احساس انك تكون مربط من كل الزوايا وماعارف تتصرف كيف وتحل مشكلتك كيف ؟
رغم اني مابعرف زياد من سنين طويلة لكن عندي احساس أمومة اتجاهه ورغم اني ماعارفة الصدق من الكذب في كلامه لكن قلبي بقول لي انه مظلوم و انه ماعنده غيرك ياسندس..
بديت افتش على احمد تاني و مشيت للموقع الكتبه لي زياد البيت الساكن فيهو احمد كان ايجار و انا لمن مشيت اول مرة لقيت البيت مقفل و مشيت تالت ورابع وبرضو مافي اي أمل منو ! ..
لكن المرة دي لمن مشيت ولقيتو مقفول ، قعدتا شوية في مصطبة الدكان المواجهة البيت و كنت شايلة هم كبير انه احمد خلاص اختفى للأبد ..
وانا بعاين للبيت بحسرة ، شفتا راجل عجوز ومعاهو شاف صغير عمره زي ١٠ سنين كدة وماسك العجوز ، فتحوا البيت ودخلوا ..
اول ماشفتهم دخلوا البيت قطعت الظلط بسرعة وجريت ناحية البيت وقعدتا ادق في باب الشارع شديد لمن جا الراجل وفتحو لي وقال لي خير يابتي !!
قلت ليهو اسفة ياحاج ضربتا الباب شديد لكن مستعجلة للسؤال ، قال لي اتفضلي ؟
قلت ليهو بسأل عن زول اسمه احمد كان ساكن في البيت دة ! وينو ؟ مشى وين؟
قال لي ولدنا احمد يحليلو سافر يابتي ..
قلت ليهو ساافر؟؟
قال لي ايوة دفع اخر ايجار لشهر ٦ الفات و ودعنا انا والحاجة وعصومي وقال عندو شغل برة السودان ..
قلت ليهو وما وراك راجع متين؟
قال لي للأسف ماوراني والله لكن قال لي اول ما أرجع السودان بديك خبر تاني ياحاج ..
قلت ليهو ايوااا .. نزلتا راسي زعلانة والحاج كان بعاين لي مستغرب وسالني في حاجة يابتي؟ انتي قريبتو ؟
قلت ليهو لااا لاا زميلتو في الشغل و قلتا أسأل عنه بس ..
قال لي والله ليهو شهرين من سافر وانا الليلة جيت افقد البيت تاني عشان في ناس اجروهو وعايزين نصينو ..
قلت ليهو طيب شكرا ياحاج كتر خيرك افيدتني عشان ما اتعب ساي ..
مشيت وانا مكسورة ماعارفة احمد سافر بالجد ولا حصل شنو؟
هل اتهدد بالموت ؟ و لا خاف على نفسه وخلى صحبه براهو يشيل الهم ؟
يحليلك يا زياد من كل ناحية في خيانة و من كل اتجاه في غدر والله .. خلاص راسي كبس ماعارفة اتصرف كيف بعد ما الحل القريب اتقفل في وشي ، باقي الروس ؟
طيب ديل اصعب خيار ، ديل حأصل ليهم كيف ؟
مافي حل غير اني اكلم زياد بالحاصل ..
انتظرتا زيارتو تاني ومشيت السجن قابلتو هناك وكان نحفان زيادة بس شكلو نفسياته احسن !
سألته انت كيفك ؟ حاصل شنو هنا ؟
قال لي بخير والله يا سندس اموري طيبة والله ..
قلت ليهو الحلق ليك منو ؟
انت ولا بالغصب بحلقوا ليكم ؟
ضحك وقال لي بحلقوا لينا وعموما اصل الجمعة كانت والصلاة لازم الواحد يجدد شكله ويقابل ربه بنفس طيبة ، قلت ليهو انت حاسي بروحك احسن يعني ؟
قال لي الصلاة بترد الروح وبتجددها يا سندس ..
قلت ليهو الحمد لله جيتك بعد الصلاة لأنه عندي خبر حزين ، قال لي خير قولي ؟
قلت ليهو سيد البيت قال احمد صحبك سافر واختفى من البلد يا زياد ..
ابتسم وقال لي وانتي مهمومة كدة مالك ؟
ملامحك متغيرة و شايلة الهم في راسك عشاني و لمن نحفتي ، ليه بتعملي كدة؟
قلت ليهو لأني برييدك يازياد انت ليه ماعايز تفهم ياخ ..
وما استحملتا اتم كلامي وبكيت لإني زعلانة من التقييد وحاسة الابواب اتقفلت في وشنا وهو لسة بسأل عشان يتاكد اني بريدو ولا لأ ؟
قال لي :
عارفة ليه ماخايف من بكرة يجي ولا خايف من مصيري يكون شنو ، لأنه من عرفتك كنتي بالنسبة لي أم ما حبيبة
وللآن كل ما تظهري لي حنانك دة بحس إنه إنتي أمي مسؤولة عن سعادتي وراحتي ، في الحقيقة إنتي مصدر السعادة والراحة والآمان ..
عارفة لمن قمتا صليت قبيل دعيت بعد سلمتا إنه ربنا مايوريني فيك سوء ولا شر ولا أذى وما يحملني فوق طاقتي ..
دعيت إنه ربنا يحفظ مصدر الطاقة العندي دة واللي هو إنتي ..
يا قريبة الروح و يا شبه القمر ..
بكيت زيااادة بعد سمعتا كلام زياد دة ، لكن حسيت بعدها بالمسؤولية اكتر اتجاهو ..
طلعتا من القسم مبسوطة ولا كأني شفتا سجيني ..
كأني شفتا حٌريتي جوا السجن دة ...
