شوية حاجات كدا للي بيكتبوا روايات عامية علشان الواحد جاله تشنجات من اللي بيقرأه:
- مافيش بطل عنده ٢٥ سنة وأقوى رجل أعمال في العالم، طاحن الأسواق، قا.هر السفارات، مد.مر المطارات، مف.جر المجرات، يعني ٢٥ سنة ولسه متخرج من ٣ سنين، لحق اتخرج من الجيش ولقى وظيفة إمتى يعني؟ لحق فتح شركة وكبّرها وبقى أقوى منافس لسوق العالم في مجاله إزاي يعني؟ هي مصر أصلًا خارج تصنيف سوق العالم اتقوا الله بقى.
- مافيش بطل عنده نفس الـ٢٥ سنة وبيشتغل دكتور في جامعة، ولا حتى معيد يا حبيبتي منك ليها، دكاترة الجامعة بيبقى فوق الـ٤٠ دا لو ماكانش فوق الـ٧٠ وإحنا اللي بنسنده علشان يطلع على المنصة ويبدأ المحاضرة، لو دكاترة الجامعة ٢٥ سنة ماكانش حد غلب يعني، اتخرج إمتى؟ عمل ماچيستير ودكتوراه إمتى؟ دا الواحد بيقعد يناقش الدكتوراه عشر سنين بس، بطلوا ترجيع بقى.
- رجل عصا.بة إيه اللي هيقع في حبك يختي أنتِ وهي؟ يعني هو ساب كل البنات اللي بيخ.طفهم ويتا.جر فيهم وبيشتغلوا معاه أصلًا وهيروح للبطلة اللي شافها صدفة وأعجب ببرائتها؟ وبعدين هي لو بريئة هتقف قدام رجل العصا.بة إزاي وتتحداه؟ دا أنتِ لو ولد مشى وراكِ في الشارع بتعمليها على نفسك يا أختي أنتِ وهي.. وبعدين رجل عصا.بة إيه اللي هيحارب جيش لوحده دا؟ ماحدش عملها غير تايجر شروف في Bagghi 3 ودا علشان هندي، فاهمة يعني إيه هندي؟
- والله العظيم البطل مش لازم يعيش في قصر، وبعدين هو إيه اللي عايش في قصر لم نرى مثله من قبل؟ ابن الملكة إليزا.بيث هو يعني ولا ولي العهد؟ دا حمادة هلال ماعملهاش اتقوا الله يا ولاد الوحشة.
- ترضي حد يخط.فك ويعذ.بك ويطفي السجاير تحت باطك وبعدين تحبيه علشان كان مر.يض نفسيًا وأمه بتلسوعه بالولاعة وهو صغير؟ دا أنتِ لو واحد بصلك في المواصلات بتصوريه وتنزليها فيسبوك وتقلبي الدنيا عليه.
- اغتص.بها.. اقنعوني هتحبه إزاي؟ ما أنا مش عايزة أدعي عليكم تجربوا اللي جربته علشان تعرفوا تكتبوا مشاعرها صح منكم لله فضحتونا قدام الفيمنس.ت'س.
- وبعدين رحلة إيه اللي من القاهرة لنيويورك في ساعتين؟ دا أنت لو رايح من القاهرة لأسيوط هتاخد وقت أكتر من كدا، جووووووجل جوجل بقى وابحثوا حرام عليكم.
- على فكرة مافيش حاجة اسمها تاخدي حدث تاريخي كبير من كتب التاريخ وتحرّفيه زي ما أنتِ عايزة، يا رب يتقبض عليكم بقى أنا زهجت.
- مدير شركة إيه يا أختي اللي هيسيب كل البنات دي ويقع في حب عيني البطلة اللي خبطت فيه قدام باب مكتبه وشتمته؟ ما هي لو شتمته هيطردها جربي تشتمي مديرك في الشغل كدا ووريني هيجي يتقدملك إمتى بقى!
- مش لازم أمه تكون حرباية على فكرة، مش هتخليها حرباية غصب عنها غير في سياق الأحداث ولو كان دا هيخدم الحبكة، لكن مش حرباية كدا وخلاص، ومش لازم صاحب البطل المرح اللطيف يتجوز صاحبة البطلة العنيدة العصبية، مششششش لااااااازم شوفوله واحدة تانية من الرواية، وليه مايكونش متجوز أي واحدة من بداية الرواية أصلًا؟
- مافيش حاجة اسمها حوار إنجليزي أكتبه بالعربية الفصحى، مابتعرفيش تكتبي إنجليزي ماتكتبيش، لكن مش الحوار العادي عامية والحوار الإنجليزي فصحى هتشلوووووونييييييييييييييييييييي.
- بطل إيه المصري اللي شبه توم كروز أو كريس هيمسورث يا حلوة؟ ما لو في حد مصري كدا ماكناش روحنا اكراشينا على الأجانب.
يعني دا مش ميشيل مورنور الإيطالي الممثل الإبا.حي؟ تؤ تؤ دا زين الجارحي اللي جرح قلوبنا كلنا.. ترجيععع بتكتبوا ترجيييععع.
مش عايزة أتعصب بقى
....
الفصل عبارة عن منشور وليس سكريبت.
أنت تقرأ
طلّقني!
No Ficciónهذا الكتاب هزلي فكاهي يحمل بنهاية كل جزءٍ من أجزائه مغزى وهدف. سكريبتات مصرية لما بعد الزواج. الجانب الفكاهي الناضج مني: «ندى الشحات». التحديث بشكل يومي حتى يصل لخمسين سكريبت.
