كنت قاعده انا وهاني بنتكلم عن نفسنا، مش عارفه ليه بس اشطه هاني بقي لطيف اوي بعد ما وافقت اتصاحب عليه..
"هه ياتيسير كفايه رغي، عندك حاجه عدله هتعمليها انهارده؟"
"ولا اي حاجه، احتمال نتصل بالنجار يجي يصلحلنا الباب الي انت كسرته و.. هقعد اذاكر بقيت اليوم بقي مذاكرتش بقالي كتي..."
"يلعن ابو الملل، ليه مذاكره ليييه؟" قال وهو بيزقني وبيقعدني جمبه..
"يلا افتحي الكمبيوتر نتفرج علي حاجه .. ايه مستغربه ليه؟ نوال ومشيناه في داهيه نقعد نفضي لبعضينا بقي"
قال وخلاني استغرب اكتر، وافقت ومسكت اللاب ودورت علي نتيفيلكس علي الساطور والسافله بس ده اتفرجنا عليه كتير..
"تتفرج علي هاري بوتر؟"
"لا لا مبحبوش، بيجوعني" قال وقعدت اضحك، ودورت في بقيه اللسته ولقيت هاني شهق اكنه شاف فيلم وحش ولا حاجه..
"ايه ضاااه! عندك مسلسل اوراق التوت؟"
"يع! ليه؟"
"لأ اصل واحد صاحبي فيه!"
"ايه ده انت صاحبك كمال ابو ريه؟"
"لأ ده واحد بيطلع كومبارس وهم بيجروا ولا بيحاربوا، زيي كده.. بحاول اخد نص الدور ده يمكن ابدأ في عالم التمثيل وانسي نفسي"
"طب مانت بتمثل ياهاني"
"بمثل ايه بقي؟"
"بتمثل عليا ياحبيبي، يلا دورلك علي حاجه تانيه عدله تتفرج عليها." قولتله وقصفت جبهته، تمثيل ايه يابو تمثيل انا لو اتجوزته علنعمه من الدكانه للبيت هو هيهرج، هيمثل ولو ربنا فتحها عليه هيتشهر واحتمال يخوني وانا مش ناقصه خيانه اكتر من الي انا فيها.
شغل هاني فيلم هيبتا، قومت بصيتله بصه شريره..
"ايه ياتيسير مش قولتلك مره نروحه وانتي رفضتي؟"
"هاني. اطفي. الفيلم. ده."
"ايه الي مش عاجبك فيه؟"
"المحن ياحبي، هكسر اللابتوب علي نافوخك! و مش بعد المسرحيه الي عملتهالي قدام الناس دي والقصيده الي القيتها عليا تفرجني علي حاجات مكوعه زي دي!"
"ماشي اديني قفلت، نجيب كوارع ونضرب بقي؟"
قالي وقعدت افكر، اسمع كلامه؟ انا لسه شبعانه من العزومه.
وفجأه لقينا فيفي داخله..
"الله الله.. شكلي جيت في وقت مش مناسب."
"لأ في وقت مناسب جداً ايه يا فوفه الجمال ده كله؟" قولتلها وانا بقوم اسلم عليها كانت لابسه فستان مليان ورد عليه طرحه خضرا ودبابيس لموني فاقع، بغض النظر ان الالوان كتير يعني بس حلو..
أنت تقرأ
AFTER (بالمصري)
Romantizmتيسير هونج، فتاه جامعية عندها 18 سنه درجاتها عاليه وحبيبها زي الفل، علي طول بتخطط للمستقبل لحد ما قابلت الفتي الصعيدي ابن الكلب الي اسمه هاني عبفغور البرعي عنده كوليكشن سواطير وسكاكين كتيره دمرلها الخطط الي حطتها. تحذير- الكتاب ده بيضم تفاصيل مضحكه...
