Cāi Cāi || ချိုက်ချိုက် || [ မြန်မာဘာသာပြန်] (Completed)

Chapter (37)

Chapter (37)

Act 5 : Avenue Q (9)
ကိုယ်ကလည်းသာမန်လူပဲ. . . သာမန်လူတွေအတိုင်း အခက်အခဲတွေဆိုတာ ကြုံကိုကြုံရမှာ. . .

အထက်တန်းကျောင်းသူကျောင်းသားများအတွက် ဆောင်းရာသီအားလပ်ရက်သည် အစဥ်အမြဲတိုတောင်းလွန်းလှသည်။

သူတို့အားလုံးသည် လွန်ခဲ့သောရက်အနည်းငယ်ကမှ အတန်းဖော်များကို လက်ပြနှုတ်ဆက်လိုက်ပုံရပြီး မျက်စိတစ်မှိတ်အတွင်းမှာပင် အားလုံးလိုလို ကျောင်းဝင်းထဲပြန်ပေါ်လာကြပြန်သည်။

အတန်းထဲရှိလူတော်တော်များများ ကိုယ်အလေးချိန်တက်သွားကြသည်ကို သာမန်မျက်စိဖြင့်ပင် မြင်နိုင်လေသည်။

စာသင်နှစ်တိုင်း၏အစတွင် ဟွားဝူအကယ်ဒမီ၏ ပထမဆုံးလုပ်ငန်းစဥ်မှာ ယောက်ျားလေးများနှင့်မိန်းကလေးများအား အုပ်စုနှစ်စုခွဲပြီး ကိုယ်အလေးချိန်ချိန်ခြင်းပင်ဖြစ်သည်။

ရယ်စရာလို့ထင်ရပေမယ့် အကသမားတွေအတွက်တော့ ဒါသည် ကမ္ဘာပေါ်မှာကြောက်စရာအကောင်းဆုံးသော အတွေ့အကြုံပင်။

သူတို့အားလုံးသည် ရောင်းစားခံဖို့စောင့်နေရသော ဝက်ကလေးအုပ်စုနှင့်ဆင်တူ၏။ အလေးချိန်ချိန်သည့်စက်ပေါ်ရှိ အီလက်ထရွန်းနစ်စကေးကို တစ်ချက်တက်နင်းပြီးတိုင်း မိမိ၏ကိုယ်အလေးချိန်ကို ကျယ်ကျယ်လောင်လောင်သတင်းပို့မည့် ဆရာမတစ်ဦးကလည်း အနားမှာရှိနေသည်။ ဝက်ကလေးများနှင့် ကျောင်းသားကျောင်းသူများ၏ ကိုယ်အလေးချိန်နှင့်ပတ်သတ်၍ တစ်ခုတည်းသော ကွာခြားချက်မှာ ဝက်ကလေးများက ပိုလေးလေလေ ပိုကောင်းလေလေဖြစ်သော်လည်း ကျောင်းသားကျောင်းသူများသည်တော့ ပိုပေါ့လေလေ ပိုကောင်းလေလေဖြစ်သည်။

ကိုယ်အလေးချိန်တိုင်းတာမှုမှာ နေ့ခင်းဘက်တွင်ဖြစ်ပြီး မိမိတို့၏အတိုင်းအတာအချက်အလက်များ ပိုမိုကောင်းမွန်စေရန်အတွက် လူအများအပြားသည် မနေ့ညကတည်းက ဆန်တစ်စေ့လေးကိုတောင် မစားရဲခဲ့ကြပေ။

စက်ပေါ်မတက်မီတွင် မိန်းကလေးများသည် သူတို့ဆံပင်ထဲရှိ ဆံညှပ်လေးများအားလုံးကို ဖြုတ်ချထားကြပြီး စက်၏အစွန်းလေးကို ခြေချောင်းလေးများဖြင့်သာ ဂရုတစိုက်ခြေလှမ်းလှမ်းကြ၏။