كلانا تابَ بالآخر

Part 8

"كلانا تاب بالآخر"

بقلم : وردة الخُزام

البارت  8

ردتْ أنسـى
وشـاط سبّـاح الگلب گـام ايتلـوّه،
يابـه احبكُم هيّ گـوه

بهاء سوادي

ابو نمر: كعدت من الصبح ورجعت لأهلي وصلت لهناك تقريبا الضحى تعرفون مسافه بعيده بين محافظة ومحافظة، وصلت گبل رحت لبيتي دخلت ..

_ السلام عليكم

مديحة وبناتهه: وعليكم السلام

ابو نمر: اي شلونكم شنهو اخباركم؟

مديحه:  زينين، زين وتضكرت عدك عايله وجايهه، وتگلب بعيونها ماعاجبها

ابو نمر: الي يسمعج يگول صارلي شهر عنكم، شو هنه كلهن يومين

سكتت وضلت تنافخ ماعاجبها الحجي ..

ابو نمر: اي وبوويه انتن شلونجن

البنات ردن: الْحٍمَدٍ للـّہ بوويه بخير

ابو نمر: شكو ماكو شنهو اخبار الديرة منهو مات منهو عدل،بيت الشيخ شنهو اخبارهم

مديحه: ماكو شي جديد ،زينين ماعدهم شي، بس الشيخ اجه ونشد  عنك وگناله والله ماندري علمنا علمك،عبنك تمشي وماتخبر واحد بمجانك بله صار عليك شي لا سامح الله شمدرينه احنه هاا؟

ابو نمر:  ماعليه مايصير شي، وبعدين شنهو انه زغيرون واگللكم وين اطب ووين اطلع؟

_ هساعه عوفينا من سوالفج المابيها حظ وگومن حطنلي ريوگ

مديحه: جا شنهو البيت الجنت بي ماريگك؟

ابو نمر: تجاهل كلامها، ووجه كلامه لبناته ..

_گومن بويه سولي لگمه گومن

گامن البنات وهو ضل گاعد بمجانه ..وره شويه سونله ريوگ وجابنه اله سمه بسم الله وگعد ياكل ..

ومديحه خلته وگامت عود زعلانه شلون يروح ومايگل الواحد .. والبنات هم راحن كلمن على شغلها ..

هو كمل اكل وگام غسل ورجع المجانه نشدهن ..

_ولجن بوويه وين رحتن

اجته رغد، هااا بوية

_وين اخوتج بوية

_ نمر طالع للشغل وفهد يم بيت الشيخ اضنه

_ ها، جا خوش .. روحي بووية على شغلج .
انه هم رايح لهناك اسلم على اخوي واشوف شكو ماكو ..

رحت لبيت الشيخ، طبيت للمضيف سلمت ..

ابو نمر: ها السلام عليكم

الكل:  وعليكم السلام، هلا ابو نمر

ابو نمر: هلا بيكم، الله يحفظكم

واردف ،شلونك شيخنا وگام باس راسه