​🇫​​🇪​​🇹​​🇮​​🇸​​🇭​

KABANATA 11: FETISH

            "The more I dig into the rabbit hole, the more I discover disturbing secrets, the more I realize the horror of what human beings are capable of. The human mind is scarier than any uncanny creatures."

***

(*Trigger Warning)

"Ang galing ko, 'di ba? Hindi n'yo naaamoy ang baho ng bangkay? Bumili kasi ako ng air quality enhancer liquid sa Amazon. Itong enhancer na ito para talaga sa mga morgue. Tapos ihahalo mo roon sa aromatheraphy diffuser," nakangiting paliwanag ni Brandon na parang walang ginagawang masama.

"Ito Kassie oh. Vicks. Hindi ba naglalagay kayo n'yan sa ilong kapag humahawak kayo ng bangkay?" sabi pa nito na naghagis ng vicks vaporub sa kulungan. Tumama iyon sa bakal at tumalsik sa gilid.

Masama ang tingin na kumapit si Kassie sa rehas na bakal at sumigaw, "Nababaliw ka na!"

"Ikaw ang dahilan ng pagkabaliw ko," walang emosyon na sagot ni Brandon.

Hindi niya maintindihan ang sinasabi ng lalaki.

"Minahal kita Kassie," sabi nito na nag-iba ang emosyon sa mukha. Naging malambot ang mga mata nito nang tumingin sa dalaga.

Napatingin si Gina sa babaeng kasama sa kulungan. Hindi niya kilala si Kassie at naguguluhan siya sa usapan nila.

"Hindi 'yan totoo!" giit ni Kassie. Binugbog siya kanina tapos sasabihin na mahal siya?

"Totoo 'yon pero mas minahal mo si Frederick!" nagalit na sigaw ni Brandon at dinuro siya. "Kasalanan mo kung bakit ako nagkaganito!"

Hindi sumagot si Kassie. Totoong minahal niya si Frederick. Bilang isang matalik na kaibigan o maaaring mas higit pa roon. Napagtanto niya kung gaano kahalaga si Frederick sa buhay niya nang mawala ito, pero hindi na maibabalik ang buhay na nawala.

"Ako ang buhay, ako ang narito sa tabi mo pero mas minamahal mo ang patay!" nanghihinakit na sabi ng lalaki na tinuro pa ang sarili.

"Hindi 'yon dahilan para gumawa ka ng krimen!" galit na sigaw niya. "At hindi mo ako totoong mahal Brandon! Ginamit mo lang ako para magkaroon ka ng access sa loob ng morgue! Ginamit mo ako para sa krimen mo!"

"Hindi 'yan totoo!" Napadabog si Brandon at nahulog ang mga bagay na nakasabit sa dingding.

"Wala akong pakialam!" nanggalaiti na sigaw ni Kassie. "Mas gugustuhin ko pang magmahal ng patay kaysa magmahal ng kriminal!"

Nag-e-echo ang mga boses nila sa loob ng basement. Naiingayan na si Gina sa mga sigawan nila.

"Ano bang motibo mo sa pagnanakaw? Sabihin mo na!" Hamon ni Kassie na matalim pa rin ang tingin sa lalaki.

Tumaas ang isang sulok ng labi nito. Tipid itong ngumiti na tila ba may naalalang nakakatuwang bagay. "Gusto mong makita, Kassie?"

"A-Anong ibig mong sabihin?" Nagtaka siya dahil ibang-iba ang ngiti ni Brandon ngayon. Nakakatakot ang ngiti nito na parang may gagawin itong kasuklam-suklam.

"Panoorin mo para malaman mo ang motibo ko!" sabi nito at humarap sa bangkay ni Trishia. "Hindi talaga si Trishia ang gusto ko kundi si Bernadette, pero pwede na ring pagtyagaan dahil maganda rin naman si Trishia."

Hindi pa rin maintindihan ni Kassie ang ibig-sabihin ng lalaki. Narinig niyang napasinghap si Gina sa likod. Napalingon siya sa dalagita. Takot na takot ang mukha ni Gina na umurong sa sulok. Nanlalaki ang mga mata at nanginginig.