مرة اسبوع وانا من التفكير زهجتا شديد ، قلت امشي لي سماهر اتونس وافضفض معاها شوية و اول ماوصلتا المحل لقيت عربية وسيم واقفة برة !
استغربتا واندهشتا جدا ؟
وسيم الجابو هنا شنو وبعرف سماهر من وين ؟
هل جا عشان يشوفني ولا بعرف سماهر وانا ماعارفة ؟
ماقدرت ادخل المحل وانتظرتا برة لحدي ما جا طالع وسيم من المحل ودور عربيته وفاات ..
بعدها دخلتا المحل بعد ربع ساعة كدة ، لمن سلمتا على سماهر حسيت بيها مندهشة و متوترة من شوفتي ، قعدتا في الكرسي و قلتا ليها انتي اختفيتي كدة وين ! لا بتسألي لا بترسلي ولا اااي شيء ؟
مشغولو بشنو يابت !
ضحكت وقالت لي جري الشغل ياسندس براك عارفاهو ، اها انتي اخبارك شنو والجديد ؟ و زياد حصل شنو في قضيته ؟
عاينتا ليها وسرحتا واتذكرتا انه سماهر هي الورتني انه زياد مسجون ، بس هي عرفت كيف ؟
بقت بتناديني سندس سندس
سرحتي وين بتكلم معاك يابت !!
قلت ليها سماهر انا مابعرف شيء عنه وماعندي دخل فيهو بعد ما طردني لمن مشيت ازورو تاني خلاص ماعندي ليهو حاجة ومابهمني البحصل عليهو شنو ..
قالت لي سندس زياد ماعندو غيرك !!
قلتا ليها عندو والله وملااان بناسو والا ما كان طردني بكل بساطة كدة ولا اداني قيمة حتى لمن مشيت ليهو ! ..
قالت لي والله ماعارفة اقول ليك شنو انتي هسي قررتي شنو يعني ؟
قلت ليها والله حامشي بمشورة عمي وبت خالتي ، اخدي البريدك ما البتريديهو
قالت لي قصدك شنو ؟
قلت ليها وسيم صحبي وسنيري و بيعرف اسرتنا وزول محترم و ود ناس واخلاقه عاالية جدا ..
اضيع زول زي دة ليه وخصوصا اذا كان بحبني ؟
قالت لي وسيم بحبك ؟
قلت ليها من انا في الجامعة وكنت عارفاهو بريدني بس انا كنت بتجاهله كتير وبعتبرو اخوي لكن صراحة كدة بديت اميل ليهو ياسماهر
خصوصا لمن اشوف اهتمامه الكبير دة وانه ما عايز يفرط فيني ومتحملني ومنتظرني السنين دي عشان اوافق ..
عاينت لي باستغراب وقالت لي والله انا مابعرف وسيم صحبك دة معرفة شخصية لكن ياهو من كلامك عنه واضح انه دايرك .. .قلتا ليها ان شاء الله يوم بلاقيك بيهو عشان تعرفيهو وتشوفي اخلاقه وطيبته .. .قالت لي طوالي والله ياسندس و لو هو زي مابتقولي طواالي ماتترددي عرس طوالي خلاص زاتو نحنا كفانا عزيل و ارتباطات طويلة ..
قلت ليها والله انا لي كم بفكر فيهو لكن ماعارفة اصارحه كيف ولا اعمل شنو ، هو زمان كان طرح لي حبو وتاني ما اتكلمنا في الموضوع دة بعد ماعرف اني بعتبرو اخوي لكن هسي ماعارفة الوضع يكون كيف ؟
اصارحه كيف ولا اعمل شنو ؟
سماهر قالت لي حاولي لمحي ليهو بالكلام انك اتغشيتي في زياد وانه انتي تعبتي من الارتباطات وكدة ونفسك تعرسي وتبني بيتك و تعيشي مستقرة المهم يعني جيبي سيرة انك ختيتي موضوع العرس في راسك و هو براهو حيفتح موضوعه وحيقول ليك انا جاهز ..
قلت ليها تفتكري كدة؟
قالت لي طبعا اساسا الدايرك دة ما بنساك ابدا ابدا والله ..
ودعتها وبعدها قمتا على بيتنا بس للآن مافاهمة سماهر كذبت علي ليه ماقالت لي انه وسيم جا المحل ولاقاها ..
دة بيفسر حاجة وحدة انها بتعرف وسيم ، عشان كدة انا وريتها بفهمي اتجاه وسيم عشان اعرف قصتهم شنو ؟
وفعلا ظني ماخاب بعد سمعتا كلامها وبديت المح لي وسيم بالارتباط طوالي اتجاوب معاي وبدا يذكرني بي ايام الجامعة وانو كيف كان معجب بي من اول مرة وكان نفسه يخطبني من الوقت داك و اتماشينا في القصة دي لحدي نص الليل ونسة بالتلفون ولمن قفل مني ..
اتصل علي رقم غريب فتحت الخط سمعت صوت بت بتقول لي انتي سندس؟
قلت ليها ايوة سندس انتي منو ؟
قالت لي ماضروري تعرفي منو على التلفون خلينا نتلاقى احسن !
قلت ليها لو ماعرفت انتي منو ما حلاقيك ..
قالت لي انتي حبيبة زياد ♡
احسن نتلاقى وش لي وش
صدقيني ماحتندمي ..
وقفلت الخط ورسلت لي رسالة فيها مكان نتلاقى فيهو
وهو كان برج الاتصالات ..
