كنت بفكر هاني هيعمل ايه لما اروح اكلمه واقوله اني خرجت مع زيدان واني فهمت الموضوع خلاص انه بيحبني، هو هيعمل حاجه من اتنين، يا هيعترفلي انها كلها كانت لعبه وهو كان بيضيع وقتي ويقولي انه بيحبني في الاخر، او هيشتمني ويحدفني بالساطور ومش هيفوت المرادي.. انا عارفه ان هاني عنده مشاكل في مشاعره ومش بيعرف يعبر عن نفسه بجد بس لو بيحبني مش هيقتلني.. صح؟
المشكله اني معرفش اجابه سؤال هل هيقتلني ولا لا، وموضوع اني معرفش الاجابه ده واجعلي بطني، وبكره ان هاني بيخليني مش واثقه من نفسي.. ماهو بصراحه الي حمار و انا مش عايشه في الجنه انا مستينه الصعيدي الصايع الي عامل تاتوهات وغني يحبني! الموضوع صعب شويه واكيد هيبقي فيه مشاكل.. هو قالي انه بيحبني قبل كده كذا مره بس انا لازم اخد منه الاكيد انهارده.. ياتقتلني ياتحبني حاجه من الاتنين ياهاني!
معكرلي مزاجي فنزلت اجيب كوبايه قهوه سخنه اشربها قبل ما اروح اشوفه، مينفعش اروح مزاجي متعكر عشان هو هيعكره اكتر وممكن يغمي عليا.
اتصلت بنيني اسأله هاني فين وقالي انه تقريباً راح بيته يحضر حفله لوسي وساب حفله نار جهنم في الجامعه، روحت لفيت في نص الطريق وطلعت ناحيه الشارع الي بيودي علي بيته بأقصي سرعه ومهمنيش الناس الي بتعدي الشارع ولا العيال الي راجعه من المدرسه، انا هواجهه انهارده وهرد عليه ومش هخاف من الساطور.
ركنت العربيه صف تاني وطلعت علي السلالم جري وصوت الاغاني مسمع في المنطقه كلها، حاولت اخبي نفسي من فيفي وشلتها عشان معنديش وقت للرغي وبصيت علي الكنبه علي العمه بتاعته او شعره الي نازل من جنابها ملقيتهوش.. قمت طلعت الدور التاني اشوفه موجود في اوضته ولا لا..
وصلت الباب الي صلحه من ساعه اول حفله لما كسرت الباب عليه لما كان في متحرش عايز يتحرش بيا، وقتلهولي بالساطور بتاعه.. راجلي.
"افتح ياهااااني!"
فضلت اخبط اخبط ومفيش رد، ده لو هو ميت جوه هيصحي يفتحلي بس واضح انه مش موجود.. فتحت التليفون تاني وقررت اتصل بلبان عشان نيني مكنش متأكد.. رد يالبان عايزه اقول لهاني اني بحبه فشخ.
رد عليا وقالي ان هاني مش موجود عندهم في بيت ابوه، قفلت معاه هو اختفي خالص بقي ولا ايه، المفروض كنت دورت الاول في حفله النار في الجامعه عشان ممكن يطلع لسه هناك عشان انا مغبتش عنه كتير اوي يعني.
نزلت ونطيت في العربيه وسوقت تاني بسرعه وخطوره بس محدش هيوقفني في البلد دي، محدش فيكي يابلد هيوقف تيسير من انها تقول لهنهونها انهارده انها بتحبه! انا كان اسهلي اتصل بيه اعرف مكانه بس انا مش عايزه اسهلها علي نفسي.. انا عايزه يبقي فيه عنصر المفاجئه.. بوم تيسير هنا.. محدش عارف امتي ده حصل.
أنت تقرأ
AFTER (بالمصري)
Romanceتيسير هونج، فتاه جامعية عندها 18 سنه درجاتها عاليه وحبيبها زي الفل، علي طول بتخطط للمستقبل لحد ما قابلت الفتي الصعيدي ابن الكلب الي اسمه هاني عبفغور البرعي عنده كوليكشن سواطير وسكاكين كتيره دمرلها الخطط الي حطتها. تحذير- الكتاب ده بيضم تفاصيل مضحكه...
