- أمال أنت بتلبس ورايح فين؟
- رايح فرح ليلي
- نعم!! أنت بتهزر صح يا أدهم
- اهزر ليه، أنا كنت عايز أشوفها وهي لبسه الابيض، والحلم اتحقق اهوه، مش عايزني اروح الفرح ليه
- فوق يا أدهم، فوق يا حبيبي ليلي كنت حب حياتك، حب 5 سنين
- عارف علشان كده انا رايح، أنتي عايزه بنتي تتجوز، ومحضرش فرحها
- بلاش يا أدهم، علشان خاطري بلاش
- انا أخدت القرار خلاص، ورايح دلوقتي عايزه تيجي معايا تعالي مش عايزه بلاش تيجي، وادخلي نامي
- استني هلبس واجي معاك
- متتاخريش
________________________________
أنا أدهم 28 سنه خريج تجاره 2015 شغال في شركه في المملكة العربية السعودية، اللي كنت بتكلم معاها دِ أصاله أختي 24 سنه، أنا وهي مفيش ليا غير بعض بعد وفاة ولدي وولدتي، وأنا المسؤول عنها بقالي 4 سنين، ليلي حب حياتي وعمري 5 سنين حب، فاكر أول مره قبلتها من 6 سنين كأنه امبارح
_______________________________
- بعد أذنك هي شقه رقم 99 فين
- شقه رقم 99 دِ شقتي
- هو أنت أدهم أخو أصاله صح
- ايوه، أنتي مين
- انا ليلي صاحبت أصاله
- اهلين يا ليلي اتشرفت بمعرفتك
- الشرف ليا أنا يا استاذ أدهم
- خليها أدهم من غير استاذ
- حاضر يا أدهم
- تعالي يلا اطلعي لـ ليلي فوق
- ماشي اتفضل، وأنا هطلع بعدك
بعدها طلعت الشقه، وهي طلعت بعدي، خطبت على الباب، ليلي فتحت ودخلنا الشقه، سيبتهم براحتهم ودخلت اوضتي، كانت أول مره اشوفها فيها، كنت عاديه بنسبه ليا، او كنت بحاول اقنع نفسي أنها عاديه، أنا مكنتش مركز في حاجه ولا بفكر ف حاجه غيرها أساساً، كتبت على ورقه معلقه فوق السرير عندي
* وكان قلبي يحبث عنك كما لو كان وحيداً، يفكر فيك على الرغم من وجودك معه ف نفس المكان *
________________________________
- أدهم أدهم بتفكر في ايه
- بتقولي إيه يا ليلي
- ليلي !! أنا أصاله يا أدهم، علشان خاطري بلاش المشوار دَ
- احنا لسه متكلمين في الموضوع دَ من شويه، مش هنرجع نتكلم فيه تاني
- حاضر يا أدهم يلا ننزل
نزلنا واخدت العربيه بتاعتي، فضلت طول الطريق قاعد ساكت مش بتكلم، وصلت القاعه أول شخص قبلته في القاعه كان أبو ليلي
- الف مبروك يا عمي
- الله يبارك فيك يا أدهم، متزعلش مني يا إبني كل شيء قسمه ونصيب
في اللحظه دِ عقلي رجع بالزمن وراء 8 شهور لما كنت رايح أتقدم لـ ليلي
___________________________
- مساء الخير يا عمي
- مساء النور، اتفضل يا أدهم يا إنبي
- كنت عايز حضرتك ف موضوع بخصوص ليلي
- خير يا إبني فيه إيه
- انا عايز أطلب منك أيد ليلي
- انا هعرف ظروفك كويس وحياتك ماشيه، ف أنا مش هسالك عندك شقه ومهر والحاجات دِ، لكن أنت مرتبك 1200 جنيه ف الشهر، وأنا بنتي بتاخد 1500 جنيه مصروف لها ف الاسبوع بس، تفتكر هتقدر تعيش بنتي ف نفس المستوي دَ
- انا عندي استعداد أشتغل ليل نهار المهم ليلي تكون مبسوطه وسعيدة معايا
- انا مقدر حماس الشباب وطموحاتهم، لكن الواقع غير كده يا إبني، كل شيء قسمه ونصيب يا أدهم
- لكن يا عمي
- شرفت يا أدهم
________________________________
أدهم أدهم سرحان ف أي " أصاله "
- مفيش حاجه، افكرت لما كنت متقدم لها، و اترفضت علشان كنت بقبض 1200 جنيه، وسبحان مغير الأحوال دلوقتي بقيت بقبض 5000 جنيه، والعريس بتاعها سمعت أنه شغل شغلنتين وبيقبض 3000 جنيه
- أنسي الموضوع دَ بقا يا أدهم هي بقيت من نصيب غيرك
- تخيلي كده لو أنا مكان العريس دلوقتي، و كنت لبس البدله الكحلي على القميص الأبيض، والجزمه الشاموه، كنت هبقي حلو أوي زي ما ليلي كنت مختاره ليا
- بس يا أدهم كفايه علشان خاطري
- أنا عملت تسريحه الشعر زي ما هي كنت بتحب، وكمان حلقت دقني زي ما كنت بتحب تشوفني بيها دايما
- حرام عليك يا أدهم أنت مريض قلب علشان خاطري كفايه أنا مليش غيرك
- تعالي نسلم عليها يمكن تكون دِ أخر مره أشوفها فيها
- بلاش يا أدهم بلاش
- مينفعش لازم أسلم عليه، و أقولها مبروك يا بنتي، طلعه قمر زي ما كنت ...
- أدهم أدهم بـ الله عليك رد عليا أدهم قوم وأنا أخليك تسلم عليها أدهم علشان خاطري قوم أنا مليش غيرك أدهــــــم
#محمد_مهران
#حكايات_من_الارشيف
