هذا الكتاب هزلي فكاهي يحمل بنهاية كل جزءٍ من أجزائه مغزى وهدف. سكريبتات مصرية لما بعد الزواج.
الجانب الفكاهي الناضج مني: «ندى الشحات».
التحديث بشكل يومي حتى يصل لخمسين سكريبت.
أنا عارفة إننا كـبنات حواراتنا كترت، وأنا بصراحة بحب الحوارات، خصوصًا الحوارات الحلوة اللي لابسة زي عسكري دي أوووه.🚶
دراسة أجراها الجانب التافه مني أطلقت عليها مُسمّى "الميري لسرقة القلوب الحريمي"
ليه كل ما نشوف ضابط في مسلسل أو فيلم نكراش عليه حتى لو كان شر.ير وابن كل.ب؟ ليه لما نقرأ أول معلومة في الرواية بتدل على إن البطل ضابط بنكمّل الرواية ونقف في صف الضابط مهما كانت وسائل تعذ.يبه للمرأة ومهما كان اتساع القبو بتاع بيته؟ ليه حبينا أحمد عز في فيلم الخلية؟ ولا دا سؤال مش واقعي علشان أحمد عز يتحب في أي وقت وأي مكان أصلًا.🤝
تعالوا أقول لكم ليه البنات بتحب الضباط، وليه بنتمنى نتجوز ضابط، وأنا بعد البوست دا مستنية اللي هيبعت لي ميسدچ يقول لي: "اقبلي الأد أنا ضابط" علشان هقبل الأد المرة دي بجد والله.🥺
أسباب وقوع البنات في عشق كائن الضابط: أولًا: كائن الكاريزما والسُلطة.. لكن كاريزما خطيرة جامدة زوحليقة. بمعنى؟ معروف إن الضابط سواء جيش أو شرطة بيتمتّع بمراكز قوية، ليه سُلطة عُليا في الدولة، ليه امتيازات، مُرتبه كبير وابن غنية، يعني هتاخدي ميكس ٣×١ مال، جمال، مركز، ويا بختك بجد🥺😂، كائن الأنثى بيحب الشخص ذو السُلطة والقيمة بين الناس، بنحب نشوفه بيُؤمر وأوامره تتنفذ، ودي فطرة فينا والله غصب عننا.🚶 أما الكاريزما.. فالضابط كائن جِدّي، مالوش في الهزار كتير، ماشي دُغري بسبب التمارين اللي بتأثر عليه وشغله مع المجرمين، هتسألوني طيب الضُباط اللي بنشوفهم على الإنستا مرحين وبيتصوروا كتير، هقول لك دول العينات الأنثوية من الضُباط اللي صاحبتك بتبعتلك اللينك بتاعهم وتقول لك بت بت شوفي المُز دا، النوع دا بيستغل كاريزمته الغير مفهومة في كونه ضابط ويجذب بيها الأنثى اللي زيك وزي صاحبتك دي، بيتغذّى على إعجاب البنات واللاڤ. ودا غالبًا أمه مدخّلاه شُرطة غصب.
ثانيًا: الضابط مصدر للأمن والأمان: تحسي إنك متجوزة سيكيورتي، شخص قادر يحميكِ في أي وقت وفي أي مكان، ودا كما يمثّل لنا عقلنا الباطن كبنات، علشان ضابط يبقى هيحميني لإنه متدرب على القتال والتعامل مع المجرمين، ماسمعوش عن المجرمين أعداء الضُباط اللي بيخطفوا زوجاتهم علشان ينتقموا منهم في الأفلام المصرية هه.
ثالثًا: الضابط رجل مهم: وأنتِ هتبقي الفنانة ميرڤت أمين في فيلم زوجة رجل مهم تيهيهي، المهم نتكلم في النقطة دي بجد، الضابط شخصية مهمة في الدولة بتقدير الناس سواء كان السبب خوف الناس منه أو احترامهم ليه، وإحنا كـبنات بنموت في الشخص المهم اللي تحسي إنه نجم في نفسه كدا بتنسيق هدومه وأناقته وألوانه سواء في زيه العسكري أو الكاچوال وااح.🤍
رابعًا: الضابط حِمِش: قوي بس رومانسي، وهنا بنروح للفنان أحمد السقا في حلقته في مسلسل عايزة أتجوز، حياته المهنية كضابط أثّرت عليه وعلى طريقة تعامله مع الناس سواء زوجته أو أفراد المجتمع حواليه، فتلاقوه حِمش بس لما يحب يبقى رومانسي بيبقى سوما العاشق، أغلب الضُباط بنلاقيهم حنينين في التعامل مع الناس زي كبار السن والأطفال، ورومانسي مع زوجته بيحاول يعوّضها عن فترات غيابه في الشغل وقلقها عليه.. يعني مش هيبقى غايب طول الوقت ورخم كمان دي حاجة كُف.ر.🙂
خامسًا: الضابط أغلب الوقت في غياب عن بيته: هتقولوا ما دي حاجة سلبية يا ندى، هقول لا والله دا منتهى الجمدان يا رايق، بمعنى لو اتجوزتِ ضابط مش هيكون قاعد في وشك طول اليوم ودا ممكن يساهم في هدوء البيت وقلة المشاكل الزوجية.
سادسًا وأخيرًا: الضابط بيتحمّل المسؤولية وصاحب قرار ومش متردد: بطبيعة تدريباته في الكُلية مهما كان شخص عبيط بيتحمّل المسؤولية، لإنه اتعود على الموضوع دا سواء في تدريباته أو شغله، وتلاقي قراراته أغلبها صائب، مش بيحتاج وقت يفكّر كتير ومتعود على المشاكل، اغلطي أنتِ بس وهتلاقي عنده الحل.
كائن الضابط -مش اللي عندهم أكونت'س إنستغرام- فيه صفات حلوة كتير، بس بردو ماتتجوّزيش ضابط، عارفة ليه؟ علشان هو بيحب يتأمّر، حياته مهنية متعود يعطي أوامر وواجب تنفيذها، وأنتِ كامرأة حُرة إلا كرامتشي يا شيماء، بالإضافة إنه بيغيب عن البيت كتير يعني والواحد بيحس بملل بسرعة، أومال أنا متجوزة ضابط ليه يعني وهو مش في البيت؟ طلقني!
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
#سكريبتات_أفروديت نقاشات ليس لها أي أهمية على الإطلاق.
