The Black Gang (GirlxGirl)

17

හිරු සුපුරුදු පරිදිම මධ්‍යාහ්නය උදා වීමටද පළමුව චණ්ඩ ලෙස තම බලය පතුරුවා හරින්නට වූ අතර, පදිකයන් කුඩ මගින් ඒ චණ්ඩ හිරු කිරණ තමන් මත පතිත වීම වැලකුවද, ඒ උණුසුම මගහැරීම නම් උගහට විය.

එතරම් උණුසුමක් මධ්‍යයේ වුවද, කළු පැහැති, සිරුරම ආවරණය වන ඇදුමින් සැරසුණු අයෙකු, පදිකයන් අතරින් ඉදිරියට ඇවිද ගියේ චණ්ඩ හිරු කිරණ හෝ එහි උණුසුම තමන් හට කිසිදු ගැටලුවක් නොවන වග පෙන්වමිනි.

පහසුවෙන්ම සියල්ලන්ගේ අවධානය තමා වෙත යොමු වන වග ඔහු නොදත්තේ නොවේ. එහෙත් ඔහුට ඒ පිළිබදව තැකීමක් නොවිණ. අනුන්ගේ අදහස් තම සිරුරේ නොවදින්නේ නම් ඉන් තමාට ඇති ගැටලුවක් නැති වග ඔහු දැන සිටියේය.

අමතර පන්ති පැවැත්වෙන දෙමහල් ගොඩනැගිල්ල අසලින් සෙසු සිසුන් සමග පාර මාරු වූ හෙතෙම, සෙමින් ඉදිරියට ඇවිද ගියේ, සන්නිවේදන මධ්‍යස්ථානයක් ඉදිරියේ නතර විය.

එහි වූ දුරකතන කුටියට ඇතුළු වීමට ප්‍රථම ඔහු හාත්පසම මනාව නිරීක්ෂණය කළේය. අසාමාන්‍ය කිසිත් නොවිණ.

සුපුරුදු අංකයට ඇමතූ ඔහු, එවර නම් ඇමතුම සම්බන්ධ වන තුරු බලා සිටියේ නොඉවසිල්ලෙනි.

"හලෝ?" ඔහු බලාපොරොත්තු වූ හඩම අනෙක් පසින් ගලා ආයේය.

"මිස්ටර් දුමිත් එදිරිමාන්න, කොහොමද ඉතින්? මාව අමතකද දැන්?" ඔහු ඇසූයේ සමච්චලයෙනි.

"අහ්හ්, ඩ්‍රැගන්, ඔහේව අමතක වෙන්නේ කොහොමද මට?" දුමිත් කීයේ තියුණු හඩිනි. "මේ පාර මොන බොරු චෝදනාවද තමුන් මගේ දරුවට එල්ල කරන්නේ? තව එඩිට් කරපු වීඩියෝ හෙම තියෙනවද?"

"හොර බොරු මා ගාව නෑ මිස්ටර් එදිරිමාන්න. මම කියපු දේවල් ඇත්ත. අර වීඩියෝ එකත් ඇත්තක්. අන්ධ නොවී පොඩ්ඩක් හොයලා බලනවා. එතකොට තේරෙයි."

"ඩ්‍රැගන්, මම තමුන්ට හොදින් කියන්නේ, බොරු කතා කියවන්නේ නැතුව තමුන්ගේ වැඩක් බලාගන්නවා. ඒ මගේ දරුවා. එයා ගැන මම හොදට දන්නවා. තමුන් එයාට චරිත සහතික ලියන්න ඕන නෑ."

"ඔව්, අනිවාර්යෙන්ම. උඹ වගේම ඇතිනේ ඌත්..."

"නවත්තගනින්!" දුමිත් ගිගිරීය. "තමුසෙ ඉවරයි, ඩ්‍රැගන්. තමුසෙට වෙනත් කාටවත් මේ විදියට තර්ජනය කරන්න බැරිවෙයි ඉස්සරහට."