ကျေးငှက်အစုံတွန်ကျူးသံ ကျီးအာသံတချို့နဲ့ လေတိုး၍သစ်ရွက်အချင်းချင်းပွတ်တိုက်မိသံမှလွဲ၍ရေကူးကန်ပတ်ဝန်းကျင်နားသည်တိတ်ဆိတ်ငြိမ်သက်နေ၏။ လူနှစ်ဦးထိုင်နေပါသည်ဟု မျက်မြင်တွေ့၍သာယုံရမည် နှစ်ဦးလုံးစကားတစ်ခွန်းမဆိုဘဲဆိတ်ဆိတ်နေကြသည်မှာ ရေကူးကန်ထဲကရေသေတွေအလား။ အသက်အရွယ်ကွာဟသော ထိုလူသားနှစ်ဦးကိုကြည့်လျှင် လူကြီးဖြစ်သူ၏အတိတ်မှာရှိခဲ့သောမျက်နှာမျိုးကိုတွေ့နိုင်ပြီး လူရွယ်ဖြစ်သူ၏နောင်ဖြစ်လာမည့်အနာဂတ်မျက်နှာမျိုးကိုလည်း လူကြီးဖြစ်သူကိုကြည့်ခြင်းဖြင့်ခန့်မှန်းမိနိုင်မည်ထင်ပါ၏။
လူကြီးကကော်ဖီကိုအရသာခံသောက်နေသော်လည်း လူရွယ်မှာမူလူမမာဟူသောအကြောင်းပြချက်ဖြင့် သောက်ရမည့်အိုဗာတင်းပူပူကိုမူတစ်စက်မှမထိသေးပေ။
ဦးမြတ်ဟန်ကော်ဖီပူပူကိုတစ်ငုံမှုတ်သောက်လိုက်ပြီး သားကြီးကိုမည်သည့်ကိစ္စမှစပြောရင်ကောင်းမလဲဟုတွေးနေ၏။ ယခုမှသတိရကာစလူနာကိုစိတ်ရှုပ်ထွေးစေမည့်အကြောင်းများပြောလို့မဖြစ်ပေ။ ထို့ကြောင့် ဦးမြတ်ဟန်သည်ပုံမှန်လုပ်ရိုးလုပ်စဥ်အတိုင်း...
"အခုရောဘယ်လိုနေသေးလဲ သားကြီး"
"နည်းနည်းမအီမသာဖြစ်တာကလွဲလို့သားအဆင်ပြေပါတယ် အဖေ"
"အေးပေါ့ အခုမှကောင်းခါစကိုသားရဲ့ ဘာမှမဖြစ်ဖူးဆိုမှထူးဆန်းနေဦးမယ်"
ဦးမြတ်ဟန် ကော်ဖီတစ်ငုံယူသောက်လိုက်ပြန်၏။ ထို့နောက် "အေး" ဟူသောစကားလုံးကိုသံရှည်ဆွဲပြီးအစချီကာစကားဝိုင်းကိုဦးဆောင်ပါတော့သည်။
"အေး.....ငါ့သားမှဒီလိုတွေဖြစ်ရတယ်လို့ အဖေကမင်းကိုလက်လွှတ်ရတော့မယ်ထင်တာ"
နောက်ဆုံးစကားမှာအသံတွေတိမ်ဝင်သွားတော့ သားကြီးကသူ့ကိုလှည့်ကြည့်လာပါသည်။
"သား စိတ်လိုက်မာန်ပါတွေလုပ်ခဲ့တဲ့အကျိိုးတွေပါအဖေ"
"အဲ့လိုလည်းဘယ်ဟုတ်မလဲ သားရယ်...သားကလူငယ်ပဲ ပြီးတော့မင်းအဘိုးအကျင့်တွေနဲ့တစ်ထပ်တည်းပဲအဖေ့သားက"
YOU ARE READING
ဘုန်းပြည့်ချမ်းဟန် (Complete)
Fantasyဘုန်းပြည့်ချမ်းဟန်ဆိုတာ ချမ်း, တစ်ယောက် တည်းရဲ့အမည်နာမပဲဖြစ်စေရမယ်...။ 1.10.2021 >> 6.2.2022
