- أنت تعرف الشاب اللي قتلها؟
= أه يا أستاذ طبعًا أعرفه، دا أنا جارهم من وهو لسه في اللفة، وبصراحة عمري ما سمعت منه أو من أهله حاجة وحشة أبدًا، دي عيلة مؤمنة وتقية جدًا، ورجالتهم مابيفوتوش فرض في المسجد.
- إزاي محترم ومابيفوتش فرض في المسجد وقتلها لمجرد إنها رفضته لما اتقدم لها عايز يتجوّزها أكتر من مرة؟
= ما هو بصراحة يا أستاذ هي ليه رفضته أكتر من مرة وكسرت قلبه كدا؟ ما كانت تعطيه فرصة حتى يحصل خطوبة ولا تتكلم معاه ولا حتى تصلي استخارة، مش يمكن تحبه في فترة الخطوبة ويبقى فازوا ببعض وماضطرش إنه يقتلها؟
- يا حاج إيه اللي بتقوله دا؟ هو الجواز بالعافية الأيام دي؟ البنت أكيد ليها أسبابها للرفض، دا حتى كون إنه قتلها لما رفضته أكبر دليل على إنه يستاهل يترفض فعلًا، هو أي حد يترفض من بنت اتقدم للجواز منها يروح يقتلها؟ وبعدين أنا بسألك عن أخلاقه اللي بتقول عليها عالية ومتدين ومابيفوّتش فرض صلاة وقاتل إزاي؟
= يا أستاذ صلي على النبي الكلام أخد وعطا، الواد دا محترم بجد وعمري ما سمعت له صوت من صُغره، غير وهو بيضرب أمه وأخواته.
- بيضرب أمه وأخواته؟ إيه الثقة اللي بتتكلم بيها دي يا حاج؟ أنت كدا بتثبت إنه مختل وقاتل فعلًا مش محترم ومابيفوّتش فرض زي ما بتقول.
= وإيه يعني لما يضرب أمه وأخواته؟ هو بيضرب حد غريب؟ وبعدين أكيد مش هيضربهم من فراغ، أكيد عملوا حاجة وحشة تخلّيه مضطر يضربهم علشان يربّيهم، ولا يسيبهم على حريتهم يدمروا شرفه؟
- يا حاج هضربك يا حاج وربنا. سطوب سطوب يا ابني وقّف تصوير.. إحنا عايشين فين؟ دي الغابة أقل خطر منكم.
---
#فتاة_المنصورة
الاثنين، ٢٠-٦-٢٠٢٢.
#سكريبتات_ندوش.
أنت تقرأ
طلّقني!
Non-Fictionهذا الكتاب هزلي فكاهي يحمل بنهاية كل جزءٍ من أجزائه مغزى وهدف. سكريبتات مصرية لما بعد الزواج. الجانب الفكاهي الناضج مني: «ندى الشحات». التحديث بشكل يومي حتى يصل لخمسين سكريبت.
