MR's DOCTOR

Part 10

Unicode

"လိုတာရှိရင် ခေါ်လိုက်ပါ ဒေါက်တာ"

အထုတ်တွေ သယ်ပို့ပေးပြီး အခန်းထဲက ပြန်မထွက်သွားခင်မှာ ဒမ်မီက ရိုကျိုးစွာပြောသည်။

ထယ်ယောင်း အပြုံးတစ်ချက်ဖြင့် အသိမှတ်ပြုဟန် ခေါင်းညိတ်ပြလိုက်တော့ ဒမ်မီက အခန်းထဲက ထွက်သွားလေသည်။

ဒမ်မီရဲ့ကျောပြင်ကို ကြည့်ပြီး စိတ်ညစ်သလို နှာခေါင်းရှုံ့လိုက်မိသည်။

ဒီဒမ်မီဆိုတဲ့ကောင်လေးက ယောန်ဂျွန်းလို ဖော်ဖော်ရွေရွေပုံစံမဟုတ်။

မျက်နှာထားတည်တည်နဲ့ အနေအေးကာ စကားသိပ်မပြောတတ်။

အရင်တစ်ခါ လာနေတည်းက ဒီကောင်လေးရဲ့ပုံစံကို ကောင်းကောင်းသိထားခဲ့သည်။

ဒီပုံစံနဲ့ဆို အရမ်းပျော်တတ်တဲ့ ထယ်ယောင်းနဲ့ ကီးကိုက်မှာ မဟုတ်။

သို့သော်လည်း ဘယ်သူ့ပဲဖြစ်ဖြစ် တည့်အောင်ပေါင်းရမည်လို့သာ တွေးလိုက်ပြီး အခန်းတံခါးပိတ်လိုက်သည်။

ထယ်ယောင်းနေရတဲ့အခန်းက အရင်နေခဲ့ဖူးတဲ့အခန်းဆိုပေမယ့် အခုက ပိုပြီး ပြည့်စုံနေသလို။

နောက်ဆုံးပေါ်အသုံးအဆောင်များနဲ့ ခေတ်မှီပစ္စည်းများ ပြည့်နှက်နေသော ဒီအခန်းက နာမည်ကြီး 5 stars ဟိုတယ်တွေထက်တောင် မိုက်သေးသည်။

"ဝါး .. ဒီလူ တော်တော်ချမ်းသာတာပဲ"

အထူးအဆန်းပစ္စည်းများကို ကိုင်ကြည့်လိုက် အခန်းထဲ လှည့်ပတ်သွားလိုက်ဖြင့် အလုပ်များနေတုန်း ခြံထဲက ကားသံတွေကြားလို့ ပြတင်းပေါက်ကနေ ငုံ့ကြည့်လိုက်တော့ သူ့ကားအပါအဝင် နောက်ထပ် ကားနှစ်စီးခြံရံလျက် ခြံထဲက ထွက်သွားတာကို တွေ့ရသည်။

သူက ခြံထဲက မထွက်ခင်မှာ ကားထဲကနေ ထယ်ယောင်းအခန်းစီသို့ မော့ကြည့်သွားပြီး ကားက ခြံအပြင်ရောက်သွားတော့မှ ကားမှန်အမဲများ ပြန်တင်သွား၏။

သူ မြင်လားမမြင်လားမသိပေမယ့် ထယ်ယောင်း မျက်စောင်းလှမ်းထိုးပစ်လိုက်သည်။

ဘယ်နေရာဖြစ်ဖြစ် လူအုပ်စုတကားကားဖြင့် သွားတတ်သော သူက မြင်ပြင်းကပ်စရာ။