MY LOVELY LIAR (Completed)

MY LOVELY LIAR_10

Part-10

ခုတလောရှောင်ကျန့်က အပြင်သွားကြဖို့ချိန်းတိုင်း ရိပေါ်ကိုခေါ်လို့မရတာကြောင့် သုံးယောက်သားအပြင်မသွားဖြစ်ခဲ့ကြ။ မေဖန်းက အတင်းပူဆာပြီး နှစ်ယောက်သားသွားရင် ရောက်နိုင်ပေမဲ့ ရိပေါ်ရဲ့စိတ်ကိုထပ်မဆွချင်တာမို့ မသွားဖို့သာဆုံးဖြတ်ချက်ချမိသည်။

ဟိုတလောက သင်တန်းမှာဖြစ်ကြတဲ့ ရိပေါ်နဲ့ရှောင်ကျန့်ရဲ့အခြေအနေကလဲ မေဖန်းနားထဲပြန်ရောက်တာမို့ မေဖန်းကကြား၀င်ရသူပီပီစိတ်ဆင်းရဲနေခဲ့ရသည်။ တကယ်ဆိုသူတို့နှစ်ယောက်ကအဆင်ပြေရမယ့်လူတွေကို မေဖန်းကြား၀င်နေလို့ ပြဿနာတက်ရသလို ခံစားနေရသည်။

ပြီးတော့ သူတို့နှစ်ယောက်ကိုပြန်အဆင်ပြေချင်လှပြီ။ မညာစတမ်း၀န်ခံရရင် ရိပေါ်မပါလို့ အကို့ကိုမတွေ့ဘဲ သည်းခံနေရပေမယ့် မေဖန်းအကို့ကိုလွမ်းလှပြီ။ နှစ်ယောက်သားကို ဒီထက်အချိန်မဆွဲဘဲ အဆင်ပြေစေချင်ပြီ။

အဆင်ပြေမယ့်နည်းကိုစဉ်းစားပြန်တော့လဲ ခေါင်းထဲ သရဲအိမ်နည်းတူ နည်းလမ်းတခုထပ်ပေါ်လာမိပြန်သည်။ အစက သက်တောင့်သက်သာမရှိလှသော သူတို့နှစ်ယောက်ကို မေဖန်းကဘဲ အဲ့နည်းနဲ့အဆင်ပြေအောင်လုပ်ပေးခဲ့ရတာမို့ ဒီနည်းကလဲနောက်တခေါက်အတွက် အသုံး၀င်မည်ဟုယုံကြည်နေမိသည်။
...........................................................................

သင်တန်းမှာပြဿနာတက်ပြီးကတည်းက ရှောင်ကျန့်အသိစိတ်က ရိပေါ်ကိုမတွေ့ချင်တော့ပေမယ့် မသိစိတ်‌ကပြောင်းပြန်ခံစားနေရတာကိုတော့ ရှောင်ကျန့်က မသိကျွမ်းကျွံပြုထားခဲ့သည်။

ပိတ်ရက်တိုင်းအစဉ်လာမပြတ် မေဖန်းကိုအပြင်ခေါ်နေရပေမဲ့ ရိပေါ်မပါလို့မလိုက်ဘူး ဟုငြင်းသောမေဖန်းကိုတော့ ရှောင်ကျန့်ကျေးဇူးတင်မိပါသည်။ သူလဲ ရိပေါ်မပါဘဲသွားမိလို့ အဲ့နေ့ကရိပေါ်ခံစားလိုက်ရတဲ့နာကျင်မှုကို ရိပေါ်ကိုထပ်မခံစားစေချင်။

ရင်ထဲမှာ ရှုပ်ထွေးလှသောခံစားချက်တွေကို ဒီအတိုင်းပစ်ထားခဲ့တာ တော်တော်ကြာနေပြီ။ ဖြေရှင်းရင် ရလာမဲ့အဖြေကို ရင်မဆိုင်ချင်။ သူ့လိုကုမ္ပဏီတစ်ခုကို အုပ်ချုပ်နေရသည့်အကြီးအကဲဘ၀မှာ ဒီလိုလွဲချော်လို့မဖြစ်လို့ စိတ်ကိုတင်းခံထားရသည်။