الرابط الوحيد الطلعتا بيهو من القسم ، إنه اي شيء حصل لزياد حصل بعد ما انا حكيت لي وسيم القصة ، احتمال كبير انه اي كلمة قالها زياد هي الحقيقة المرة دي
أتاكد كيف و من وين أبدا و طرف الخيط القاهو وين ؟
راسي كان ضارب شديد وكبير شديد من التفكير الكتير و الهم الكبير ، الحاجة الوحيدة القررتا أعملها إني أشارك سماهر صحبتي بي الفي راسي دة ..
عديت يومين مليانين تفكير عميق ، بربط في الكلام بتاع زياد وكلام وسيم و بحاول اصل لنقطة مشركة ، بعد اليومين ديل مشيت لسماهر في المحل ..
بعد سلمتا عليها واخدتا قعدة بسيطة معاها سألتني زرتي زياد؟
قلت ليها ايوة وحالته كانت صعبة شديد اتخيلي لمن بقى ضعييييف وما بتقااابل ، ما بتتخيلي نفسياته زي الواطة كيف ..
قالت لي وقال ليك شنو ؟ قلت ليها والله ما كتر كلامو معاي كان بس برد باختصار لكن قال كلام غرييب مافهمتو جد جد و لا اتهام منو ..
قالت لي بحماس شديد ، قال شنو عليك الله ؟
قلت ليها : وسيم هو السبب في دخوله السجن ، قالت لي كيف يعني ! الدخل وسيم في حياة زياد شنو هسي؟
اتشاكلو يعني ولا حصلت حاجة بينهم ؟ قلت ليها قصة طويلة مابقدر اقولها ليك هسي ..
عاينت لي مستغربة وسكتت ، كنت زي الزول الرايحة منو حاجة وباكل في اصابعي وبفكر في راسي ، بعد شوية اتنفضتا وقمتا على حيلي قلت لي سماهر انا لازم اشوف وسيم هسي ..
طلعت من المحل مستعجلة و ضربت ليهو تلفون و اتفقتا الاقيهو جنب بيتنا في مكان الايسكريم ، و في عز النهار والشمس الحارة مشيت ولاقيتو وقعدنا قال لي حيجيك وجع حلق يابت ، في زول بياكل ايسكريم في السخااانة الشديدة دي ؟
قلت ليهو لاني زهجانة والله ياوسيم شديد ، قال لي خير احكي لي !
قلت ليهو عشان مالاقية شغل و كدة و بديت امل من قعدت البيت ، ضحك وقال لي يعني ما عشان حاجة تانية شاغلة تفكيرك ؟
قلت ليهو حاجة زي شنو ؟
قال لي زي حبيب القلب ، قلت ليهو اوعك تجيب لي سيرتو تاني
قال لي مالك خير ؟
حصل شنو بيناتكم ؟
قلت ليهو اتخيل زرتو في السجن طردني ؟
قال لي هو مسجون كمان ؟
قلت ليهو والله يا وسيم ماكنت عارفة عنو اي شيء لحدي ما زرتا سماهر و حكت لي الحصل و قالت انه متهمينو في سرقة و دخل السجن بالسبب دة وانا بكل حسن نية مشيت ازورو ، قعد يقول لي جيتي ليه و انتي وصحبك السبب و صحبك وسيم عمل كدة فيني عشان عايزك و كلام فارغ كتير و ندمتا اني شفتو ..
قال لي وسيم : دة كلام شنو ؟ الراجل دة شكلو ماطبيعي ، هسي الدخلني شنو في القصة دي و لا هو بغير عليك و ماعايز يشوف جنبك سند ؟
سندس الزول دة اختيهو خلاص انا كنت حاسي من الاول انه زول ما تمام ، وهسي اتاكدتا تماما انه ما زول طبيعي كمان ..
قلت ليهو والله انا كل مرة بتأكد بسبب كلامك ياوسيم ♡
...
اديت وسيم كل الأريحية اني مصدقة كلامه وحاولتا اقنعه اني شلتا زياد من راسي ،
الخطوة الأولى البديتها إني ما قلتا انه زياد اتهم وسيم بقصة الروس ، والحاجة البقيت شبه متأكدة منها انه وسيم ما كان بيعرف شكل زياد ..
واتوصلتا للحقيقة دي بعد الحصل
( لمن شكيت لي وسيم عن زياد ، وسيم يادوب عرف انه زياد دة الزول البفتش عنهم هو وعبد الله ، واستعجل وعمل خخطة هو وعبد الله اتخلصوا فيها من زياد ، لكن الخيط التاني الوصلتا ليهو انه وسيم ما بيعرف احمد ولا شكل احمد صاحب زياد ودي خطوة مهمة جدا ♡
احمد حاليا قاعد برة السجن ، لو كان بيعرفو كان زمان هو وزياد في السجن سوا ،
اذن وسيم مستغفلني لسه !!
..
بعد التفكير الكتير الفي دماغي وانا بعاين ليهو ، اخدتا لقمة من الايسكريم ورجعتا لي ورا و اتنهدتا و كأني بديت رحلة البحث و كأني مسكتا طرف الخيط .. بقيت متأكدة انه وسيم مستغفلني و انه ما عارف الفي راسي شنو و من مكان الايسكريم بديت أفتش عن احمد صاحب زياد ..
