✨ប្រពន្ធឆ្នាស់💕(Completed)

ភាគទី៥ : ដេកក្រៅបន្ទប់

រឿង : ប្រពន្ធឆ្នាស់

ភាគទី៥ : ដេកក្រៅបន្ទប់

Enjoy Your Reading📖💕

________________

[.....]

   
          បន្ទាប់ពីចាកចេញពីហាងកាហ្វេហើយអីុបូក៏បានត្រឡប់ទៅក្រុមហ៊ុនវិញ រហូតដល់ពេលល្ងាចទើបត្រឡប់មកផ្ទះ។ នេះម៉ោង៩យប់ទៅហើយ អីុបូនៅអង្គុយនឹងកៅអីក្នុងបន្ទប់ធ្វើការក្នុងផ្ទះរបស់នាយ ដៃកាន់រូបថតពីរសន្លឹកដែលរើសបានពីកាបូបរបស់តាន់បេ ផ្ដោតកែវភ្នែកសំឡឹងមើលវាយ៉ាងយកចិត្តទុកដាក់ បន្តិចក្រោយមកនាយក៏ជ្រួញចញ្ចើម មានអារម្មណ៍ថាគ្រប់ពេលដែលនាយសំឡឹងមើលទៅរូបថតមនុស្សស្រីវ័យក្មេងនោះ គេតែងតែទទួលដឹងថា គេធ្លាប់ស្គាល់នាង ធ្លាប់ឃើញនាង តែក៏មិនដឹងថាធ្លាប់ស្គាល់ ធ្លាប់ឃើញនាងនៅកន្លែងណា។

         អីុបូបម្រុងនឹងទុកវាចូលទៅក្នុងថតតុទៅហើយព្រោះតែនឹកមិនឃើញ តែក៏ប្រទះភ្នែកនឹងឡូហ្គោសាលានៅខាងខ្នងរូបថត។ ពេលគេពិនិត្យឲ្យច្បាស់បន្តិចក៏ឃើញថាវាជាឡូហ្គោមហាវិទ្យាល័យដែលគេធ្លាប់រៀននេះឯង ហើយអ្វីដែលសំខាន់គឺជាថ្នាក់ដែលគេរៀនទៀតផង។

       នាយរហ័សស្ទុះក្រោកចេញពីកៅអីដើរសម្ដៅទៅទូជ្រុងខាងក្រោយ ហើយក៏លើកដៃរុញកញ្ចក់និងយកប្រអប់ធំល្មមមួយចេញមក ហើយលើកមកដាក់លើតុធ្វើការរបស់នាយ។ ប្រអប់នេះគឺជាប្រអប់ដាក់រូបថត និងរបស់របរអនុស្សាវរីយ៍ទាំងអស់កាលពីសម័យនៅរៀន។ នាយលើកយកក្របរូបថតដ៏ក្រាស់មួយចេញមកបើកមើល រូបថតសិស្សទាំងអស់សុទ្ធតែមានឈ្មោះបិទនៅខាងក្រោមដើម្បីសម្គាល់ អីុបូបើកចុះបើកឡើងទាំងចិត្តអន្ទះសារចង់ដឹង តែចុងក្រោយក៏មិនបានឃើញ ប៉ុន្ដែនាយក៏ស្រាប់តែឃើញរូបថតមួយសន្លឹកជ្រុះក្នុងប្រអប់ ប្រហែលជាវារបូតចេញពីក្របហើយ ទើបនាយរហ័សលូកយកមកមើល

《 ឈិន ឡាវសឺុ!! 》អីុបូពោលឈ្មោះមនុស្សស្រីដែលនៅក្នុងរូបថតសិស្ស ហើយក៏ងាកភ្នែកសំឡឹងទៅមើលរូបថតដែលយកមកពីកាបូបរបស់តាន់បេ វាគ្មានកន្លែងណាដែលមិនដូចទេ ព្រោះវាជាមនុស្សតែមួយ។ មនុស្សស្រីក្នុងរូបថតទាំងពីរនេះមានឈ្មោះថា ឈិន ឡាវសឺុ នាងធ្លាប់ជាមិត្តរួមថ្នាក់របស់នាយ ហើយក៏ធ្លាប់ជាមិត្តស្រីម្នាក់ក្នុងចំណោមមិត្តស្រីរាប់រយនាក់របស់នាយដែរ កាលពីសម័យនៅរៀន។ នាយធ្លាប់ទាក់ទងជាមួយឡាវសឺុបានប្រហែលជាពីរសប្ដាហ៍ ហើយចុងក្រោយនាយក៏សុំបែកនាង ព្រោះនាយគ្មានអារម្មណ៍ស្រឡាញ់នាងឡើយ ព្រមធ្វើមិត្តប្រុសនាងគឺគ្រាន់តែបំពេញភារកិច្ចប្រុសព្រានដូរសង្សារដូចដូរខោអាវប៉ុណ្ណោះ ហើយចាប់ពីថ្ងៃដែលគេសុំបែកនាងមក គេក៏បាត់ដំណឹងនាងឈឹង សូម្បីមករៀនក៏មិនមក តែនាយក៏មិនយកចិត្តមកខ្វល់រឿងនេះច្រើន អាចថានាងប្ដូរសាលារៀនក៏បាន។