عارفين إيه أكبرر فتنة موجودة في الحياة دلوقت للستات والرجّالة؟
مش الست اللي بتدحلب عشان تخطف راجل، لأن ولا مؤاخذة، مافيش راجل عيل بيتخطف.. هو بيروح بمزاجه.
ولا الراجل اللي بيفضل ورا ست متجوزة عشان يستميلها.. مافيش ست بتفتح الباب دا إلا وهي شايفة الاستمالة بوضوح.
أيوا ممكن بيضعفوا، لكن دي فتنة داخلة كدا بوضوح على ضعف عندهم.. علشان تقول لهم انتبهوا أبوابكم مفتوحة.. وأنم ضعفاء أوي.. واللي في قلبه خير ربنا بيحفظه أو بيربيه وبيطلع من التجربة لو عايز يحسّن من نفسه متعلم الدرس كويس.
لكن الفتنة الحقيقية الراجل المحترم اللي مش بيحاول أصلًا مع الستات في دايرة شغله وتعاملاته الحياتية.
والست المحترمة المهذّبة اللي بتتعامل مع زمايلها بأدب واحترام ومن غير تعدي حدود.
لكن مش بينتبهوا لنقطة مهمة، إن كل حركة مهذبة لمساعدة طرف من الجنس الآخر ممكن تسبّب "ميل قلبي"!
دي فتنة ظاهرها حلال، وجواها كل خطوات الحرام بداية من الخطرة!
كل كلمة طيبة بتتقال ممكن تخلي القلب يزوغ..
"متضايق من إيه؟"
"أنت كويس؟"
"عندك مشكلة؟ أقدر أساعدك؟"
تقديم الخدمات، وتقديم الدعم للجنس الآخر
دا باب فتنة بيقيد نار في قلب المتلقي!
البيوت مليانة هم ووجع.. ستات زعلانة عندهم احتياج عاطفي، والزوج مشغول مسكين في لقمة العيش أو زوج مش منتبه لمشاعرها، أو حتى زوج مقصر.
والرجالة مسحولة وبتحب تنوع أوي بالذات لما تضغط ويلاقي مراته مضغوطة، بيقع من غير ما يحس في الحنية اللي بيلاقيها مغلفة بأدب شديد.
بتحب تشرب حاجة؟
طب أنت شكلك مضغوط مش هخلي حد من الشركة يكلمك لغاية ما تفوق!
بلاش في بيئة الشغل "نحسس الآخرين بأننا حاسين بيهم"
بلاش الدخول في زون المشاعر أبدًا.
بلاش نحل مشكلة ليهم ونعدي خطوة لقلوبهم.
أيوا، في الاختلاط مش المهم أبدًا عطاء سعادتك ولطف سيادتك.. خليهم لأهل بيتك هتبقى خير الناس "خيركم، خيركم لأهله".
في الاختلاط تؤجر أكثر في الحدود.
ماتنزلش الكُلفة..
ماتحسسش اللي قُصادك بألفة!
ماتفرحش في المعاملة فياخدوا عليك!
خلي معاملاتك في الشغل والكلام في الشغل
مالكوش دعوة بمشاكلهم واحتياجتهم، ليهم دوايرهم يغطوها.. طالما راجل وست.
وبالذات المتجوزين أصلًا.. لما تروحوا الشغل خلوا تعاملكم إنساني عام، بلاش تخصيص بالله عليكم حد بانتباه واهتمام!
أنتم مش متخيلين دا بيعمل إيه في النفوس.
والشيطان بيزين..
والخطوات بتتمد خطوة خطوة مابتحسش إنك هتقع في خيانة لغاية ما بتقع.
بلاش تكونوا فتنة لغيركم!
شخص متجوز، ست أو راجل، نحافظ على المسافات.
طب لو مش متجوز؟ بردو نحافظ على قلوبهم. ليه تعلقوا القلوب بيكم؟
يا سيدي لو حد عايز تتجوزه الوضوح أجمل من التساؤلات ومحاولة ترجمة التصرفات كل دا بيؤذي القلب جدًا.
خليك واضح
وفي حالك
وإنسان للكل بشكل عام
ماتدخلش في خصوصيات
وبلاش تمضية الوقت مع جنس آخر بلا هدف،
وخد نية الحفاظ على القلوب.
الميل القلبي دا ممكن يهد بيوت، ويدخل زعزعة نفسية للشخص ويلغبط قيمه، وتبقى سبب في آذاه.
غلطك إنك لم تتق الله في الاختلاط، واللي بيتقي الشبهات فقد استبرأ لدينه وعرضه.
نصيحة من كواليس النفوس،
كفاية لغبطة بقى!
أنت تقرأ
طلّقني!
Literatura faktuهذا الكتاب هزلي فكاهي يحمل بنهاية كل جزءٍ من أجزائه مغزى وهدف. سكريبتات مصرية لما بعد الزواج. الجانب الفكاهي الناضج مني: «ندى الشحات». التحديث بشكل يومي حتى يصل لخمسين سكريبت.
