سوف تندم (مكتملة)

💞الجزء 2💞

آلَهّمً صّلَ وٌسِلَمً وٌبًآرکْ عٌلَﮯ سِيَدٍنِآ مًحًمًدٍ وٌعٌلَﮯ آلَهّ وٌصّحًبًهّ أجّمًعٌيَنِ 

______________________________________

عودة للحاضر

منعرفش شحال وانا هنا بصح بزاف
وهذاك لعبد من هذاك نهار مبانش حسو جابني
هنا وطيشني مقاليش اصلا واش بغا
قالي اوو شكون هنا لكان تتذكروا منبعد جا واحد عيطلو وراح
اسمو ايمن ومش زل كيما كنت نخمم
لكان تسقسوني كيفاش عرفت اسمو ونا شفتو
مرة وحدة
هذاك كي عيطلو لي قلتلكم عليه قالو
ايمن ارواح
وزيد ميبانش  تاع لمافيا وكذا معندو ني
عضلات ني والو سكولات 😂
ولي يقولي علاش تتنمري نخش فيه بدماغ
خلوني نتنمر في عقلي 😒

تفتح لباب ودخلت لخدامة حطتلي لماكلة
وخرجت كيما لعادة
كيما سييت نهدر معاها متجاوبنيش

بعد اسبوع

نضت نلقى عبد قاعد مكانش يبان مليح
حتى قرب ليا
ماسيليا: علاش جبتني هنا واش تسحق
ايمن: جبتك هنا نحتاجك
ماسيليا: واش تحتاج لكان بغيت دراهم
نقولك من ضك معنديش
ايمن: علابالي
ماسيليا: واش بغيت مالا؟! 😶
وعلاش جبتني هنا
ايمن: باش نبيعك
ماسيليا: كيفاش مفهمتش؟
ايمن: جبتك هنا باش نبيعك واش مفهمتيش
ماسيليا: يعني انت تاجر بالبشر
ايمن: هيه
  وجيت باش نقولك غدوا راح نديك
ونبيعك لناس وهوما يبيعو اعضاءك 
وغدوا راح نبداو

خرج وراح

صدمة ثم صدمة ثم صدمة
يعني سكولات هذاك راح يبيعني ويبيع
الاعضاء
ايما كليتي وريتي راح يتباعو 😮😭
تسما مكان لا مافيا لا حب لا جد ماليكم

في اليوم التالي (يعني غدوا 🙂)

جا سكولات هذاك وربطوني رجال تاعو
مش هو باينة

ميقدرش قتلكم سكولات وزيد قصير
يقتل ياخوتي بينازة
بصح والله محاينو كبار وراح يبيعني ايما لالة 😭
ركبني فطاكسي ورجال تاعو محاصريني
منقدرش نتنفس حتى
المهم كنت نودع فكليتي واعضائي
راح نتوحشهم بزاف

حبست طاكسي وهبطوني ودخلوني
لواحد دار في غابة ومهجورة
وقعدنا نستناو في هاذا لي راح يبيعوني ليه
وهو يبيع اعضائي
ايماااا اعضائي وقعدت نبكي

شوي هك دخلو رجال بزاف وفي
وسطهم راجل بصح مشفتوش تالمو كانو
دايرين عليه بزاف مقدرتش نشوفو