- تيجي ننفصل عن بعض
" ضحك بصوت عالي "
- بتكلم بجد يامحمد؛ تيجي ننفصل عن بعض
- وبعد ما ننفصل ونبعد عن بعض، وحياتنا تكون نكد، زعلان، اكتئاب، خنقه، نفسيه وحشه هـنستفاد إيه
- هـنستفاد أننا هنبطل خناق، ومشاكل مع بعض
- أنا عايز أتخانق معاكِ
- و أنا مش عايزه أنا تعبت من الخناق، عايزه أعيش مبسوطه شويه، حابه حياتي تكون كويسه، مش عايزها فرح، وسعاده دايما لكن أنا عايزها تمر بفتره كويسه لأني جبت أخري
- المفروض إني دلوقتي اتمسك بيكِ، واركع على رجلي، واقولك أرجوكِ أرجوكِ متسبنيش أنا هموت من بعدك صح
- لا مش صح لكن على الأقل خليني أحسن أنك عايزيني، ومتمسك بيا
- أنا بحبك، وعايزك، وحياتي هتقف من بعدك، لكن أنا دايما ماشي بمبدأ مكان ما تلاقي راحتك أقعد، واعمل سكن ليك
- يعني أنت شايف أن راحتك في إني أبعد
- أنا بتكلم عليكِ أنتي لو شايفه راحتك في بعدي عنك " سكت لحظه وقولت بصوت منخفض" أبعدي
- أنت عارف أن راحتي في وجودي جانبك، ومعاك
- امال عايزه ننفصل ليه!!
- عايزه أحسن أنك لسه بتحبني
- هي الساعه عندك كام دلوقتي
- الساعه 2 بعد منتصف الليل
- يبقا هرمونات بعد 12 اشتغلت صح
- يمكن
- عايزك تعرفي الهرمونات دِ إني بحبك، وعايزك، وهفضل جانبك طول العمر، وبعدين أنا كاتب قائمه من أسبوع ب 150 الف جنيه، هجيبهم منين أنا دلوقتي علشان هرمونات حضرتك ترتاح
- " ضحكت بصوت عالي وقولت " يعني أنت كل اللي همك أنك دافع قائمه بـ 150 ألف جنيه
- الصراحه أيوه " ضحك "
- طب طلقني يا محمد، طلقني
" سمعت صوت ماما وهي بتقولي :
- نامي يا بنت الهبله نامي، كلها أسبوع وتروحي بيته
- لا يا ماما أنا رجعت في كلامي، وعايز أطلق
" ماما أخدت مني الفون "
- الو عامل إيه يا محمد
- الحمد الله يا ماما بخير، وانتي!!
- انا بخير يا حبيبي الحمد الله
" لما سمعت ماما وهي بتقوله ياحبيبي مكنش ينفع اسكت، كان لازم ادخل في الوقت، ف اتكلمت وقولت "
- محمد! وحبيبك!! طب ما نطلقك من بابا، وتتجوزا بالمره
- " محمد " و أنا موافق
- أنت موافق يعني
- أيوه موافق، أهوه حتي أكون جوزك أمك، واعذبك في البيت في الراحه والجايه
- " ماما " بقا كده يامحمد عايز تعذب بنتي
- " محمد " لا طبعا يا ماما هي جوة عيني
- أيوه كده ياحبيبي خاف على نفسك علشان اليومين دول المتجوزين بيقتلوا اْجوزهم
- أنا أقدر بردو دَ أنتي حبيبتي، وقلبي من جوه
- مبتثبتش
- و أنا بحبك قوي على فكره
- و أنا بحبك اكتر على فكره
- " ماما " كان فيه من دقيقه واحده عايزه تطلق يامحمد ماشوفتش هي راحت فين
- يا ماما بقا الله، جوزي وبدلع عليه شويه، وبشوفة هيستحملني ولا لا
- " ماما " ربنا يصبره ويكون في عونه على ما بلاه بيه
- " محمد " يارب يا ماما
- اي دَ يعني أنت شايف إني بلوة
- لا طبعا ياروحي أنتي قمر
- قمر بالستر يا حبيبي
- طيب أنا هنام علشان عندي شغل الصبح بقا
- ماشي، تصبح على خير
- وانتي من أهل الخير
- هي إسمها بردو، وانتي من أهل الخير
- ما أنتي خلاص بقيتي من أهلي هقولها ليه بقا
- مليش دعوه
- وانتي من أهلي وأهل الخير والجنه يارب
- كمان بتاخدني على قد عقلي علشان تنام
- أنا
- ما هو النوم أهم مني، أنت مبقتش تحبني زي الأول، وأنا عايزه أطلق
- انا نمت خووو خووو خووو
- كمان طلعت بتشخر، وأنت نايم
- هو أي سبب للنكد وخلاص
- لو مش عجبك طلقني
- بحبك يا أم سيلين
- أنت بتقول إيه
- بقولك بحبك يا أم سيلين
- ياخي حرام عليك إحترام هرموناتي شويه، أنا بموت فيك يا أبو سيلين
- بكره نتجوز، ونجيب بنتنا سيلين، ولما تروح المدرسة والمدرس يسال مثني سيل إيه! و بنتك ترفع أيدها والمدرسه يقولها قومي جاوبي يا سيلين هتقولوا الاجابه سيلين يا استاذ " ضحك "
- أنت بتتنمر على أسم بنتك يا استاذ
- هي جات على بنتي، إذا كان إحنا بنتنمر على نفسنا لما نكون زهقانين علشان نضحك جات على بنتي يعني
- تصدق صح
- بحبك يا أم سيلين
- بموت فيك يا أبو سيلين
" كيف يكون الليل ليلاً بدونك أنتي، وكل أحديثك المختلفه، حيث أن الكنز الحقيقي لم يكن في الوصل، ولا في الرحله حيث قد كان الكنز الحقيقي في الرفيق الموجود معاك فيها.. "
#محمد_مهران
#حكايات_من_الارشيف
