كلانا تابَ بالآخر

Part 4

"كلانا تاب بالآخر"

بقلم: وردة الخُزام

البارت (4)

نشتهي نشوفك
مثل لهفة گلب يعگوب وأزيد

عريان السيد خلف

ترفه: مرت فترة وابو نمر ما وصل يمنا، وامي هم ماجبرتني اطلع واني مستمره اقضي وقت فراغي بالمطبخ واتعلم طبخات وهاي السوالف ..بينما همه يوميه اشوفهم تصير الگعده و يبدي الرگص والاغاني وخواتي كلهن موجودات وياهن وحتى بنات خالتي اثنين هم اغلب الاحيان موجودات بس اكثر شي غاده يكون عليها طلب ،بينما اخويه ف شغلته خاف تصير عركه او مشكله ف هو يكون موجود ويانه لان احنه بس بنات وامي هم متگدر لهيج شغلات وكلها زلم ف هو يتواجد لهيج ضروره ...

واليوم تقريبا صارله 10 ايام ابو نمر ماواصل يمنه هو گالي راح يتأخر بس الصراحه شكله راح يطول هواي وكلما يعبر يوم وهو ماكو يزيد خوفي لا امي ترجع عليه، لانه حسب الي فهمته من سلوى هو دافعلها فلوس، اكيد بس تخلص مده الفلوس المدفوعه ترجع تطلعني ..

بس مااعرف اكو شعور غريب بداخلي هالفتره جاي احس نفسي استفقد وجوده،خاصة لمن تصير الحفلة وهو ماكو احس شي ناقص ..بس عود صدك هو يحبني ويسوي هالشي علمودي؟!
معقووله الكلام الي كالته سلوى صح وهو يحبني؟

بس لا لا مستحيل اصلا هو مبين عليه شيخ مدري ابن شيوخ ف من سابع المستحيلات يقبل يتزوج وحده مثلي ومثل بيئتنه واذا راد هالشي ف بس حتى يتونس مو يتزوجها وتصير ع ذمته،، اهووو هاي شبيه اليوم اني؟!
وكل عقلي جاي افكر بالسالفه ومصدگه روحي هه اصحي ترفه اصحي وشوفي داير مدايرج انتي منو وشنو حتى يفكر ولو للحظة يتزوجج؟!!

صحيت من تفكيري على صوت امي ..

صبوحه: ها يترفه شو جنها حلتلج الگعده؟

ترفه: سكتت مارديت

صبوحه: وهذا ابو نمر شو مابين بعد؟

ترفه: شمدريني بي اني مو هالگاعده يمج.

صبوحه:هاا، خووش

بس لْـۆ طول هالابو نمر مالج بعد تره حسبي حسابج ترجعين لشغلج يحلوه ،ماكو كعده خالي بلاش عندي

وعافتني وراحت ...تنهدت شيخلصها وياج؟ اوووف

الديوانية

ابو نمر :السلام عليكم

صعب :عليكم السلام، يا هَــْـِْـْْـِلاّ

جاسب: عاش من شافك بوية شدعوة

ابو نمر: هلا بيكم، ادري شنو سالفتكم كل ما واحد شافني وگال عاش من شافك؟
مو هالمجابلكم وجاعد

صعب: وين مجابلنا ماتگلي تره انه صارلي حول الاسبوع ماشايفك، هاي وانه رفيجك واخوك ..لْـۆ شتگول يجاسب؟