- اعملك قهوة؟
- ما انتي عارفة إني مابحبهاش
- صح.. طيب اجبلك عصير..
- أنا مش عايزك تتعبي نفسك ولا تعملي أي حاجة خالص، أنا بجد كفاية أنى شوفتك
- طب قولي بجد عامل ايه...
- مش عايز ابقي شخص درامي وأقولك إن حياتي واقفة، الحياة معاكي كان فيها تفاصيل ماتتعوضش، السفر والضحك حتى سكوتك كان حلو
- لسه كلامك حلو زي ما أنت.. بس أنا مش عايزاك تفضل مزنوق في مرحلة أسمها سما وذكرياتي مع سما، في حاجات بيبقي أحسن انها ما تتعش من أول وجديد
- حاجات زي ايه؟
- زي الأفلام مثلا، كنت متحمسة لفكرة أنى هوريك فيلم بحبه، بس الفيلم لو اشتغل تاني قدامي مش هشوفه في الأغلب..
- مش يمكن الفيلم يوحشك؟
- أصل ايه اللي هيوحشني؟ التفاصيل بتاعته هي هي ونهايته كمان، كل اللي هيحصل هو أنى هبدأ أزهق منه وأنا مش عايزة كده
- يعني انتي مش مبسوطة أنك شوفتيني؟
- هو ده اللي انت فهمته يعني؟ طبعا مبسوطة!! أنا كل اللي اقصده أني عايزاك تتبسط بحياتك من غير ماتقعد تفكر في زمان وحياتك اللي بقت مليانة دراما وحزن...
- هو أنا ينفع ابقي اكلمك واطمن عليكي؟
- اكيد ينفع، بس ماتعملش حاجة تخليك تيجي على قلبك عشان تعملها..
- أنا قلبي هيبقي دايما مبسوط لما اشوفك، حتى لو مفيش بينا حاجة..
- محمد...
- مممم
- خلي صورتي اللي جواك هو الصورة اللي انت حبيتني عشانها
- خلي بالك من نفسك يا سما تفتكري بعد سنين من دلوقتي هنفتكر بعض؟
- هنفتكر بعض مرة كل شتا، تمام؟ الشتا وقت مناسب اننا نزعل شوية على الفراق
- خلاص انتي قررتي يعني أن الشتا هو التوقيت الرسمي للحزن؟
- الشتا يبقي في شوية حزن وتبقي باقي السنة تمام أحسن ماتعيش ٤ فصول بتفكر بس في بيكي..
- كل ما أشوف الفليم هفتكرك
- وأنا كل ما أروح إسكندرية هفتكرك..
الحوار ده عدي عليه سنين،وكعادة الوعود بتبقي عاملة زي البطارية اللي بتيجي مع أي لعبة أطفال،عمرها قصير جدا جدا..
النهاردة يوم فرحك،أكيد هيبقي شكلك زي القمر كالعادة،زمان كنت بتخيل شكلك في يوم فرحنا،اتخيل فستانك الأبيض وأتخيل الرقصة اللي هنرقصها مع بعض وطبعا هنفضل نتخانق علي الأغنية،أنا اقولك عمرو دياب وانتي تقوليلي حماقي،كنت دايما بتخيل نفسي وأنا شايلك وبلف بيكي وانتيب تضحكي بصوت عالي حوالينا كل اللي بيحبونا بيسقفوا ويضحكوا،كنت بتخيل نظرتي لكل واحد قال ان الحكاية دي مش هتكمل وأضحك عليه أنا وانتي في حضني.. النهاردة أكيد هيبقي يوم حلو،اليوم اللي انتي بتحلمي بيه من وانتي صغيرة لكن الفرق هو اني مش انا عريسك اللي هيبقي جنبك في اليوم ده،الفرق يمكن انك اختارتي اللي حبك من غير خوف،اللي استحمل نوبات غضبك وزعلك وكل لحظة وحشة كنتي فيها ضعيفة.. ماقدرش أنكر أني كنت جبان في أوقات كتير،كنت مش بعرف احتويكي بالشكل المطلوب،ماقدرش انكر اني كنت بكره الخناق واحاول دايما اخلصه بأي شكل وبأي طريقة حتي لو كانت حلول مؤقتة.. ماقدرش أقول اني ماحبتكيش،يمكن المشكلة كانت في كوني عايز كل حاجة تبقي كويسة بلا تعب وبلا حروب،أنا ماكنتش محارب شاطر وبعترف بده..النهاردة فرحك ومفيش حاجة اقدر اعملها غير اني اتفرج من بعيد،اشوف أي حد من صحابك منزله ليكي ستوري عشان اشوف شكلك،اشوف تفاصيلك اللي كانت في يوم من الأيام ليا والنهاردة بقت لشخص تاني،شخص حبك بلا تفكير،بلا شروط وبلا خوف من أي حروب هيكون مكسبها في الأخر..انتي..
#محمد_مهران
#شخابيط_مهران
