هذا الكتاب هزلي فكاهي يحمل بنهاية كل جزءٍ من أجزائه مغزى وهدف. سكريبتات مصرية لما بعد الزواج.
الجانب الفكاهي الناضج مني: «ندى الشحات».
التحديث بشكل يومي حتى يصل لخمسين سكريبت.
= لا في حاجة حصلت أكيد، مش عادتك تقعدي ساكتة كدا وحدك في الأوضة يعني. مالك يا سلمى؟
- ماليش.
= ريحيني طيب وقولي في إيه؟
- مافيش.
= طيب قاعدة وحدك ليه؟ تعالي اقعدي معايا برا نعمل فشار واتنين كابتشينو من أبو رغوة دا ونعمل أحلى شنب بالكابتشينو وإحنا بنشوف فيلم.
- مش عايزة أعمل كدا.
= أومال أنتِ عايزة تعملي إيه؟
- مش عارفة.
= طب حد عمل لك حاجة ضايقتك النهاردا طيب؟
- لا.
= طيب عايزاني أضرب حد ضايقك؟
- لا.
= طيب يا سلمى فيكِ إيه ريحيني؟
- مافيش.
= طيب اللي يريحك بقى اعمليه.. ربنا يفرّج همك.
- والله؟ اللي يريحني أعمله يا عمرو؟ طب ما تطلقني بقى أسهل وارتاح مني.
= طلاق؟ طلاق إيه؟ إيه السيرة الوحشة دي؟
- ما أنت اللي بتقول اللي يريحك اعمليه. عمرو! أنت بياع يا عمرو.
= بياع؟ أنا عملت إيه؟
- وكمان بتسأل عملت إيه؟
= إيه اللي حصل طيب؟ أنا لاقيتك متضايقة وسألتك مالك عشر مرات قولتِ مافيش، سيبتك بقى براحتك.
- والله؟ أنا قلبي كان حاسس، قلبي كان حاسس إنك مش بتحبني وبايعني.
= ليه بس يا حبيبتي كدا؟ أنا بحبك والله وماكانش هاين عليا أشوفك متضايقة وجيت أسألك بس مش راضية تقولي.
- ما أنت لو مهتم كنت عرفت أنا متضايقة ليه.
= وهعرف إزاي؟ أنا لاعيب كرة قدم مش ساحر والله.
- والله؟ وكمان بتتريق عليا؟ طب طلقني! طلقني يا عمرو وهروح أشتكيك لصالح أخويا.
= لااااااااا صالح لاااااااا يا سلمى. أنا ماتريقتش والله يا روحي بس أنا حقيقي مش عارف أعمل إيه أرضيكِ بيه دلوقتي.
- وكمان بتقول إني مش بتراضى بسهولة؟ ماشي يا عمرو ماشي، والله لأوريك!
= استني يا سلمى وحياة عيالك! إيه اللي مضايقك طيب علشان أشوف هصالحك إزاي؟
- ما أنت لو مهتم كنت عرفت لوحدك إيه اللي مضايقني.
= يالهوي على سنيني السودة، ما أنا سألتك أكتر من عشر مرات مالك.
- أداءك ماعجبنيش، المفروض كنت تسألني على الأقل خمسين مرة، بس أنت خلاص ماعدش يهمك مراتك حبيبتك أم ابنك، خلاص بعتني وبقيت شايف حياتك بعيد عني، المفروض الزوج الصح يعرف مراته متضايقة من إيه من نظرة واحدة، بس خلاص يا عمرو اللي بيننا انتهى.
قامت سلمى من مكانها وخرجت برا الأوضة وقفلت الباب وراها بقوة.. عمرو فضل باصص للباب المقفول بصدمة وبعدين قال:
= ءنا عملت ءيه؟
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
ياااااه عمرو وسلمى من رواية أسد و7 قطط وحشوني أوي🥺❤️ تفتكروا برج سلمى إيه؟ وبرج عمرو إيه؟
