طلّقني!

|٣| اتقوا الله يا نسوان!

ليه البنات بتحب الباد بوي؟ أو في مصطلح آخر.. ليه أنا بحب الباد بوي؟

ظاهرة نسوية سمّيتها أنا بفلسفتي الخاصة التي ليس لها أهمية على الإطلاق "متلازمة حب الباد بوي" أو بمسمّى آخر "اتقوا الله يا نسوان!"

بنسأل نفسنا كتير كـبنات، والشباب بيسألوا نفسهم أكتر مننا والله، ليه بنحب الباد بوي؟ يعني ليه وقعنا في حب سيجارة توماس شيلبي في مسلسل Peaky Blinders؟ ليه عشقنا الـ سكنت يوك وصوته وهو بيصرّخ بـ دكتووووووور في مسلسل حب أبيض أسود؟ وليه أُغرِمنا بدموية كلاوس وهو بينادي ريبيكاااااااه في مسلسل T.O؟ طب ليه حتى وقعنا في حب شاروخان وهو مهووس بـ ككككككككـ كيران في فيلم Darr؟ طيب ليه حبينا كل أفراد عصابة La casa de papel الأسباني وهما عصابة أصلًا؟ مش هقول إني حبيت نانو من مسلسل Elite علشان عايزة أنسى إني شوفته أصلًا وأكفّر عن ذنوبي، وجيبت لك أسباب من أغلب البلاد أهو علشان يبقى كله متابع.

إحنا كـبنات بنحب الباد بوي، أيوا مالك بتبصيلي كدا ليه؟ كلنا كـبنات بنحبهم وراجعي نفسك والله هتلاقي كلامي صح، طيب ليه بنحبهم؟ ليه نسيب الجود بوي أو الچينتل مان ونحب الباد بوي الصايع الضايع اللي مش متربي ويعرف علينا بنات كتير؟ وليه نسيب الميم لورد'س يعملوا علينا ميمز ويقولوا: "بنت ناس ومحترمة وفيها كل الصفات الكويسة، الولد اللي بتحبه:" ويحطوا صورة لواحد قمر كدا بسيجارة وحشّاش ومش متربي أصلًا وسرسج.

في البوست دا جمعّتلكم من وجهة نظري ووجهة نظر الشلة بتاعتي، أسباب حبنا للباد بوي، فلو أنت باد بوي اقرأ البوست كله علشان تعرف إنك معتوه أصلًا وجايبلنا مرض العته معاك.

أسباب حب البنات اللي أنا منهم للباد بوي:
أولًا: لأنه الكائن الكاريزماوي:
أيوا زي ما بقول لك كدا، الباد بوي عبارة عن كاريزما مكسوّة عظام ولحم ماشية على سطح الأرض، عنده ثقة في نفسه رهيبة وشموخ كدا ناتج عن خبراته المتعددة مع أصناف البنات المختلفة، اللي هو يبص لك ببرود كدا ويستنى لما تروحي أنتِ تكلميه وبعدها يقول لك إنه بيحبك لو قولتِ له بخ بس.. الكاريزما بتغطيه من أخمص قدميه حتى أعلى رأسه، كاريزما في هدومه اللي أغلبها أسود وچاكيت جلد بيعذّبنا دا، كاريزما في شعره اللي بيكون جربان ومش متسرّح أصلًا، كاريزما في طريقة مسكته للسيجارة ونفخته لدخانها أووووح..

إحم نكمل.

ثانيًا: خبرة الباد بوي في التعامل مع جنس حواء:
طبعًا عارفة أنا هقول إيه في حوار الخبرة دا🌝، بس لا أنا هجيبها من مصطلح تاني وهو الباد بوي "بيدخل للبنت من ثغراتها"، يعني مدقدق في الشغلانة، متكلم مع بنات كتير قبلك ومجرّب معاهم كل الأساليب والكذبات لحد ما كوّن قاموس الشوامل في التعامل مع البنات الحوامل "على أساس قافية وكدا"، المهم إننا بنلاقي في الباد بوي الشخص اللي يعطينا الرومانسية اللي بندوّر عليها، الشخص اللي لما نتخانق معاه يلاقي كذبة مناسبة يضحك علينا بيها ونصدّقها والابتسامة قاسمة وشوشنا، بل ونروح نعتذرله كمان وهو الغلطان أصلًا.. لا تخرج قبل أن تقول سبحان الله.