ပြည့် ရတနာ(ျပည့္ ရတနာ)

အပိုင်း(၁၃)

"အခေါ်ရှိပါသလား အရှင်မင်းကြီး"

"အထိန်းတော်ကြီး...လာမယ့်မိဖုရားမွေးနေ့ပွဲအတွက် ပြင်ဆင်တာဘယ်နှယ့်ရှိသလဲ
အကုန်အဆင်ပြေရဲ့နော်"

"မှန်ပါ့မင်းကြီး...ဘုန်းတော်ကြောင့် လိုအပ်ချက်မရှိပြင်ဆင်ထားပါတယ်၊အစားအသောက်အရသာပြင်ဆင်မှုကိုလည်း လက်ရွေးစင်တော်ဝင် စားတော်ကဲများနဲ့အစွမ်းကုန်ပြင်ဆင်ပြီး ဟင်းလျာအသစ်များကိုလည်းစမ်းသပ်ပြင်ဆင်နေပါတယ်၊ယဥ်ကျေးမှုဝန်မင်းကလည်း ပွဲတော်မှာကပြဖျော်ဖြေမဲ့ အတီးအမှုတ်အက ပန်တျာသဘင်သည်များနဲ့စည်ကားသိုက်မြိုက်အောင်တာဝန်ယူဆောင်ရွက်နေပါတယ်...လုံခြုံရေးအတွက်လည်း နန်းစောင့်တပ်များကိုတင်းကြပ်စွာနဲ့ လေ့ကျင့်နေပါတယ်၊
မိဖုရားကြီးနဲ့အမတ်ကြီးတို့ရဲမွေးနေ့ပွဲဟာ အခြားသောနိုင်ငံသံတမန်များအတွက် လိုလေးသေးမရှိ နှစ်ခြိုက်စေရအောင် အစွမ်းကုန်ပြင်ဆင်နေကြပါတယ် ဘုရား"

"အတိမ်းအစောင်းပေါ့လျော့မှုလုံးဝဖြစ်လို့မရဘူးနော် အထိန်းတော်ကြီး၊ဒီပွဲကသိပ်ကိုအရေးကြီးတာပ"

"မှတ်သားထားပါတယ် ဖရာ့"

တောင်ပိုင်ရှင်သည် နန်းတွင်းတစ်ခုလုံးကိုအုပ်မိုးမြင်ရသော နန်းမြင့်မျှော်စင်မှစီးကြည့်နေသည်။နန်းမြင့်မျှော်စင်သည် နန်းတော်တွင်းရှိသမျှနေရာထဲတွင် တောင်ပိုင်ရှင် အကြိုက်ဆုံးနေရာဖြစ်သည်။ကြောင်လိမ်လှေကား အထပ်ထပ်နှင့် မြင့်မားသောမျှော်စင်မှကြည့်လျှင် မြို့တော်ကိုပင်မြင်နိုင်ပါသေးသည်။လတ်ဆတ်သော လေတဖြူးဖြူး၏ အရသာကို နန်းမြင့်မျှော်စင်တွင်သာခံစားနိုင်သည်။

မျှော်စင်ပေါ်မှာ အရာအားလုံးကို စီးမိုးငုံ့
ကြည့်ရသည့်ခံစားချက်ကို မင်းတရားကြီး သဘောကျသည်။စိတ်ညစ်စရာ ခေါင်းခဲရမည့်တိုင်းပြည်ပြသာနာများ ဖြေရှင်းရမည့်အခါမျိုးတွင် နန်းမြင့်မျှော်စင်ပေါ်လာပြီးအ‌ဖြေရှာတတ်သည်။
မျှော်စင်မှ အားလုံးကိုခြုံငုံမြင်ရသကဲ့သို့
ပြည့်ဥသျှောင်ဖြစ်သည့် မိမိသည်လည်း ခပ်သိမ်းသောသူတို့၏ အကျိုးကိုခြုံငုံသိရှိစေရန်အစဥ်ကျင့်သုံးရသည်။