👨💼🌧عريس من المطر 🌧👨💼
الحلقة23:
سمر تحكي:قاعدة مع مرام حكيتلها كلش حنى على اسراء قامت من بلاصتها اتنطرت بقات تروح وتجي فالشومبرة
مرام: شبيك هبلتي علاش مادرتي والو ديجا ماتديريش خير نعرفك تبلبزي الحالة...هففف منك يا سمر علاش ماقلتيليش
سمر: جاتني شويا عادية ماحبيتش نخلي الشك يدخل قلبي
مرام: ب.غلة الشك يدخل بالسيف وهو ماحكالكش عليها؟ ماقال والو؟(هزيتلها راصي لا)
سمر: غدوا نروح
مرام: ديري قيمة لعمرك ماتبقايش لاصقة غير فيه زدتي قعدتي فالدار...روحي تخدمي كالعيباد ضوك يولي يشوفك تافهة قاعدة غير فالدار...كون ماللول ما تخدميش بلاك بصح كنتي خدامة وليتي قعدتي باش تلصقي فيه وتشدي وجهو صباح وعشية
سمر: لا قلت باش نهتم بحياتي
مرام: لا كشغل كنتي تخدمي دايمن ضوكا ماعندك حتى شغل غيرو ...لازم تخليه يتوحشك و يحس بغيابك ويتحرق بنار الشوق تحكي وهي دايرة يدها على قلبها وتعمل في حركات تضحك...
سمر: ههههههه ضحكتيني
مرام: يعزيك راني نفهم فيك و نحط يدي فالنار غير اسراء هاذي وراها حكاية وبقاي هكذا بهلولة تشوفي. وين تلحقي النية مليحة اما ماشي الما يمشي من تحت رجليك ونتي لاخبر...ما تسأليهش اما خوذي حذرك وراقبي تحركاتها وراقبيه هو و خليه يشتاقلك ماشي غير يدخل تروحي تجري ترمي في روحك بالنويزات
سمر: عييييب مرام واش هذا خص غير تقوليلي واش نعمل معاه هففف
مرام: مش قصدي نقتحم خصوصياتك بصح راني نمدلك فليتكنيك باش تشوفي وزيدي خليه يكتشفك باش يحبك اكثر حكيلو على طموحاتك حكيلو واش حابة تحقي احلامك ماشي غير حاجات تافهة شبيك وليتي سطحية
سمر: في هاذي عندك حق ماسبقليش و دخلت معاه في حديث كيف هذا
مرام: وهو واش حاب يدير تعرفي عليه كلش؟مانيش نقلك انو هكذا صافي مايحكبش اما معرفة التفاصيل على بعضكم تخلي حبكم ينمو و يكبر
سمر: عندك حق اصلا من حبي ليه نحب نشاركو كلشي برك مازال مانعرفش كيفاش نقلو يجي يديني ضوكا؟
مرام: نخبط راصي واش راني نغني مالصباح
سمر: اوكي خلاص (رن تيليفوني) اااه اخرجي راه يعيطلي علاء زربي برا
مرام: صحيتي كيما وصيتك هاني برا نستنى كي تكملي عيطيلي ندخل (هزيت عليه بعد ما خرجت)
سمر: الو
علاء: عسلامة
سمر: كيفك لحقت للدار؟ ولا مازال برا؟
علاء: لا تعبت راني دخلت ونتي واش عاملة؟
سمر: جات مرام كنت قاعدة معاها...علاء خبرني شي
علاء: كيف واش؟
سمر: طموحاتك و احلامك مثلا(ضحك )
علاء: هههه منين جبتي السؤال هذا ...اوك لحد الان مازال لانو حاب نفتح كلينيك وحدي اما مش ضوكا.
سمر: ربي يسهلك
علاء: امين ونتيا؟
سمر: نحب الكتابة بزاف حابة نطبع كتاب باسمي ولا رواية اما من مدة طويلة كأن الشي هذا ووقت دخلت التمريض وليت حبست
علاء: نقدر نتخيلك روائية لانو رقيقة ياسر وحساسة
سمر: راح نكتب رواية اسمها عريس من المطر .
علاء: امممم حبيت ...فكرة اني البطل حتى في خيالك عجبتني راح ندعمك يا روحي
سمر: عيشك
علاء: نجيك صباح؟
سمر: لا خلي العشية خير
علاء: توحشتك سمر الدار من غيرك خالية مافيها روح (تبسمت وانا نسمع في كلامو حن قلبي علبه مانعرف علاش )
سمر: رواح صباح امالا تلقاني حاضرة
علاء : اوكي امالا نخليك تصبحي بخير بيزو
سمر: ونتا بخير
