- قومي يا شهد اعملي لي كوباية شاي.
= الله بقى، أنا لسه عاملة كوباية من دقيقتين قدامك أهي يا محمد.
- بِردت يا أختي، ماتجادلينيش وقومي اعملي كوباية الشاي.
شهد بصّت له بضيق، وقامت غصب عنها بدل ما يتخانق معاها وهو إجازة من شغله النهاردا بمزاجه يعني فاضي للخناقات. فعملت كوباية الشاي وخرجت بتحطها جنبه على الترابيزة الصغيرة، وقبل ما تقعد مكانها تاني على كرسي خشب ورا الرُكنة اللي هو قاعد وممدد جسمه براحة عليها، محمد ناداها وشاور لها ناحية ريموت التليفزيون اللي على رجله:
- هاتي الريموت دا يا شهد.
= لو مديت إيدك شوية هتمسكه يا محمد مش لازم تقوّمني كل شوية أنا تعبانة من الصبح بسبب شغل البيت والأولاد.
- قولت لك ماتجادلينيش يا مرا وقومي اتلحلحلي هاتي الريموت، مارسي شوية رياضة يمكن جسمك التخين دا يخس.
شهد بصّت له بصدمة وعينيها دمّعت، ودي أول مرة يعايرها فيها بجسمها التخين بشكل مباشر، فقامت من مكانها ودخلت الأوضة بتاعتها، ومحمد بص وراه بيدّور عليها ويقول:
- روحتِ فين يا شهد؟
= هلبس وأروح لماما أقعد عندها شوية، مخنوقة من البيت واللي فيه وعايزة أخرج أشم هوا نضيف.
- شمي الهوا النضيف على سطح بيتنا اللي بتقولي تعبتِ في تنضيفه يا أختي، مافيش خروج من بيت جوزك وعيالك.
- يعني إيه مافيش خروج من البيت يا محمد؟ هتسجنني هنا؟
= أيوا هسجنك هنا يا شهد، ولو ناقشتيني في أي حاجة تانية اخرجي وأنتِ متطلقة.
شهد بصّت بصدمة كبيرة وخرجت من الأوضة بسرعة، قرّبت منه ومسكت الريموت اللي على رجله واعطيته ليه، ولما رجعت قاعدة مكانها بتكتم دموعها بحزن على حالها مع جوزها الرجعي الظالم دا، محمد ابتسم برضا عن اللي عمله وقال بفخر:
- أنا محمد الرجعي، كبير عائلات الرجعي.. لازم أكون مسيطر على بيتي ومراتي بردو.
---------------
هل شهِدتم موقفًا أو شخصًا كهذا في حياتكم من قبل؟
هل تعتقدون أن تصرّف شهد صحيح في سبيل عدم طلاقها؟
#سكريبتات_أفروديت
أنت تقرأ
طلّقني!
Non-Fictionهذا الكتاب هزلي فكاهي يحمل بنهاية كل جزءٍ من أجزائه مغزى وهدف. سكريبتات مصرية لما بعد الزواج. الجانب الفكاهي الناضج مني: «ندى الشحات». التحديث بشكل يومي حتى يصل لخمسين سكريبت.
