MR's DOCTOR

Part 6

Unicode

"ကျေးဇူးပါပဲ .. ဒေါက်တာရယ်"

"ရပါတယ်ဗျာ"

အမေအိုကြီးက ထယ်ယောင်းရဲ့လက်လေးကို ဖွဖွဆုတ်ကိုင်ကာ ကျေးဇူးတင်စကားဆိုသည်။

အမေအိုကြီးနဲ့ သူမြေးမလေးအား ဆေးရုံရှေ့ထိ လိုက်ပို့ပေးလိုက်သည်။

သူတို့ထွက်သွားတော့မှ ထယ်ယောင်း အသက်ကို ခပ်ဖွဖွလေး ရှုထုတ်လိုက်သည်။

အင်း .. ဒီလလဲ လစာမရတော့ပြန်ဘူးပဲ။

တကယ်တော့ ဒီအမေအိုကြီးဟာ Sick Sinus Syndrome ဆိုသော နှလုံးလျှပ်စီးထုတ်လွှတ်တာ မမှန်သော ရောဂါဖြစ်နေတာ ဖြစ်သည်။

အမေအိုကြီးက သတိလစ်ပြီး ဆေးရုံရောက်လာခဲ့ရာမှ စစ်ဆေးကြည့်တော့ ထိုသို့ဖြစ်နေခြင်းသာ။

အချိန်မှီ နှလုံးခုန်စက် ထည့်သွင်းပြီး ကုပေးလိုက်မှ အဆင်ပြေသွားတာ ဖြစ်သည်။

အဲ့ဒါကိုလည်း ထယ်ယောင်းကိုယ်တိုင် ကုသပေးလိုက်တာဖြစ်ပြီး ထိုအတွက် ကုန်ကျစရိတ်ကိုလည်း ထယ်ယောင်းကပဲ စိုက်ပေးလိုက်တာဖြစ်သည်။

ဘာလို့ဆို အမေအိုကြီး Operation မဝင်ခင်က မြေးမလေးက ထယ်ယောင်းရဲ့လက်ကို အားကိုးတကြီးဆုတ်ကိုင်ကာ ကယ်ပေးဖို့ တောင်းဆိုလာသည်။

သူမမှာ မိသားစုဆိုလို့ ဒီအဘွားတစ်ယောက်သာ ရှိတော့ကြောင်းနဲ့ ဒီအဘွားကပဲ သူ့ကို ရှာဖွေကျွေးမွေးနေကြောင်း ငိုကြီးချက်မဖြင့် ပြောပြတော့ ထယ်ယောင်း စိတ်မကောင်း။

သူမလေးနေရာမှ ဝင်ခံစားပေးလို့ရသည် .. ကိုယ့်မှာလည်း မိသားစုဆိုလို့ အမေတစ်ယောက်ပဲ ရှိတော့တာမလား ..။

Operation အောင်မြင်သွားတော့လည်း ပေးစရာပိုက်ဆံမရှိသည်မို့ ထယ်ယောင်းကပဲ စိုက်ရှင်းပေးလိုက်ရသည်။

ကိုယ်လည်း ပိုက်ဆံအရမ်းလိုအပ်နေသူပေမယ့် ဒီလိုမျိုး ဒုက္ခရောက်နေတဲ့လူကိုတွေ့တော့ မကြည့်ရက်။

ကိုယ့်လူနာဆိုတော့လည်း ပိုဆိုးသည်ပေါ့လေ။

ဒါတောင် အဘွားကို Operation မစခင်မှာ ဆေးရုံအုပ်နှင့် ထယ်ယောင်း ပြဿနာတက်ရသေးသည်။