MY LOVELY LIAR (Completed)

MY LOVELY LIAR_16

Part-16

လက်ထဲကဖုန်းလေးကိုကျစ်ကျစ်ပါအောင်ဆုပ်ကိုင်ထားရင်း ကားဆီသို့ပြေးလာခိုက်တွင် အပြင်တွင်ရှိနေသောချမ်းအေးမှုက ညအိပ်၀တ်စုံပါးပါးလေးထဲသို့ စိမ့်ခနဲရိုက်ခတ်သည်။

ဒါပေမဲ့ ဒီချမ်းအေးမှုကိုဂရုမစိုက်ချင်။ သ၀န်တိုမှုတွေက လှိုက်တက်ကာပူလောင်နေခဲ့ရပြီမို့။

ကားကိုတရကြမ်းမောင်းနှင်လာခိုက် သူတစ်ယောက်အတွက်သာ နှလုံးသားတခုလုံးပေးအပ်ထားတာပါ ဆိုသောရိပေါ်စကားကိုပြန်ကြားယောင်လာရသည်။ အပြောင်းအလဲမြန်တဲ့လူ။

ဒေါသအဟုန်ဖြင့် ကားကို‌တောက်လျှောက်မောင်းလာမိရင်း ရိပေါ်တို့တိုက်ရောက်ချိန်မှာတော့ စိတ်ငြိမ်လာရင်းမှ အတွေးမျိုးစုံခေါင်းထဲ၀င်ရောက်လာရတော့သည်။

ဘာလုပ်မှာလဲ ရှောင်ကျန့်။ မင်းသူ့အခန်းဆီသွားပြီး ဘာပြောမှာလဲ။ မင်းမှာသူ့ကိုရန်တွေ့ပိုင်ခွင့်ရှိလို့လား။ မင်းကသူ့ချစ်သူမှမဟုတ်တာ။ ပြီး‌တော့ ပြီးတော့။

ဟော့ပေါ့ဆိုင်မှာ သူ့ကိုကြည့်‌သွားသော ရိပေါ်ရဲ့မျက်လုံးစိမ်းစိမ်းတွေကို ပြန်မြင်ယောင်လာမိသည်။

"မင်း ငါ့ကိုချစ်သေးရဲ့လား ရိပေါ်"
...........................................................................

ကုတင်ပေါ်မှာလူးလိမ့်ရင်းမှ ဘယ်လိုမှအိပ်မပျော်တာမို့ ပြတင်းပေါက်ဘက်သို့ ရိပေါ်ထထွက်လာမိသည်။ ကြယ်တွေကိုငေးမောကြည့်ရမလား ရှောင်ကျန့် မင်းမျက်နှာလေးကို ငါအမြဲကြည့်နေခဲ့ရသလိုလေ။

ပြတင်းမှန်ကိုဖွင့်ဖို့ လက်လှမ်းမိခိုက် တစုံတခုကညို့ငင်ခံရသလို ရိပေါ်မျက်လုံးတွေက တိုက်ရှေ့ကားပါကင်ဆီသို့အကြည့်ရောက်မိသည်။

ကားပါကင်နားမှာ ညအိပ်၀တ်စုံအပြာစင်းကြားလေး၀တ်ထားသောဖြူလျလျကောင်လေးတစ်ယောက်။ ဖုန်းလေးကိုကြည့်လိုက်၊ လက်ကလေးတွေကို ကိုက်လိုက်နဲ့ အငြိမ်မရစွာ ကားဘေးမှာ ခေါက်တုံ့ခေါက်ပြန်လျှောက်နေလေသည်။

"ဟင်"

ဝေးလှတာမို့ သေချာစူးစိုက်ကြည့်ရင်း မျက်နှာပုံဖော်ကြည့်တော့ ဟုတ်ပါတယ်။ သူ့ကလေးမှ သူ့ကလေးအစစ်။ အပြင်မှာ ခိုက်ခိုက်တုန်အောင်အေးနေနိုင်တာကို ဒီအချိန်ကြီး ညအိပ်၀တ်စုံပါးပါးနဲ့ မင်းဘာတွေလုပ်ချင်နေတာလဲ ရှောင်ကျန့်။