- أنا بقول كفايه قوي لحد هنا
- ومين قالك تقول كده
- نفسي اللي تعبت، ملامحِ اللي بقيت باهته، دماغِ اللي مش بتبطل تفكير
- دماغك اللي مش بتبطل تفكير في إيه
- دماغِ اللي بتفكر في كل كلمه ألف مره قبل ما أقولها، هل هي تفهم كلامِ صح ولا غلط؟ هل أنا هكون محتاج تبرر لها ولا لا ؟ هل أنا هستحمل الخناق اللي ممكن يحصل بعدها ولا لا؟
- انت مكبر الموضوع كده ليه يا محمد
- انا ولا مكبر ولا مصغر أنا حقيقي تعبت من كل حاجه معاكِ، دَ أنا لما قولتك من يومين أنا زعلان منك انتِ قولتِ بكل برود اعصاب صلح نفسك بنفسك، أنا فيا اللي مكفينِ
- ايوه يا محمد أنا فيا اللي مكفينِ
- فيكِ إيه، عندك عيال بتجري عليهم، عندك مدير رخم كل يوم يأخرك عن ميعاد ب ساعتين، عندك أهل محتاجين فلوس للعلاج، و الأكل، والشرب
- لا مش عندِ دول بس عندِ مشاكل في البيت أكتر من كل المشاكل دِ
- وايه هي مشاكل البيت بقا، محمد ماما عايزينِ أعمل أكل النهارده، وأنا كنت بعيط بليل لوحدي، وعيني وجعني، محمد محمود أخويا ضربني وأنا مسكته ضربته بس بابا اتعصب عليا، وأنا قعدت اعيط
- محمد أنت بتتريق عليا صح
- لا مش بتريق عليكِ، أنا أقدر بردوا
- قول يا محمد أنت عايز إيه من الأخر، عايز تبعد، أتفضل الباب مفتوح
- احلي حاجه سمعتها منك الباب مفتوح، تصدقِ أنا شايف أنه مفتوح بقالي سنه ونص لكن كنت بضحك على نفسِ، وأقول يعم بتحبك، النكد دَ حب أصلا، الغيره دِ حب، الخنقه معاك علشان بتحبك، كل حاجه بتحبك بس الباب طلع مفتوح
- محمد أنا قولتك الباب مفتوح أتفضل أخرج من حياتِ زي ما أنت عايز بس خليك عارف أنك لو عرفت بنات العالم كله مفيش حد هيحبك قدِ
- محدش هيحبك قدِ، يا شيخه لو الحب بالطريقة دِ أنا مش عايزة أنا هلغي رحلتي في الحاجه دِ
- مش بمزاجك الحب بيجي من غير انذار، بيجي مره واحده كده
- الكلام دَ لو أنا سيب باب قلبِ موارب أو مفتوح، إنما أنا هقفل الباب نهائي
- انت لو عايز تقفل باب قلبك مكنتش هتيجي وتعرفنِ أنك ماشي، وهنبعد
- انا بعرفك إني هبعد علشان تكونِ عارفه أنك السبب في كده، وكمان هقفل باب قلبِ علشان الباب الموراب هيجيب بارد ومش هاخد بالي غير لما أحس بالتعب، إنما المقفول مش هيجيب حاجه من بره
- ايوه صح أقفل بقا كويس علشان الشتاء داخل، والارتباط الفتره دِ كتير قوي، وانا خايفه عليك ل تقع ف حب حد مش كويس، ومش يستاهل
- عندك حق بس النصيحة للاسف جات متاخره بعد ما وقعت في الشخص الغلط
سلام
#محمد_مهران
