- يعني دا مفهومك عن الحب؟ أنت كدا مش بتتحكّم فيها وبتحاول تخلّيها جارية ليك وبس؟
= لا طبعًا، الغيرة من طبائع الرجال المسلمين الأقوياء.
- وهو الإسلام ماعلّمكش إن حرام تضرب مراتك لحد ما تورّم وشها يا سيف الله المسلول القوي؟
= الإسلام قال واضربوهنّ..
- أيوا، الضربة التأديبية، ثلاث مرات بالسِواك مش بالحزام الجلد بتاعك.
= ما هي اللي غلطت، واللي غلط لازم يتربى.
- وإيه غلطها؟
= كانت بترد على ابن عمها كتير على الواتس آب اليومين اللي فاتوا، دي خيانة، ابن عمها يعتبر راجل غريب عنها في الإسلام ومش مُحلّل ليها.
- طب ما هي استأذنتك ترد عليه علشان كانت بتصالحه على مراته، وبعدين دا ردودها معاه كانت كتابية واتس وفي منتهى الاحترام ماكانتش بتبعت له إيموچي حتى، مش كانت بتكلمه وش لوش وقاعدة معاه.
= بردو ابن عمها ومش حلال ليها تكلمه الفترة دي كلها.
- وبالنسبة لبنت عمتك اللي فضلت تتكلم معاها ساعتين بالتليفون امبارح وتقول لها وحشتيني؟
= كانت راجعة من برا مصر بعد ما قعدت في روسيا 4 سنين في الكلية، كلمتها أتطمن عليها.
- ساعتين؟
= كانت وحشاني.
- امممممم، والكلام العاطفي اللي قولته ليها؟
= كانت وحشاني وبتطمن عليها.
- وهي بنت عمتك مُحلّلة ليك للكلام العاطفي، وابن عم مراتك حرام ليها في مساعدة صلح بكل احترام بينهم؟
= أيوا طبعًا، أنا راجل شرقي ماقبلش مراتي تكلم راجل غيري.
- لكن كراجل شرقي تقبل إنك تكلّم واحدة وتحبحب فيها ساعتين في التليفون مش مُحلّلة ليك، صح؟
= وأنتِ مالك بالكلام دا أصلًا؟ بتدخلي بيني وبين مراتي ليه؟ أضربها ولا أقطّع جسمها بسكينة، مالك أنتِ؟ وبعدين عرفتِ كل اللي حصل بيننا دا إزاي؟
- مراتك اللي حكيت لي.
= دا نهار أبوها أسود، بتخرّج أسرار بيتنا للناس الغريبة ليه؟ دي عايزة تتربى من أول وجديد، لا وجاية تعاتبيني على ضرب واحدة فاضحة أسرار بيتها وجوزها للغُربا.
- فعلًا عايزة تتربى من أول وجديد علشان لسه مستحملة واحد زيك وعايشة معاه.
= جرا إيه يا مرا؟ أنتِ مين وعايزة مني إيه؟
- أنا ناشطة في جمعية حقوق المرأة، أنا اللي مراتك كلمتني تستنجد بيا علشان مالهاش حد في الدنيا غيرك.
= تستنجد بيكِ من مين؟
- منك.
= تستنجد بيكِ مني ليه؟ أنتِ مش لسه قايلة إن مالهاش حد غيري في الدنيا؟ ما هي لو سابتني مش هتلاقي حد ليها في الدنيا خالص.
- دا المطلوب أصلًا يا فندم، الواحدة تعيش في الدنيا وحيدة أحسن ما تكون مع واحد هو اللي ليها في الدنيا وبيستغل إن هو اللي ليها بس في الدنيا.
= وهتعملي إيه يا ست الناشطة في حقوق المرأة؟ طلاق مش هطلق ومالهاش مؤخر عندي ولا مضيت على قايمة، هتترمي في الشارع.
- ما إحنا هنقول الكلام دا لمحكمة الأسرة وهي بتخلعها منك غصب عنك، وهنقوله بردو للمحكمة الجنائية وهي بتحاسبك على الاعتداء عليها أكثر من مرة، وكمان هنقوله للبنات وهما هيقولوا بنفسهم للسوشيال ميديا وإحنا بنفضحك علشان تكون عبرة لغيرك، وفي الآخرة مراتك هتقوله لرب الآخرة، وربنا القادر وحده على استرجاع حقها بالكامل منك.. يا راجل يا شرقي.
#سكريبتات_ندوش.
أنت تقرأ
طلّقني!
Non-Fictionهذا الكتاب هزلي فكاهي يحمل بنهاية كل جزءٍ من أجزائه مغزى وهدف. سكريبتات مصرية لما بعد الزواج. الجانب الفكاهي الناضج مني: «ندى الشحات». التحديث بشكل يومي حتى يصل لخمسين سكريبت.
