Eternity{ENHYPEN fanfic}

Episode-8

(Unicode)

"ကျွန်တော်နဲ့ကမလား"

သက်ရှိအရုပ်ကလေးဆီမှထွက်ပေါ်လာသော တိုးညှင်းသည့်စကားသံလေး။ Jungwonမှင်တက်နေမိပြီး ဘာဆိုဘာမှပြန်မဖြေနိုင်။ ထိုသက်ရှိအရုပ်ကလေးကတော့ သူ့အားမော့ကြည့်နေလေသည်။

ထို့နောက် ထိုကောင်လေး၏သေးသွယ်သောလက်လေးမှာ ဖြေးညှင်းစွာလှုပ်ရှားလာပြီးနောက် လက်ထဲကိုင်ထားသည့် Teddy bearအရုပ်လေးအားပစ်ချလိုက်တော့သည်။ Jungwonတယောက် မလှုပ်မရက်နှင့်ပဲ ကြမ်းပြင်ပေါ်ပြုတ်ကျသွားသည့်အရုပ်ကလေးအား အကြောင်းပြချက်မဲ့စွာလိုက်ကြည့်နေမိသည်။

ထိုစဥ် မျက်စိရှေ့ကောင်လေးမှစတင်လှုပ်ရှားလာပြီး သူ့လက်နှစ်ဖက်အား အသာဆုတ်ကိုင်လာလေသည်။ ထိုကောင်လေး၏လက်နှစ်ဖက်မှာ သေးသေးသွယ်သွယ်ပင်။ သို့သော် အေးစက်လှသည်။ လူသာမန်၏အပူချိန်လောက်တောင်မရှိနိုင်။

အေးစက်စက်အထိတွေ့ကြောင့် Jungwonပင်မှင်တက်နေမိပြီး သူကိုယ်တိုင်တောင်အေးစိမ့်စိမ့်ခံစားလာရတော့သည်။ သူ​ကြောင်တောင်တောင်ဖြစ်နေစဥ်တွင်ပဲ ထိုကောင်လေးမှစတင်လှုပ်ရှားလာလေသည်။

တစ်လှမ်း...နှစ်လှမ်း...

အသာရွေ့လျားနေသော ထိုကောင်လေး၏ခြေလှမ်းတို့နောက် Jungwonလိုက်ပါလှမ်းမိနေသည်။ ဘယ်အရာကတွန်းအားပေးနေသလဲသူမသိပေ။

မီးအလင်းရောင်မရှိသော ခမ်းနားသည့်ခန်းမကျယ်ကြီးထဲ သံစဥ်မဲ့လှုပ်ရှားနေမိသည်မှာ အချိန်အတော်ကြာသည်အထိ။

​ခြေထောက်ဆီမှညောင်းကိုက်ခြင်းကိုခံစားလိုက်ရချိန်တွင်တော့ ထိုကောင်လေးလည်း ရုတ်တရက်ရပ်တန့်လိုက်လေသည်။ Jungwonသူ့မျက်စိရှေ့မှကောင်လေးကိုကြည့်လိုက်တော့ ခေါင်းလေးငုံ့နေလေသည်။

ရုတ်တရက်ကြီးငြိမ်ကျသွားသောကောင်လေးကြောင့် Jungwonဘာဆက်လုပ်ရမည်မသိတော့။ ဒီနေရာကိုရောက်ပြီးကတည်းက အမြဲကြောင်တောင်တောင်နှင့် အနေခက်နေမိသည်မှာ ဘယ်နှစ်ကြိမ်မြောက်မှန်း ရေတောင်မရေနိုင်တော့ပေ။

"ဟို...ဟိုလေ..."

Jungwonဘက်မှအသံစလိုက်တော့ ထိုကောင်လေးမှလည်းမော့ကြည့်လာသည်။ ဒီတခါတော့ထူးခြားစွာပင် ထိုကောင်လေးမျက်လုံးထဲတွင် မျက်ရည်စများအားတွေ့လိုက်ရသည်။ သို့သော် သာမန်မျက်ရည်စများမဟုတ်ခဲ့...သွေးမျက်ရည်များဖြစ်နေလေသည်။