MY LOVELY LIAR (Completed)

MY LOVELY LIAR_13

Part-13

ဓာတ်ပုံတွေဘက် အကို့ရဲ့ခြေလှမ်းတွေရောက်သွားချိန်မှာတော့ မေဖန်းရဲ့ထိတ်လန့်မှုတွေက အတိုင်းအဆမရှိ တိုးလာခဲ့ရသည်။ ပြေးသွားပြီး မကြည့်နဲ့လို့ တားလို့ရတဲ့အခြေအနေလဲမဟုတ်တော့တာကြောင့် ဖြစ်သမျှအကြောင်းကို ရင်ဆိုင်ရတော့မယ်လို့တွေးရင်း ၀တ်ထားသောဂါ၀န်စကို ကျစ်ကျစ်ပါအောင်ဆုပ်ထားမိသည်။

ဗလောင်ဆူနေသောရင်နှင့်အတူ ဆုတောင်းသံတွေ သောသောညံအောင်ရေရွတ်နေမိပေမဲ့ မေဖန်းရဲ့ဆုတောင်းတွေဟာ မျက်ကွယ်ပြုခြင်းခံလိုက်ရပြန်တယ်။ အကို့ရဲ့ကျုံ့၀င်သွားသော မျက်ခုံးလေးတွေရဲ့နောက်မှာ အကိုလှမ်းယူလိုက်တာက မေဖန်းရဲ့မိသားစုဓာတ်ပုံ။

အကိုက တစုံတရာကိုအပြင်းအထန်စဉ်းစားနေခိုက် မေဖန်းကလဲ ကိုယ့်ကိုကိုယ်ရင်ဆိုင်နိုင်ဖို့ကို အပြင်းအထန်တွန်းအားပေးနေရသည်။ ဒါပေမဲ့အကိုက မေဖန်းကိုလှည့်ကြည့်ချိန်မှာတော့ အကို့ရဲ့မျက်နှာလေးက မေဖန်းရဲ့မြင်ကွင်းတွေကြားမှာ ဝေဝါးနေခဲ့ပြီ။

"မေဖန်း"
"......."
"မေဖန်း ဒါဘယ်သူပုံလဲ မေဖန်းမလား"

အကိုက ဓာတ်ပုံကိုကိုင်ရင်း မေဖန်းဆီဦးတည်လာခိုက် မေဖန်းရဲ့ယုံကြည်မှုတွေကလဲ တဝုန်းဝုန်းလဲပြိုနေခဲ့လေပြီ။

"မေဖန်း အကိုမေးတာဖြေစမ်းပါ"

တိတ်ဆိတ်စွာ မျက်ရည်တွေသာ တွေတွေကျနေသောမေဖန်းကိုကြည့်ရင်း ရှောင်ကျန့်စိတ်တွေပိုတင်းကြပ်လာမိရသည်။ ရှောင်ကျန့်က မေဖန်းရဲ့လက်မောင်းတွေကို ဖမ်းဆုပ်ကာ လှုပ်ရမ်းရင်းမှ

"ပြောစမ်းပါ မေဖန်းရ ဖြေစမ်းပါ"
"အဲ့ အဲ့တာ မေဖန်းပုံပါ"

"ဒါပေမဲ့ ဒါအကိုတွေ့ခဲ့တဲ့မေဖန်း ငယ်ငယ်ကရုပ်မှမဟုတ်တာ"
"မေ မေဖန်း တောင်းပန်ပါတယ် အကိုရယ် မေဖန်းကိုခွင့်လွှတ်ပါနော်"

ရုတ်တရက်လက်ဖဝါးလေးနှစ်ခုကို ကပ်ရင်းလက်အုပ်ချီဟန်ဖြင့် တုန်ရီစွာတောင်းပန်နေသော မေဖန်းကိုကြည့်ရင်း ရှောင်ကျန့်သနားရမယ့်အစား ဒေါသတွေသာလှိုက်တက်လာခဲ့ရသည်။