيهو .. قال لي معليش اتلخمت زاتي مع ولدك !! سماهر نطت ليهو ولدها منو 😳 سندس ما متزوجة يا أستاذ ده ولد بت خالتها 😌 تقريبا هو كان داير يعرف الولد ولد منو لكن سماهر ما قصرت و خوفها من انو العريس يطفش خلاها تسل حلقومها بصوت عالي😂😂 حمرت ليها و ما سكتت ، قالت ليهو سندس دي صغيرة ياخ حرام عليك ياااا...
قال ليها عز الدين يا أستاذة ، خلفت ليهو رجلها و قالت ليهو شفت يا عز الدين البت دي صغييييرة قال ليها عارف والله و ده ظاهر جدا من وشها 😂😂 البمنع شنو انو تكون ام صغيرة ! بعدين انا لمن شفتها بتبكي عشان بحلقوا ليهو ، افتكرتها ام الطفل والله ..
قالت ليهو لا هي حسااااسة كده اساسا ، و أنا اشيل و احمر لي سماهر و هي تزوغ عينها مني ، واصلت كلامها و فتت ليهو اي شيء ... قالت ليهو هي بتقرا في جامعة الخرطوم إدارة اعمال ، و هسي كالعادة هم مقفلين ليهم قريب للسنة مما قفلت الجامعة انا قلت ليها تجي تشتغل هنا احسن ليها بدل قعاد البيت و خالتها الفقر النقناااقة ..
